ມີເດຍລາວແຂວງເຊກອງ ຂ່າວ: ສັນຍາ
ແຂວງເຊກອງຈັດພິທີໂຮມຊຸມນຸມສະເຫຼີມສອຫຼອງວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນຄົບຮອບ 60 ປີ (5 ເມສາ 1961-5 ເມສາ 2021) ແລະວັນສ້າງຕັ້ງກໍາລັງປ້ອງກັນຄວາມສະຫງົບແຂວງຄົບຮອບ 37 ປີ (24 ເມສາ 1984-24 ເມສາ 2021) ໂດຍມີທ່ານ ເຫຼັກໄຫຼ ສີວິໄລ ກໍາມະການສູນກາງພັກ, ເລ ຂາພັກແຂວງ, ເຈົ້າແຂວງໆເຊກອງ; ພ້ອມນີ້ ກໍມີທ່ານຮອງເຈົ້າແຂວງ, ທ່ານເຈົ້າເມືອງ, ຫົວໜ້າ-ຮອງພະແນກ, ອົງການທຽບເທົ່າ, ລັດວິສາຫະກິດ, ຄະນະພັກ-ຄະນະບັນຊາ, ອາດີດການນໍາຂອງແຂວງ, ນາຍ ແລະພົນຕໍາຫຼວດເຂົ້າຮ່ວມ.

ໃນພິທີທ່ານ ເຫຼັກໄຫຼ ສີວິໄລ ໄດ້ກ່າວວ່າ: ກໍາລັງປ້ອງກັນຄວາມສະຫງົບປະຊາຊົນ ແມ່ນກໍາລັງປະກອບອາວຸດ ປະຕິວັດອັນແຫຼມຄົມ ໂດຍແມ່ນພັກປະຊາຊົນ ປະຕິວັດລາວ ເປັນຜູ້ສ້າງຕັ້ງນໍາພາເດັດຂາດ ໂດຍກົງຮອບດ້ານ; ເປັນກໍາລັງທີ່ມາຈາກປະຊາຊົນ ໂດຍປະຊາຊົນ ແລະເພື່ອຮັບໃຊ້ສິດຜົນປະໂຫຍດຂອງປະຊາຊົນລາວບັນດາເຜົ່າ, ກໍາລັງປ້ອງກັນຄວາມສະຫງົບປະຊາຊົນໄດ້ກໍາເນີດ ແລະເຕີບໃຫຍ່ຂະຫຍາຍຕົວໃນຂະບວນການຕໍ່ສູ້ປົດປ່ອຍຊາດ, ຕ້ານຈັກກະພັດຜູ້ຮຸກຮານ, ປົກປັກຮັກສາ ແລະສ້າງສາພັດທະນາປະເທດຊາດ, ເວລາໃດກໍ່ມີມູນເຊື້ອການຕໍ່ສູ້ອັນອົງອາດກ້າຫານ, ມີນໍ້າໃຈເສຍສະຫຼະເດັດດ່ຽວບໍ່ຍອມຈໍານົນ, ມີຄວາມສັດຊື່ບໍລິສຸດ ແລະມີຄວາມສາມັກຄີເປັນປຶກແຜ່ນ.

ໃນໄລຍະ 60 ປີ ແລະ 37 ປີຜ່ານມາ ກໍາລັງປ້ອງກັນຄວາມສະຫງົບລາວ ແລະກໍາລັງປ້ອງກັນຄວາມສະຫງົບແຂວງເຊກອງ ສາມາດຍາດໄດ້ຜົນງານ ແລະໄຊຊະນະອັນໃຫຍ່ຫຼວງ, ໄດ້ຮ່ວມກັບປະຊາຊົນລາວສ້າງວິລະກໍາອັນລໍ້າເລີດ, ຂຽນປະຫວັດສາດຍຸກໃໝ່ທີ່ປະດັບເອ້ໄວ້ໃຫ້ແກ່ມູນເຊື້ອຕໍ່ສູ້ພິລະອາດຫານບໍ່ຍອມຈໍານົນຂອງຊາດລາວວິລະຊົນ, ກໍາລັງປ້ອງກັນຄວາມສະຫງົບແມ່ນລູກ-ຫຼານຜູ້ປະເສີດຂອງປະຊາຊົນລາວບັນດາເຜົ່າ, ທີ່ໄດ້ຮັບການຝຶກຝົນຫຼໍ່ຫຼອມ, ທົດສອບ ແລະເຕີບໃຫຍ່ຜ່ານເສັ້ນທາງອັນລະອິດລະອ້ຽວ, ຜ່ານຄວາມຫຍຸ້ງຍາກລໍາບາກໃນແປວໄຟສົງຄາມແຫ່ງການຕໍ່ສູ້ກູ້ຊາດ ກໍຄືສິ່ງທ້າທາຍນາໆປະການໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ.


ທ່ານ ເຫຼັກໄຫຼ ສີວິໄລ ໄດ້ກ່າວອີກວ່າ: ເພື່ອສືບຕໍ່ເສີມຂະຫຍາຍທາດແທ້, ມູນເຊື້ອຂອງກໍາລັງປ້ອງກັນຄວາມສະຫງົບປະຊາຊົນ ຕ້ອງສຸມໃສ່ດັ່ງນີ້: ຮັບປະກັນສະຖຽນລະພາບ ແລະຄວາມໝັ້ນຄົງດ້ານການເມືອງ, ຮັກສາຄວາມສະ ຫງົບ, ຄວາມເປັນລະບຽບຮຽບຮ້ອຍ ແລະປອດໄພທາງສັງຄົມໃຫ້ໜັກແໜ້ນ; ເພີ່ມທະວີການຈັດຕັ້ງຜັນຂະຫຍາຍແນວ ທາງປ້ອງກັນຄວາມສະຫງົບທົ່ວປວງຊົນຮອບດ້ານໃຫ້ເລິກເຊິ່ງ ແລະກາຍເປັນໜ້າທີ່ຂອງທົ່ວປວງຊົນຢ່າງແທ້ຈິງ; ຕັ້ງໜ້າແກ້ໄຂປະກົດການຫຍໍ້ທໍ້ໃນສັງຄົມໃຫ້ມີການຫັນປ່ຽນທີ່ຕັ້ງໜ້າ; ຈໍາກັດ ແລະສະກັດກັ້ນໜໍ່ແໜງທີ່ພາໃຫ້ກະທົບຕໍ່ຄວາມສະຫງົບປອດໄພ ແລະຄວາມເປັນລະບຽບຮຽບຮ້ອຍຂອງສັງຄົມ ກໍຄືຕໍ່ຄວາມໝັ້ນຄົງການເມືອງ, ເສດຖະກິດ ແລະວັດທະນະທໍາ-ສັງຄົມ.