ມີເດຍລາວແຂວງເຊກອງ (ຂ່າວ-ພາບ: ແກ້ວໄຊຍະວົງ) ແຂວງເຊກອງໄດ້ຮັບການແບ່ງປັນວັກຊິນປ້ອງກັນໂຄວິດ-19 ຈາກລັດຖະບານທັງໝົດ 12 ພັນໂດສ, ມີເປົ້າໝາຍສັກໃຫ້ໄດ້ທັງໝົດ 6 ພັນຄົນ; ແຕ່ມາຮອດປັດຈຸບັນສາມາດສັກໄດ້ແລ້ວ 4 ພັນວ່າຄົນເທົ່າກັບ 67,3% ຂອງແຜນ.

ຕາມການຖະແຫຼງຂອງທ່ານ ນາງ ບຸນຖະໜອມ ນາກລີລາ ຫົວໜ້າຂະແໜງອະນາໄມ ແລະສົ່ງເສີມສຸຂະພາບແຂວງເຊກອງໃຫ້ຮູ້ໃນວັນທີ 17 ພຶດສະພານີ້ວ່າ: ແຂວງເຊກອງໄດ້ເປີດຈຸດບໍລິການສັກວັກຊິນປ້ອງກັນໂຄວິດ-19 ໃຫ້ປະຊາຊົນໃນກຸ່ມອາຍຸລະຫວ່າງ 18-59 ປີລວມມີ 5 ຈຸດ ແລະໄດ້ເລີ່ມລົງມືສັກມາແຕ່ວັນທີ 11 ມີນາ 2021 ເປັນຕົ້ນມາເຖິງປັດຈຸບັນ ສາມາດສັກໄດ້ທັງໝົດ 4.036 ຄົນ, ໃນນັ້ນຈຸດໂຮງໝໍແຂວງ-ເມືອງລະມາມສັກໄດ້ 1.321 ຄົນ, ໂຮງໝໍເມືອງທ່າແຕງສັກໄດ້ 1.283 ຄົນ; ໂຮງໝໍເມືອງກະລຶມສັກໄດ້ 358 ຄົນ; ໂຮງໝໍເມືອງດາກຈຶງສັກໄດ້ 932 ຄົນ ແລະໂຮງໝໍເສນາຮັກ (ໂຮງໝໍທະຫານແຂວງ) ສັກໄດ້ 142 ຄົນ.

ທ່ານ ນາງ ບຸນຖະໜອມ ນາກລີລາ ໃຫ້ຮູ້ອີກວ່າ: ການສັກວັກຊິນເພື່ອສ້າງພູມຄຸມກັນໃຫ້ຮ່າງກາຍມີພູມຕ້ານ ທານຕໍ່ພະຍາດໂຄວິດ-19 ດັ່ງນັ້ນ ຈຶ່ງຂໍເຊີນຊວນພະນັກງານ-ລັດຖະກອນ, ທະຫານ-ຕໍາຫຼວດ, ບໍລິສັດພາກລັດ ແລະເອກະຊົນຕະຫຼອດຮອດປະຊາຊົນລາວ ແລະຕ່າງປະເທດທີ່ດໍາລົງຊີວິດຢູ່ແຂວງເຊກອງມາຮັບການສັກວັກຊິນປ້ອງກັນໂຄວິດ-19 ໂດຍບໍ່ເສຍຄ່າຕາມສະຖານທີ່ບໍລິການຕ່າງໆໃນໂມງລັດຖະການ.