ມີເດຍລາວແຂວງເຊກອງ (ຂ່າວ-ພາບ: ສັນຍາ) ເຖິງວ່າປັດຈຸບັນ ແຂວງເຊກອງຍັງບໍ່ມີກໍລະນີຕິດເຊື້ອພະຍາດໂຄວິດ-19 ເພີ່ມ, ແຕ່ຄະນະພັກ-ອົງການປົກຄອງ ກໍຄືຄະນະສະເພາະກິດຂັ້ນແຂວງຍັງສືບຕໍ່ໃຫ້ຄວາມສໍາຄັນອັນດັບໜຶ່ງໃນການຕິດຕາມເຝົ້າລະວັງ ແລະປ້ອງກັນຢ່າງເຂັ້ມງວດ, ທັງນີ້ ກໍເພື່ອແນໃສ່ບໍ່ໃຫ້ມີການແຜ່ລະບາດຂອງພະຍາດຮ້າຍດັ່ງກ່າວ.

ທ່ານ ດຣ. ຄໍາໄຫຼ ສັນຕິພູມ ຫົວໜ້າພະແນກສາທາລະນະສຸກແຂວງ, ຮອງປະທານຄະນະສະເພາກິດຂັ້ນແຂວງໄດ້ຖະແຫຼງຂ່າວໃຫ້ຮູ້ໃນວັນທີ 14 ພຶດສະພາ 2021 ວ່າ: ພາຍຫຼັງໄດ້ຮັບຄໍາສັ່ງແນະນໍາໃຫ້ສືບຕໍ່ຈັດຕັ້ງປະຕິບັດຄໍາສັ່ງເລກທີ 15/ນຍ, ລົງວັນທີ 21 ເມສາ 2021 ແລະຄໍາສັ່ງແນະນໍາຂອງທ່ານເຈົ້າແຂວງສະບັບເລກທີ 26 ລົງວັນທີ 6 ພຶດສະພາ 2021 ຄະນະສະເພາະກິດຂັ້ນແຂວງ ກໍໄດ້ຮີບຮ້ອນຈັດຕັ້ງປະຕິບັດສືບຕໍ່ໂຄສະນາເຜີຍແຜ່ບັນດາຄໍາສັ່ງ, ແຈ້ງການ ແລະມາດຕະການຕ່າງໆກ່ຽວກັບການປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ໃຫ້ປະຊາຊົນຮັບຮູ້ຢ່າງທົ່ວເຖິງ ເພື່ອໃຫ້ເຂົາເຈົ້າມີສ່ວນຮ່ວມໃນການປະຕິບັດ; ສືບຕໍ່ປິດແຂວງ, ຕັ້ງຈຸດກວດຄັດກອງ ເພື່ອຫາກໍລະນີສົງໃສຢູ່ຈຸດເຊື່ອມຕໍ່ລະຫວ່າງແຂວງຕໍ່ແຂວງ; ກໍາລັງ ປກຊ-ປກສ ເຂັ້ມງວດລາຕະເວນ, ປ້ອງກັນເວນ ແລະສ່ອງແສງລາຍງານເປັນປະຈໍາເປັນຕົ້ນຂອບເຂດຊາຍແດນລະຫວ່າງປະເທດ; ລະຫວ່າງແຂວງຕໍ່ແຂວງ, ເອົາໃຈໃສ່ປະສານງານລະຫວ່າງແຂວງກັບເມືອງ ແລະບັນດາຄະນະສະເພາະກິດຂັ້ນຕ່າງໆໃຫ້ວ່ອງໄວ, ຖືກຕ້ອງ ແລະທ່ວງທັນກັບສະພາບການ.

ທ່ານຫົວໜ້າພະແນກສາທາລະນະສຸກແຂວງໃຫ້ຮູ້ຕື່ມວ່າ: ການຄັດກອງຢູ່ຈຸດເຊື່ອມຕໍ່ລະຫວ່າງແຂວງຕໍ່ແຂວງແມ່ນເນັ້ນໃສ່ການກວດໜັງສືຢັ້ງຢືນການເດີນທາງ (ໃບຢັ້ງຢືນການສັກວັກຊິນ, ໃບຢັ້ງຢືນການກວດໂຄວິດ-19, ເອກະສານອະນຸຍາດວຽກງານທາງລັດຖະການ ແລະອື່ນໆທີ່ເຫັນວ່າມີຄວາມຈໍາເປັນ); ກວດວັດແທກອຸນຫະພູມ, ແຈກຜ້າປິດປາກ-ປິດດັງ ເຊິ່ງຜ່ານການຈັດຕັ້ງປະຕິບັດ ກໍເຫັນໄດ້ວ່າປະຊາຊົນມີຄວາມເຂົ້າໃຈ ແລະໃຫ້ການຮ່ວມມືປະຕິບັດມາດຕະການຕ່າງໆເປັນຢ່າງດີ.