ມີດຍລາວແຂວງເຊກອງ (ຂ່າວ-ພາບ: ສັນຍາ) ເພື່ອປະຕິບັດຕາມຄໍາສັ່ງຂອງຂັ້ນເທິງວາງອອກໃນໄລຍະການແຜ່ລະບາດຂອງພະ ຍາດໂຄວິດ-19 ພະແນກອຸດສາຫະກໍາ ແລະການຄ້າແຂວງໄດ້ມີການແຕ່ງຕັ້ງ ແລະມອບໝາຍໜ້າທີ່ໃຫ້ບັນດາຂະແໜງ ການປະສານສົມທົບກັບຂະແໜງການກ່ຽວຂ້ອງລົງຕິດຕາມກວດກາສິນຄ້າອຸປະໂພກ-ບໍລິໂພກຢູ່ຕາມທ້ອງຕະຫຼາດແຫ່ງຕ່າງໆ ເພື່ອບໍ່ໃຫ້ພໍ່ຄ້າຊາວຂາຍສວຍໂອກາດກັກຕຸນ ແລະຂຶ້ນລາຄາສິນຄ້າໃນໄລຍະການແຜ່ລະບາດຂອງພະຍາດໂຄວິດ-19.

ທ່ານ ສຸກສາຍຍັນ ແກ້ວວົງສາ ຮອງຫົວໜ້າຂະແໜງການຄ້າພາຍໃນ ພະແນກອຸດສາຫະກໍາ ແລະການຄ້າແຂວງເຊກອງໄດ້ຖະແຫຼງຂ່າວໃຫ້ຮູ້ວ່າ: ນັບແຕ່ມີການລະບາດຂອງພະຍາດໂຄວິດ-19 ໃນຮອບທີ II ຂະແໜງການຄ້າພາຍໃນໄດ້ເປັນເຈົ້າການປະສານສົມທົບກັບຂະແໜງການກ່ຽວຂ້ອງຂັ້ນແຂວງ, ຫ້ອງການອຸດສາຫະກໍາ ແລະການຄ້າເມືອງລົງຕິດຕາມກວດກາສະພາບການຄ້າຂາຍຢ່າງເປັນປົກກະຕິໃນແຕ່ລະວັນ ເຊິ່ງຜ່ານການລົງກວດກາຕົວຈິງເຫັນວ່າ: ສະພາບ ລວມຂອງສິນຄ້າຢູ່ພາຍໃນຕະຫຼາດເທສະບານແຂວງ ແລະບັນດາເມືອງ ແມ່ນບໍ່ທັນພົບເຫັນການສວຍໂອກາດຂຶ້ນລາຄາ ຫຼື ກັກຕຸນ ເພື່ອກໍາໄລເທື່ອ; ຂະນະທີ່ການສະໜອງສິນຄ້າໃນທ້ອງຕະຫຼາດ ກໍຍັງພຽງພໍກັບຄວາມຕ້ອງການ ໂດຍສະເພາະແມ່ນສິນຄ້າປະເພດສະບຽງອາຫານເປັນຕົ້ນເຂົ້າສານໜຽວ 9.000 ກີບຕໍ່ກິໂລ, ເຂົ້າສານຈ້າວ 10.000 ກັບຕໍ່ກິໂລ, ຊີ້ນງົວ-ຄວາຍປະເພດ I ລາຄາ 70.000 ກີບຕໍ່ກິໂລ, ປະເພດ II ລາຄາ 65.000 ກີບຕໍ່ກິໂລ, ຊີ້ນໝູປະເພດ I ລາຄາ 45.000 ກີບຕໍ່ກິໂລ, ປາກະຊັງ 26.000-28.000 ກີບຕໍ່ກິໂລ ແລະສິນຄ້າອຸປະໂພກ-ບໍລິໂພກອື່ນໆກໍຂາຍຕາມລາຄາທ້ອງຕະຫຼາດ.

ທ່ານ ສຸກສາຍຍັນ ແກ້ວວົງສາ ຍັງໄດ້ຮຽກຮ້ອງມາຍັງພໍ່ຄ້າຊາວຂາຍ ກໍຄືຜູ້ປະກອບການທຸລະກິດຄ້າຂາຍຢູ່ບັນດາຫ້າງຮ້ານ ແລະຕະຫຼາດທຸກແຫ່ງຢູ່ພາຍໃນແຂວງເຊກອງ ຫ້າມເດັດຂາດບໍ່ໃຫ້ສວຍໂອກາດຂຶ້ນລາຄາສິນຄ້າ ເພື່ອບໍ່ໃຫ້ເອົາປຽບຜູ້ບໍລິໂພກ, ຫາກກວດເຫັນຜູ້ໃດລະເມີດແມ່ນຈະຖືກກ່າວເຕືອນ ແລະປະຕິບັດມາດຕະການປັບໃໝ່ຕາມລະບຽບກົດໝາຍ ແລະຂໍໃຫ້ທຸກຄົນເປັນເຈົ້າການປະຕິບັດຄໍາສັ່ງ, ແຈ້ງການ ແລະມາດຕະການຕ່າງໆທີ່ຂັ້ນເທິງວາງອອກຢ່າງເຂັ້ມງວດ ເພື່ອປ້ອງກັນ, ຄວບຄຸມ, ສະກັດກັ້ນ ແລະແກ້ໄຂການລະບາດຂອງພະຍາດໂຄວິດ-19.