ມີເດຍລາວແຂວງເຊກອງ (ຂ່າວ: ສັນຍາ; ພາບ: ແວວຕາ) ໃນວັນທີ 29 ເມສາ 2021 ທີ່ຫ້ອງວ່າການແຂວງເຊກອງ ໄດ້ມີພິທີມອບ-ຮັບເງິນ ແລະເຄື່ອງຊ່ວຍເຫຼືອຈາກພາກສ່ວນຕ່າງໆໃຫ້ແກ່ອົງການປົກຄອງແຂວງເຊກອງລວມມູນຄ່າທັງໝົດ 165,5 ລ້ານກີບ ເພື່ອນຳໃຊ້ເຂົ້າໃນການຕ້ານ ແລະສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ຢູ່ແຂວງເຊກອງ.ເຊິ່ງກ່າວເຄື່ອງຊ່ວຍເຫຼືອຄັ້ງນີ້ ຮັບໂດຍແມ່ນທ່ານ ເຫຼັກໄຫຼ ສີວິໄລ ເຈົ້າແຂວງໆເຊກອງ, ຫົວໜ້າຄະນະຊີ້ນໍາຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ; ພ້ອມນີ້ ກໍມີທ່ານຮອງເຈົ້າແຂວງ, ຫົວໜ້າ-ຮອງພະແນກ, ຄະນະສະເພາະກິດ ແລະວິຊາການກ່ຽວຂ້ອງເຂົ້າຮ່ວມ.

ການຊ່ວຍເຫຼືອໃນຄັ້ງນີ້ ປະກອບມີ 4 ພາກສ່ວນຄື: ບໍລິສັດວັງຕັດຂຸດຄົ້ນບໍ່ແຮ່; ບໍລິສັດຈະເລີນເຊກອງກໍ່ສ້າງມອບເງິນຈໍານວນ 50 ລ້ານກີບ; ບໍລິສັດວິລາການຄ້າຂາອອກ-ຂາເຂົ້າຈໍາກັດຜູ້ດຽວມອບມີ່ໄວໆ 500 ແກັດມູນຄ່າ 12,5 ລ້ານກີບ ແລະສະມາຄົມຫວຽດນາມປະຈໍາແຂວງເຊກອງມອບຜ້າອັດປາກ-ດັງ 3 ແກັດມູນຄ່າ 3 ລ້ານກີບ.
ໂອກາດດັ່ງກ່າວ, ທ່ານເຈົ້າແຂວງໆເຊກອງ ໄດ້ສະແດງຄວາມຂອບໃຈ ແລະຊົມເຊີຍຕໍ່ບັນດາພາກສ່ວນທີ່ໄດ້ມອບເງິນ ແລະອຸປະກອບຕ່າງໆຊ່ວຍເຫຼືອ ເພື່ອນໍາໃຊ້ເຂົ້າໃນວຽກງານປ້ອງກັນ, ສະກັດກັ້ນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ໃນຄັ້ງນີ້, ພ້ອມທັງ ສັນຍາວ່າ ຈະນໍາໃຊ້ເງິນ ແລະອຸປະກອນທີ່ໄດ້ຮັບການຊ່ວຍເຫຼືອດັ່ງກ່າວ ໃຫ້ຖືກກັບເປົ້າໝາຍ ແລະເກີດປະໂຫຍດສູງສຸດ.

ໃນໂອກາດນີ້, ທ່ານເຈົ້າແຂວງເຊກອງ ຍັງໄດ້ຮຽກຮ້ອງມາຍັງທຸກພາກສ່ວນໃນສັງຄົມເພີ່ມທະວີຄວາມເປັນຈິດໜຶ່ງໃຈດຽວກັນຮ່ວມກັບພັກ-ລັດຖະບານ ກໍຄືອົງການປົກຄອງແຂວງເຊກອງໃນການເປັນເຈົ້າການປະຕິບັດບັນດາມາດຕະການປ້ອງກັນ, ສະກັດກັ້ນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ຢ່າງເຂັ້ມງວດ ໂດຍເລີ່ມຈາກຄວາມເປັນເຈົ້າການຂອງຕົນເອງ, ຄອບຄົວ, ຊຸມຊົນ ແລະການຈັດຕັ້ງທຸກຂັ້ນ ເພື່ອປະກອບສ່ວນເຮັດໃຫ້ສາມາດຄວບຄຸມການແຜ່ລະບາດຂອງພະຍາດໂຄວິດ-19 ຄັ້ງນີ້ ໄດ້ໂດຍໄວ