ມີເດຍລາວແຂວງສາລະວັນ ຂ່າວພາບ: ວິໄລວອນ ສິດທິໄຊ ເພື່ອເປັນການປະກອບສ່ວນເຂົ້າໃນວຽກງານສະກັດກັ້ນ, ຄວບຄຸ້ມ,ແລະແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ຢູ່ແຂວງສາລະວັນ. ມາໃນວັນທີ 17 ມິຖຸນາ 2021. ແຂວງເທື່ອທຽນເຫວ້ ສສ ຫວຽດນາມ ໄດ້ປະກອບສ່ວນເຄື່ອງຊ່ວຍເຫຼືອ ປະເພດອຸປະກອນການແພດ ໃຫ້ກັບອົງການປົກຄອງແຂວງສາລະວັນ ເຊິ່ງປະກອບມີຄື: ຊຸດແພດ PPE ປະກອບມີ: ໂສ້ງ, ເສື້ອ, ໝວກ, ຜ້າອັດປາກ-ດັງ, ແວ່ນຕາ ແລະຖົງມື ຈຳນວນ 2.000 ຊຸດ, ຜ້າອັດປາກ-ອັດດັງ ຈຳນວນ 2.000 ກັບ, ເຄື່ອງວັດແທດອຸນຫະພູມແບບສຳຜັດ 50 ເຄື່ອງ, ຖົງມືການແພດ 2.000 ຄູ່ ແລະ ນ້ຳຢາລ້າງມືປະເພດແຫ້ງ ຈຳນວນ 2.000 ຂວດ ລວມເປັນມູນຄ່າ 500 ລ້ານດົ້ງ ແລະ ມອບໃຫ້ແຂວງເຊກອງ ລວມມູນຄ່າ 300 ລ້ານດົ້ງ.

ໃນໂອກາດນີ້, ທັງສອງຝ່າຍ ກໍ່ໄດ້ຜັດປ່ຽນກັນລາຍງານສະພາບການແຜ່ລະບາດຂອງພະຍາດໂຄວິດ-19 ພາຍໃນປະເທດ ແລະ ແຂວງຂອງຕົນ, ພ້ອມທັງໄດ້ຕີລາຄາສູງເຖີງສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການມືຮ່ວມມືຮອບດ້ານ ບໍ່ວ່າທາງດ້ານເສດຖະກິດ, ວັດທະນະທໍາ-ສັງຄົມ ລະຫວ່າງ ສປປ ລາວ ແລະ ສສ.ຫວຽດນາມ ກໍ່ຄືແຂວງສາລະວັນ ກັບ ແຂວງເທື່ອທຽນເຫວ້ ທີ່ໄດ້ໃຫ້ການຊ່ວຍເຫຼືອເຊີ່ງກັນ ແລະ ກັນ ຕະຫຼອດມາ, ທັງໄດ້ເອົາໃຈໃສ່ໃນການຕິດຕາມ, ກວດກາ ຕາມຂອບເຂດຊາຍແດນ ເຮັດໃຫ້ການຈັດຕັ້ງປະຕິບັດມາດຕະການປ້ອງກັນພະຍາດໂຄວິດ-19 ຂອງແຂວງສາລະວັນ ແລະ ແຂວງເທື່ອທຽນເຫວ້ ເຂັ້ມງວດ ແລະ ມີປະສິດທິຜົນ. ເຊີ່ງສະແດງໃຫ້ເຫັນເຖິງຄວາມເປັນຫ່ວງເປັນໄຍ, ເປັນການເສີມຂະຫຍາຍມູນເຊື້ອຮ່ວມມືສາມັກຄີແບບພິເສດ ລະຫ່ວາງ 2 ຊາດ ລາວ-ຫວຽດນາມ ໃຫ້ນັບແໜ້ນແຟ້ນຍິ່ງຂື້ນ.

ພິທີມອບ-ຮັບ ເຄື່ອງຊ່ວຍເຫຼືອໃຫ້ 2 ແຂວງໃນຄັ້ງນີ້ ຈັດຂຶ້ນຢູ່ທີ່ດ່ານຊາຍແດນສາກົນລະໄລ ເມືອງສະໝ້ວຍ, ມອບໂດຍ ທ່ານ ຫງວຽນ ແທັງ ບິ່ງ ຮອງປະທານຄະນະກຳມະການ ປະຊາຊົນແຂວງເທື່ອທຽນເຫວ້ ສສ.ຫວຽດນາມ, ຮັບໂດຍທ່ານ ສົມໃຈ ອຸ່ນຈິດ ຮອງເຈົ້າແຂວງໆສາລະວັນ ຫົວໜ້າຄະນະສະເພາະກິດໂຄວິດ-19 ແຂວງສາລະວັນ, ທ່ານ ນາງ ບຸນຮຽງ ບຸນຈິດ ປະທານແນວລາວສ້າງຊາດແຂວງເຊກອງ ພ້ວມດ້ວຍຄະນະແຕ່ລະຝ່າຍ ເຂົ້າຮ່ວມເປັນສັກຂີພິຍານ.