ມີເດຍລາວແຂວງໄຊສົມບູນ ຂ່າວ: ສີລິພອນ ສົງຄຳ
ກອງປະຊຸມສະຫຼຸບວຽກງານກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ທົ່ວແຂວງໄຊສົມບູນ ປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2021 ຈັດຂຶ້ນໃນຕອນເຊົ້າຂອງວັນທີ 9 ມິຖຸນາ 2021 ທີ່ສະໂມສອນເມືອງອະນຸວົງ. ພາຍໃຕ້ການເປັນປະທານຂອງ ສະຫາຍ ພົຕ ຄຳລຽງ ອຸທະໄກສອນ, ກຳມະການສູນກາງພັກ, ເລຂາພັກແຂວງ ເຈົ້າແຂວງໄຊສົມບູນ, ມີຄະນະປະຈຳພັກແຂວງ, ກຳມະການພັກແຂວງ ພ້ອມດ້ວຍເລຂາ-ຮອງເລຂາ ຄະນະພັກຮາກຖານ, ເລຂາໜ່ວຍພັກພະແນກອ້ອມຂ້າງແຂວງເຂົ້າຮ່ວມ.

ໃນກອງປະຊຸມໄດ້ຮັບຟັງການຜ່ານບົດສະຫຼູບວຽກງານກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ທົ່ວແຂວງ ປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2021 ຈາກຄະນະຈັດຕັ້ງແຂວງ ພ້ອມທັງຮັບຟັງການຜ່ານຄຳແນະນຳເພີ່ມເຕີມ ຂອງຄະນະປະຈຳພັກແຂວງ ກ່ຽວກັບການຈັດຕັ້ງປະຕິບັດ ຄຳສັ່ງຂອງກົມການເມືອງສູນກາງພັກ ແລະ ຄຳແນະນຳ ຂອງຄະນະຈັດຕັ້ງສູນກາງພັກ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ຈາກສະຫາຍ ທອງວັນ ທຳມະວົງ, ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງ. ພ້ອມດຽວກັນນີ້ ຜູ້ເຂົ້າຮ່ວມກອງປະຊຸມໄດ້ຜັດປ່ຽນກັນປະກອບຄຳຄິດເຫັນໃສ່ບົດສະຫລຸບ-ທິດທາງແຜນການ ແລະ ມີຄຳເຫັນຕໍ່ຄຳແນະນຳຕື່ມອີກ. ເພື່ອເຮັດໃຫ້ມີຄວາມເຂົ້າໃຈ ແລະ ຖືກຕ້ອງ ໃນການນຳໄປຈັດຕັ້ງປະຕິບັດໃຫ້ບັນລຸຕາມຄາດໝາຍ, ທັງເປັນການປຶກສາຫາລື, ຖອດຖອນບົດຮຽນວຽກງານກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ, ເພື່ອຕີລາຄາຈຸດດີ-ຈຸດອ່ອນ ໃນການຈັດຕັ້ງປະຕິບັດໄລຍະທີ່ຜ່ານມາ, ພ້ອມທັງວາງທິດທາງແຜນການຈັດຕັ້ງປະຕິບັດ ໃຫ້ສຳເລັດໃນການສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ທົ່ວແຂວງໄຊສົມບູນ.

ໃນໂອກາດນີ້ ສະຫາຍ ເລຂາພັກແຂວງ ໄດ້ມີຄຳເຫັນໂອ້ລົມຕໍ່ກອງປະຊຸມ ຊຶ່ງສະຫາຍໄດ້ເນັ້ນໜັກໃຫ້ບັນດາ ຄະນະພັກຮາກຖານ, ໜ່ວຍພັກພະແນກການອ້ອມຂ້າງແຂວງ ຈົ່ງພ້ອມກັນຈັດຕັ້ງຜັນຂະຫຍາຍມະຕິຂອງແຂວງ, ເຮັດໃຫ້ເປັນຂະບວນການ, ມີໜໍ່ແໜງ, ມີການເຄື່ອນໄຫວ-ຊີ້ນຳຢ່າງຈິງຈັງ ຈາກຄະນະພັກ, ຍັງມີບາງດ້ານຍັງຕ້ອງຖອດຖອນບົດຮຽນ, ຄວາມຮູ້-ຄວາມເຂົ້າໃຈ, ດັດປັບທາງດ້ານແນວຄິດ, ມາດຕະການແກ້ໄຂໃນການຈັດຕັ້ງປະຕິບັດການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ໃຫ້ໄດ້ປະສິດທິພາບ, ຄຸນທາດການເມືອງໃຫ້ເປັນຂະບວນການຟົດຟື້ນດີຂຶ້ນກວ່າເກົ່າ, ຈັດຕັ້ງຜັນຂະຫຍາຍ, ແຜນຮອງຮັບໃຫ້ສຳເລັດລຸລ່ວງຕາມຄາດໝາຍທີ່ວາງໄວ້.