ວັນທີ 26 ກຸມພາ ນີ້ ທີ່ສະໂມສອນ ຂອງພະແນກສຶກສາທິການ ແລະ ກິລາ ແຂວງໄຊສົມບູນ ໄດ້ຈັດພິທີສອບເສັງນັກຮຽນເກັ່ງ ຂັ້ນຮຽນ ປ 5, ມ 4 ແລະ ມ 7 ປະຈໍາສົກຮຽນ 2019 – 2020 ເພື່ອຄັດເລືອກເອົານັກຮຽນເກັ່ງ ທົ່ວແຂວງຂຶ້ນ ພາຍໃຕ້ການເປັນປະທານ ຂອງທ່ານ ຢົງຢີ ລີເຍ່ຍວື, ຫົວໜ້າພະແນກສຶກສາທິການ ແລະ ກິລາ ແຂວງ, ມີຜູ້ບໍລິຫານການສຶກສາ ແລະ ກີລາ, ຄູນໍາພາ ແລະ ນ້ອງນັກຮຽນເກັ່ງ ທັງ 5 ເມືອງ ທົ່ວແຂວງເຂົ້າຮ່ວມ.

ໃນພິທີ ທ່ານ ຢົງຢີ ລີເຍ່ຍວື, ຫົວໜ້າພະແນກສຶກສາທິການ ແລະ ກິລາ ແຂວງ ໄດ້ກ່າວວ່າ: ພິທີສອບເສັງນັກຮຽນເກັ່ງໃນຄັ້ງນີ້ ແມ່ນມີຄວາມໝາຍສໍາຄັນເປັນຢ່າງຍິ່ງ ເພາະເປັນການສົ່ງເສີມການຍົກລະດັບຄຸນນະພາບການສຶກສາ, ເປັນການຄັດເລືອກເອົານັກຮຽນ ທີ່ຮຽນເກັ່ງແຕ່ລະວິຊາຂອງຊັ້ນປະຖົມສຶກສາ ປ 5, ມັດທະຍົມສຶກສາຕອນຕົ້ນ ມ 4 ແລະ ຕອນປາຍ ມ 7 ວິຊາລະ 1 ນ້ອງ ເພື່ອເປັນຕົວແທນຂອງແຂວງ ໄປສອບເສັງນັກຮຽນເກັ່ງລະດັບຊາດ ທີ່ກະຊວງສຶກສາທິການ ແລະ ກິລາ ຈັດຂຶ້ນຢູ່ມະຫາວິທະຍາໄລແຫ່ງຊາດລາວ ທີ່ຈະຈັດຂຶ້ນກາງເດືອນມີນາ ທີ່ຈະມາເຖິງນີ້. ພ້ອມນີ້ ທ່ານຍັງໄດ້ເນັ້ນໜັກໃຫ້ນັກສອບເສັງທັງໝົດ ຈົ່ງພ້ອມກັນປະຕິບັດກົດລະບຽບຂອງການສອບເສັງໃຫ້ເຂັ້ມງວດ ແລະ ເອົາໃຈໃສ່ຄົ້ນຄວ້າບົດສອບເສັງໃຫ້ເລິກເຊິ່ງ ສົມກັບຄວາມໄວ້ເນື້ອເຊື່ອໃຈທີ່ເປັນຕົວແທນຂອງນັກຮຽນເກັ່ງແຕ່ລະເມືອງ, ແຕ່ລະໂຮງຮຽນຢ່າງແທ້ຈິງ; ໃຫ້ຄະນະຮັບຜິດຊອບການສອບເສັງ ໂດຍສະເພາະແມ່ນກໍາມະການເຝົ້າຫ້ອງ, ກໍາມະການກວດກາບົດ ແລະ ກອງເລຂາ ຈົ່ງພ້ອມກັນເອົາໃຈໃສ່ປະຕິບັດຕາມກົດລະບຽບຂອງການສອບເສັງໃຫ້ເຂັ້ມງວດ, ມີຄວາມສັດຊື່ບໍລິສຸດ, ມີຄວາມໂປ່ງໃສ, ຍຸຕິທໍາ ແລະ ສາມາດກວດສອບໄດ້. ການສອບເສັງ ຄັ້ງນີ້ ມີນ້ອງນັກຮຽນເກັ່ງເຂົ້າຮ່ວມສອບເສັງທັງໝົດ 137 ຄົນ, ຍິງ 43 ຄົນ, ໃນນີ້ ຊັ້ນປະຖົມສຶກສາ ປ5 ມີ 16 ຄົນ, ຍິງ 12 ຄົນ ແລະ ມີ 03 ວິຊາສອບເສັງ; ຊັ້ນມັດທະຍົມຕອນຕົ້ນ ມ4 ມີ 27 ຄົນ, ຍິງ 9 ຄົນ ແລະ ຊັ້ນມັດທະຍົມຕອນປາຍ ມ7 ມີ 74 ຄົນ, ຍິງ 22 ຄົນ ແລະ ມີ 4 ວິຊາສອບເສັງ.

MediaLaos xaysomboun
ຂ່າວ: ຈໍນີ່ທ່າວ ເຍ່ຍຕູ້
ພາບ: ຟອງ ນໍນິນທາ