ມີເດຍລາວແຂວງໄຊສົມບູນ ຂ່າວ: ພຸດທະສອນ ເວດສະວົງ
ພິທີສະເຫຼີມສະຫຼອງວັນແພດລາວ ວັນທີ 18 ມີຖຸນາ 1965-18 ມິຖຸນາ 2021 ຄົບຮອບ 56 ປີ ປີ ເປີດຂະບວນ ການສັກວັກຊິນ ຮອບທີ 3 ຢູ່ແຂວງໄຊສົມບູນ ໄດ້ຈັດຂຶ້ນໃນວັນທີ 25 ມີຖຸນາ ນີ້ ທີ່ສະໂມສອນເມືອງອະນຸວົງ ໂດຍການເຂົ້າ ຮ່ວມຂອງທ່ານ ພອຍຄຳ ຮຸ່ງບຸນຍວງ ຮອງເລຂາພັກແຂວງ, ມີທ່ານ ດຣ ລີເຢີ ໄຊຍະຊ່າງ ຫົວໜ້າພະແນກສາທາລະນະສຸກ ແຂວງ, ມີພະແນກການອ້ອມຂ້າງແຂວງ ພ້ອມດ້ວຍພະນັກງານແພດໝໍ ແລະ ພະນັກງານຈາກແນກສາທາລະນະສຸກແຂວງ ເຂົ້າຮ່ວມ.

ໂອກາດນີ້ ທ່ານ ພອຍຄຳ ຮຸ່ງບູນຍວງ ໄດ້ຫວນຄືນມູນເຊື້ອ ປະຫວັດຄວາມເປັນມາຂອງວັນແພດລາວ ຊຶ່ງໄດ້ກຳເນີດຂຶ້ນຜ່ານ ຂະບວນວິວັດ ແຫ່ງການເຕີບໃຫຍ່ຂອງການແພດລາວ ໃນແຕ່ລະສະໄໝ ແຕ່ດຶກດຳບັນ ແລະ ຕິດພັນກັບການຕໍ່ສູ້ກູ້ຊາດ ຂອງ ຊາດລາວເຮົາແຕ່ລະໄລຍະ ໃນປີ 1963 ສະໜາມຮົບຕໍ່ສູ້ກູ້ຊາດ ຕ້ານພວກລ່າເມືອງຂຶ້ນແບບໃໝ່ ໄດ້ເປີດກວ້າງອອກທົ່ວປະເທດ, ເຂດປົດປ່ອຍກໍ່ນັບມື້ນັບຂະຫຍາຍຕົວ ແລະ ເປີດກວ້າງ ແພດໝໍລາວໄລຍະນັ້ນ ກໍໄດ້ພ້ອມກັນເຮັດໜ້າທີ່ ຂອງຕົນໃນ ການຮັກສາ, ປິ່ນປົວພະຍາດ ແລະ ບາດແຜສົງຄາມ ໃຫ້ແກ່ພະນັກງານນັກຮົບ ແລະ ປະຊາຊົນຢ່າງບໍ່ຮູ້ອິດຮູ້ເມື່ອຍ ຕໍ່ມາສູນ ກາງພັກໄດ້ມີນະໂຍບາຍ ສ້າງເຂດປົດປ່ອຍໃຫ້ເປັນລັດໜຶ່ງ ສູນກາງພັກ ແລະ ແນວລາວຮັກຊາດ ຈຶ່ງໄດ້ຕົກລົງແຍກຂະແໜງ ສາທາລະນະສຸກ ອອກເປັນ 2 ການຈັດຕັ້ງຄື : ເສນາຮັກເພື່ອຮັບໃຊ້ກອງທັບ ແລະ ສາທາລະນະສຸກສູນກາງ ເພື່ອຮັບໃຊ້ພົນລະ ເຮືອນ. ທ່ານ ປະທານໄກສອນພົມວິຫານຜູ້ນຳທີ່ແສນເຄົາລົບຮັກ ໄດ້ກ່າວຕອນທ້າຍຂອງກອງປະຊຸມ ສາທາລະນະສຸກທົ່ວ ປະ ເທດ ວ່າ: ຈະສະເໜີເລຂາທິການສູນກາງພັກ ແລະ ສະພາລັດຖະມົນຕີ ເລືອກເອົາມື້ໃດ ມື້ ໜຶ່ງ ທີ່ມີຄວາມໝາຍປະຫວັດສາດ ເປັນວັນແພດລາວ ດັ່ງນັ້ນ ກະຊວງສາທາລະນະສຸກ ຈຶ່ງໄດ້ນຳສະເໜີຕໍ່ສະພາແຫ່ງງຊາດ ແລະ ໄດ້ຮັບການເຫັນດີໃຫ້ບັນຈຸເຂົ້າ ໃນກົດໝາຍປິ່ນປົວ ແລ້ວກຳນົດເອົາວັນທີ 18 ມິຖຸນາ ເປັນວັນແພດລາວ.

ວັນແພດລາວແມ່ນວັນໜຶ່ງທີ່ເປັນປະຫວັດສາດອັນລ້ຳຄ່າ ຂອງຂະແໜງການສາທາລະນະສຸກ ເປັນວັນສ້າງຂະບວນ ການ, ກິດຈະກຳຕ່າງໆ ເພື່ອລະນຶກເຖິງຜົນງານ ແລະ ສັນລະເສີນຄຸນງາມຄວາມດີຂອງແພດລາວ ໃນສະໄໝຕໍ່ສູ້ກູ້ຊາດ ກໍ່ຄື ສະໄໝປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອເປັນການປູກຈິດສຳນຶກຂອງແພດໝໍ ແລະ ພະນັກງານສາທາລະ ນະສຸກລາວ ຮູ້ສືບທອດຮຽນເອົາແບບຢ່າງອັນດີງາມຂອງແພດໝໍ ແລະ ພະນັກງານສາທາລະນະສຸກຮຸ່ນກ່ອນ, ອອກແຮງຝຶກ ຝົນສ້າງຕົນເອງໃຫ້ພຽບພ້ອມໄປດ້ວຍຄຸນສົມບັດສິນທຳປະຕິວັດ, ຈັນຍາທຳວິຊາຊີບ ແລະ ຄວາມຊຳນານດ້ານວິຊາສະເພາະ ເພື່ອໃຫ້ກາຍເປັນແພດແຫ່ງຊາດ ແລະ ແພດປະຊາຊົນ ຢ່າງສົມກຽດສັກສີວ່າ ເປັນນັກຮົບເສື້ອຂາວປະຕິວັດຂອງພັກ. ໃນພິທີ ຍັງໄດ້ຖືເອົາໂອກາດນີ້ ມອບຂອງຂວັນໃຫ້ພະນັກງານບຳນານ ທີ່ມີຜົນງານໃນການປະຕິບັດໜ້າໃນໄລຍະຜ່ານມາ ຕື່ມອີກ.

ຈາກນັ້ນ ທ່ານ ດຣ ລີເຢີ ໄຊຍະຊ້າງ ໄດ້ກ່າວເປີດຂະບວນການໃຫ້ວັກຊິນໂຄວິດ 19 ຮອບທີ 3 ຊຶ່ງໃນຮອບນີ້ ແມ່ນໄດ້ຮັບວັກ ຊິນ ຈາກສູນກາງທັງໝົດ ຈຳນວນ 4000 ໂດສ, ໃນນີ້ ໃຫ້ຂະແໜງສາທາລະນະສຸກແຂວງ ຈຳນວນ 2000 ໂດສ, ແບ່ງໃຫ້ ເສນາຮັກ ຈຳນວນ 1000 ໂດສ ແລະ ໂຮງໝໍ ຈ 101 ຈຳນວນ 1000 ໂດສ ພ້ອມນີ້ ທ່ານ ຍັງໄດ້ຮຽກຮ້ອງໃຫ້ພະນັກງານ, ທະຫານ, ຕຳຫລວດ ແລະ ປະຊາຊົນບັນດາເຜົ່າ ທີ່ຍັງບໍ່ທັນໄດ້ສັກວັກຊິນ ແລະ ຜູ້ທີໄດ້ສັກວັກຊິນເຂັມ 1 ແລ້ວ ກໍໃຫ້ພ້ອມ ກັນສືບຕໍ່ມາສັກຕາມຈຸດຕ່າງໆ ທີ່ໄດ້ກຳນົດໄວ້ນັ້ນ ໃຫ້ຄົບ 2 ເຂັມ ເພື່ອສ້າງພູມຄຸ້ມກັນໃຫ້ແກ່ຮ່າງກາຍ ເພື່ອປ້ອງກັນຕົນ ໃຫ້ຫລຸດພົ້ນຄວາມສ່ຽງຈາກພະຍາດດັ່ງກ່າວ ໃນມື້ນີ້ ເຫັນວ່າມີມວນຊົນເຂົ້າຮ່ວມຢ່າງຫຼວງຫຼາຍ ແລະ ເປັນຂະບວນການ ຟົດຟື້ນ.