ມີເດຍລາວແຂວງອັດຕະປື ຂ່າວ: ວັດທະນາ
ແຂວງອັດຕະປື ກຳນົດເອົາ ວັນທີ 6 ກັນຍາ 2021 ເປັນມື້ເປີດສົກຮຽນໃໝ່ ສົກຮຽນ 2021-2022ໃນສາຍສາມັນສຶກສາທົ່ວແຂວງ ຍົກເວັ້ນ 1 ໂຮງຮຽນຄື: ໂຮງຮຽນ ປະຖົມ ເຊກອງ,ເມືອງ ສາມັກຄີໄຊ,ທີ່ຍັງບໍ່ທັນສາມາດເປີດໃຫ້ມີການຮຽນ-ການສອນໄດ້ ຍ້ອນວ່າ ໂຮງຮຽນດັ່ງກ່າວ ຄະນະສະເພາະກິດຂັ້ນແຂວງ ໄດ້ກໍານົດເອົາເປັນສູນກັກກັນ ຊົ່ວຄາວ ເພື່ອກັ່ນກອງທີ່ເດີນທາງມາຈາກຕ່າງແຂວງ ແລະ ຕ່າງປະເທດ,ຄາດວ່າ ວັນທີ 15 ກັນຍາ 2021 ຄະນະສະເພາະກິດຂັ້ນແຂວງຈະໄດ້ຍ້າຍສູນກັກກັນຈາກ ໂຮງຮຽນປະຖົມເຊກອງ ໄປສະຖານທີ່ອື່ນ ທີ່ມີຄວາມເໝາະສົມກວ່າ ແລ້ວຈິ່ງຈະໄດ້ເປີດການຮຽນ-ການສອນ.

ທ່ານ ອຸດົມສິນ ສີຊານົນ ຫົວໜ້າພະແນກສຶກສາທິການ ແລະ ກິລາ ແຂວງອັດຕະປື ໄດ້ໃຫ້ສຳພາດຕໍ່ສື່ມວນຊົນແຂວງເມື່ອວັນທີ 6 ກັນຍາ 2021 ນີິິ້ວ່າ: ປັດຈຸບັນນີ້ ແຂວງ ອັດຕະປື ແມ່ນມີຄວາມພ້ອມການເປີດສົກຮຽນໃໝ່ໃນສາຍສາມັນສຶກສາທົ່ວແຂວງ ປະຈຳສົກຮຽນ 2021-2022 ແລະ ພ້ອມດໍາເນີນການຮຽນ-ການສອນ ເອກະພາບທົ່ວແຂວງ,ໂດຍກຳນົດເອົາ ວັນທີ 6 ກັນຍາ 2021 ເປັນມື້ເປີດສົກຮຽນໃໝ່,ໂດຍອິງຕາມຄໍາສັ່ງແນະນໍາ ຂອງກົມສາມັນສຶກສາ,ກະຊວງສຶກສາທິການ ແລະ ກິລາ ໃນການເປີດ ແລະ ດໍາເນີນສົກຮຽນ 2021-2022 ແລະ ອິງຕາມການ ແຈ້ງການຂອງລັດຖະບານ,ແຈ້ງການຂອງຄະນະສະເພາະກິດຂັ້ນກະຊວງສຶກສາ ແລະ ແຈ້ງການຂອງຄະນະສະເພາະກິດຂັ້ນແຂວງ ໃນການສະກັດກັ້ນ ແລະ ຕ້ານການແຜ່ລະບາດຂອງເຊື້ອພະຍາດໂຄວິດ-19 ກໍ່ຄືມາດຕະການຜ່ອນຜັນ ທີ່ຄະນະສະເພາະກິດຂອງແຂວງວາງອອກ.

ເພື່ອເຮັດໃຫ້ການຮຽນ-ການສອນໃນສາຍສາມັນສຶກສາ ແລະ ວິຊາຊີບໃນສົກຮຽນນີ້ ໃຫ້ມີປະສິດທິພາບ ແລະ ມີຄຸນນະພາບດ້ານການຮຽນ-ການສອນ ຕາມ 3 ລັກສະນະ ແລະ 5 ຫລັກມູນການສຶກສາ ທີ່ກະຊວງສຶກສາທິການ ແລະກິລາ ໄດ້ວາງອອກ,ທາງພະແນກສຶກສາທິການ ແລະ ກິລາແຂວງ ໄດ້ກຽມຄວາມພ້ອມຫລາຍດ້ານໃນເບື້ອງຕົ້ນຄື: ໄດ້ຮ່ວມກັບຮາກຖານການສຶກສາໃນທຸກຂັ້ນ, ມີການປັບປຸງ-ປົວແປງ ອາຄານສະຖານທີ່ ທີ່ມີຄວາມເປ້ເພເສຍຫາຍ ໃຫ້ກັບຄືນມາໃຊ້ໄດ້ຢ່າງເປັນປົກກະຕິ,ພ້ອມນັ້ນ ກໍໄດ້ກະກຽມອຸປະກອນຮັບໃຊ້ການຮຽນ-ການສອນ ທຸກປະເພດ ໃນທຸກຊັ້ນຮຽນ,ໄດ້ຈັດວາງ ແລະ ສັບຊ້ອນການ ປະຈໍາການ ການສິດສອນຂອງຄູ ເເຕ່ລະຊັ້ນ-ແຕ່ລະສາຍ ເເມ່ນໃຫ້ມີຄວາມພຽງພໍ ໂດຍພື້ນຖານ ແລະ ມີຄວາມເໝາະສົມ ເພື່ອໃຫ້ສາມາດຈັດການຮຽນ-ການສອນໄດ້ທຸກແຫ່ງ,ຄຽງຄູ່ກັບການປະຕິບັດມາດຕະການຕ້ານ ແລະ ປ້ອງກັນເຊື້ອພະຍາດໂຄວິດ 19.

ທ່ານ ອຸດົມສິນ ສີຊານົນ ຫົວໜ້າພະແນກສຶກສາທິການ ແລະ ກິລາ ແຂວງອັດຕະປື ຍັງໄດ້ຮຽກຮ້ອງມາຍັງ ພໍ່ແມ່ຜູ້ປົກຄອງ, ສົກຮຽນໃໝ່ນີ້ຈົ່ງໄດ້ອໍານວຍຄວາມ ສະດວກໃນການຮັບ-ສົ່ງ ລູກຫຼານຂອງຕົນໃຫ້ໄດ້ເຂົ້າຮັບການສຶກສາໃນຫຼັກສູດການສຶກສາກ່ອນໄວຮຽນໃຫ້ຫຼາຍ,ເພື່ອສ້າງຄວາມພ້ອມດ້ານຄວາມຮູ້,ຄວາມສາມາດ ແລະ ພັດທະນາການດ້ານຕ່າງໆຂອງເດັກກ່ອນເຂົ້າຮຽນຊັ້ນປະຖົມ, ພ້ອມຮຽກຮ້ອງມາຍັງບັນດານ້ອງນັກຮຽນ ໃນເກນໄວອາຍຸ ຊັ້ນຮຽນປະຖົມ ແລະ ມັດທະຍົມສຶກສາ ຈົ່ງໄດ້ເອົາໃຈໃສ່ຜ່ານຜ່າຄວາມຫຍຸ້ງຍາກນາໆປະການໃນການຮຽນ ໃຫ້ຈົບຊັ້ນປະຖົມ ແລະ ຊັ້ນມັດທະຍົມ ແລະ ພ້ອມກັນເອົາໃຈໃສ່ປະຕິບັດມາດຕະການປ້ອງກັນການລະບາດຂອງພະຍາດໂຄວິດ 19 ຢ່າງເຂັ້ມງວດ .