ມີເດຍລາວແຂວງໄຊຍະບູລີ ຂ່າວ-ພາບ: ອຸ່ນເຮືອນ ໂພທິລັກ. ເພື່ອເປັນການສ້ອມບໍາລຸງໂຮງໄຟຟ້າຫົງສາ ປະຈໍາປີ 2021, ການຈັດຕັ້ງປະຕິບັດບັນດາມາດຕະການປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ ໂຄວິດ-19 ທີ່ ສປປລາວ ກໍ່ຄືແຂວງ ໄຊຍະບູລີ ໄດ້ວາງອອກໃຫ້ເຂັ້ມງວດ, ແລະ ເພື່ອເປັນການລະດົມຄົນງານ ແລະ ຊ່ຽວຊານຈາກ ຣາຊະອານາ ຈັກໄທ ເຂົ້າມາສ້ອມບໍາລຸງໂຮງໄຟຟ້າດັ່ງກ່າວ, ໃນຕອນບ່າຍຂອງວັນທີ 24 ມິຖຸນາ ປີນີ້, ທີ່ຫ້ອງປະຊຸມ ບໍລິສັດໄຟຟ້າ ຫົງສາ ຈໍາກັດ, ໄດ້ຈັດກອງປະຊຸມ ປຶກສາຫາລື ກ່ຽວກັບການກະກຽມເອົາຄົນງານເຂົ້າມາງານສ້ອມບໍາລຸງໂຮງໄຟຟ້າຫົງສາຂຶ້ນ, ເຂົ້າຮ່ວມເປັນກຽດມີ ທ່ານ ເພັດພິໄຊ ສູນວິໄລ ຮອງເຈົ້າແຂວງ, ຫົວໜ້າຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ ໂຄວິດ-19 ຂັ້ນແຂວງ, ມີທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ບໍລິສັດ ໄຟຟ້າຫົງສາ ຈໍາກັດ, ມີບັນດາທ່ານໃນຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ ໂຄວິດ-19 ຂັ້ນແຂວງ, ເມືອງ ຫົງສາ, ເມືອງ ເງິນ ແລະ ພະນັກງານວິຊາການຈາກບໍລິສັດເຂົ້າຮ່ວມ.

ໃນກອງປະຊຸມຕາງໜ້າບໍລິສັດ ໄຟຟ້າຫົງສາ ໄດ້ຂຶ້ນລາຍງານກ່ຽວກັບການວາງແຜນທີ່ນໍາເອົາຄົນງານວິຊາການເຂົ້າມາສ້ອມບໍາລຸງໂຮງໄຟຟ້າຄື: ແຜນການນໍາຄົນເຂົ້າ, ການຈັດການລົດຮັບ-ສົ່ງ, ການຈັດການທີ່ພັກອາໄສລະຫວ່າງກັກຕົວຢູ່ໃນລາວ, ການຈັດການອາຫານລະຫວ່າງກັກຕົວ, ມາດຕະການປ້ອງກັນໄວລັດໂຄວິດ-19 ແລະ ມາດຕະການ-ການກັກຕົວ, ການເກັບຕົວຢ່າງ, ສະຖານທີ່ເກັບຕົວຢ່າງ, ການຕິດຕາມຂອງຄະນະສະເພາະກິດຂັ້ນແຂວງ ແລະ ເມືອງ, ສໍາລັບແຜນການທີ່ຈະນໍາເຂົ້າມາສ້ອມບໍາລຸງໂຮງໄຟຟ້າຫົງສາ ແມ່ນມີຈໍານວນ 930 ຄົນ, ໂດຍມີແຜນການນໍາເຂົ້າ 2 ຊຸດຄື: ຊຸດທີ 1 ວັນທີ 28-29 ມິຖຸນາ 2021 ຈະເຂົ້າມາ 194 ຄົນ, ວັນທີ 30 ເຂົ້າມາ 99 ຄົນ ວັນທີ 1 ກໍລະກົດ ເຂົ້າມາ 97 ຄົນ, ວັນທີ 2 ເຂົ້າມາ 91 ຄົນ, ວັນທີ 3 ເຂົ້າມາ 97 ຄົນ, ວັນທີ 4-5 ເຂົ້າມາ 200 ຄົນ, ວັນທີ 6 ເຂົ້າມາ 69 ຄົນ ແລະ ວັນທີ 16 ເຂົ້າມາ 4 ຄົນ, ຊຸດທີ 2 ຈະເຂົ້າມາ ໃນວັນທີ 8 ສິງຫາ 2021 ນີ້ 79 ຄົນ,

ຈາກນັ້ນໃນກອງປະຊຸມກໍ່ໄດ້ປຶກສາຫາລື ແລະ ວາງແຜນຮ່ວມກັນເປັນຕົ້ນແມ່ນ: ມາດຕະການປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ ໂຄວິດ-19 ເຊັ່ນ: ໄດ້ກະກຽມສະຖານທີ່ກັກຕົວ, ສະຖານທີ່ເກັບຕົວຢ່າງ, ໄດ້ຈັດຮອບການເດີນທາງເພື່ອປ້ອງກັນການລວມກຸ່ມທີ່ໜ້າດ່ານ, ຜູ້ທີ່ຈະເຂົ້າມາຕ້ອງໃສ່ຜ້າປິດປາກຕະຫຼອດການເດີນທາງ, ມີການໃຊ້ແຜ່ນພາດສະຕິດກັ້ນລະຫວ່າງຄົນຂັບລົດ ແລະ ຜູ້ໂດຍສານ, ແຕ່ລະຄົນຕ້ອງໄດ້ຜ່ານການກັ່ນກອງ, ກັກຕົວ 14 ວັນ, ເກັບຕົວຢ່າງຊອກຫາເຊື້ອຕາມຂັ້ນຕອນ, ເວລາກັກຕົວແມ່ນບໍ່ໃຫ້ອອກນອກສະຖານທີ່ກັກຕົວເດັດຂາດ ພ້ອມທັງ ບັນທຶກອຸນຫະພູມ ແລະ ຮັກສາໄລຍະຫ່າງຫຼັງຈາກທີ່ເລີ່ມປະຕິບັດວຽກງານ.