ກົມອຸຕຸນິຍົມ ແລະ ອຸທົກກະສາດ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແຈ້ງເຕືອນພາຍຸເຂດຮ້ອນ ສະບັບທີ 2 ໃນເວລາ 9:00 ໂມງຂອງວັນທີ 09 ຕຸລາ 2021 ພາຍຸໝຸນເຂດຮ້ອນ ໄລອອນລອກ (LIONROCK) ມີຈຸດສູນກາງຢູ່ເສັ້ນຂະໜານທີ 19.5 ອົງສາເໜືອ ແລະ ເສັ້ນແວງທີ 109.8 ອົງສາຕາເວັນອອກ ພວມເຄື່ອນທີ່ມາທາງທິດຕາເວັນຕົກສ່ຽງເໜືອຢ່າງຊ້າໆ ຄາດຄະເນວ່າພາຍຸຫົວນີ້ຈະເຄື່ອນຂຶ້ນຝັ່ງທາງພາກເໜືອປະເທດຫວຽດນາມ ໃນໄລຍະວັນທີ 09 ຫາ 10 ຕຸລາ 2021 ຫຼັງຈາກນັ້ນ ຈະອ່ອນກໍາລັງເປັນພາຍຸດີເປລຊັນ ແລະ ເຄື່ອນທີ່ຜ່ານພາກເໜືອ ເມືອງຊໍາໃຕ້, ເມືອງວຽງໄຊ ແຂວງຫົວພັນ ແລະ ພາກກາງ ເມືອງປາກຊັນ ແຂວງບໍລິຄໍາໄຊ, ເມືອງເຊໂປນ ແຂວງສະຫວັນນະເຂດ ຂອງ ສປປ ລາວ ໃນຕອນເຊົ້າຂອງວັນທີ 11 ຕຸລາ 2021 ນີ້, ຊຶ່ງຈະເຮັດໃຫ້ມີຝົນຕົກໃນລະດັບປານກາງ ຫາ ໜັກ ພ້ອມມີລົມພັດແຮງຢູ່ບາງທ້ອງຖິ່ນ ເຊັ່ນ: ແຂວງຫົວພັນ, ຊຽງຂວາງ, ອຸດົມໄຊ, ຫລວງພະບາງ, ໄຊຍະບູລີ, ນະຄອນຫລວງວຽງຈັນ, ໄຊສົມບູນ, ວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ ຈະເຮັດໃຫ້ເກີດມີຕົ້ນໄມ້ຫັກລົ້ມ, ຫລັງເຮືອນເປ່ເພ, ນໍ້າຖ້ວມອັ່ງ ແລະ ນໍ້າຖ້ວມຍຶ່ງ ໃນໄລຍະວັນທີ 10 ຫາ 11 ຕຸລາ 2021 ນີ້. ດັ່ງນັ້ນ, ຈຶ່ງແຈ້ງເຕືອນເຖິງອໍານາດການປົກຄອງທຸກພາກສ່ວນ ແລະ ປະຊາຊົນບັນດາເຜົ່າທີ່ອາໄສຢູ່ບັນດາແຂວງດັ່ງກ່າວ ໂດຍສະເພາະຜູ້ທີ່ອາໄສຢູ່ລຽບຕາມຮ່ອມພູ, ເປີ້ນພູ ແລະ ແຄມແມ່ນ້ໍາຕ່າງໆ ຈົ່ງມີສະຕິລະມັດລະວັງຕໍ່ສະພາບດິນເຈື່ອນ, ນໍ້າຖ້ວມຊຸ, ນ້ຳຖ້ວມຍື່ງ ແລະ ລົມພັດແຮງ ທີ່ຈະເກີດຂຶ້ນໃນໄລຍະນີ້, ພ້ອມທັງກະກຽມຍົກຍ້າຍວັດຖຸສິ່ງຂອງທີ່ມີຄ່າ ແລະ ສັດລ້ຽງໄປໄວ້ບ່ອນທີ່ສູງ ແລະ ປອດໄພ ຂໍໃຫ້ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.