ຄະນະກຳມະການໄພພິບັດຂັ້ນສູນກາງ ອອກແຈ້ງການເລກທີ 105/ຄພສ ລົງວັນທີ 23 ກັນຍາ 2021 ກ່ຽວກັບໃຫ້ກະກຽມຮັບມືກັບໄພພິບັດທີ່ອາດຈະເກີດຂື້ນ ໃນໄລຍະວັນທີ 24-25 ກັນຍາ 2021.

ເພື່ອກະກຽມຮັບມືກັບໄພພິບັດທີ່ອາດຈະເກີດຂື້ນ ໃຫ້ທັນເວລາ ຈຳກັດຜົນກະທົບທີ່ຮ້າຍແຮງຕໍ່ຊີວິດ ແລະ ຊັບສິນຂອງປະຊາຊົນບັນດາເຜົ່າ ປະທານຄະນະກຳມະການໄພພິບັດຂັ້ນສູນກາງ ຈີ່ງແຈ້ງໃຫ້ຊາບວ່າ: ຮ່ອງຄວາມກົດດັນຕໍ່າ ຫຼື ຮ່ອງຝົນ ໄດ້ພັດຜ່ານເຂດພາກໃຕ້ ຂອງ ສປປ ລາວ ປ່ອງໃສ່ຄວາມກົດດັນອາກາດຕໍ່າ ທີ່ປົກຄຸມຢູ່ທະເລຈີນໃຕ້ຕອນກາງດ້ວຍກຳລັງແຮງ ຄາດວ່າຈະເພີ່ມກຳລັງແຮງຂື້ນກາຍເປັນພາຍຸເຂດຮ້ອນ ແລະ ຈະເຄື່ອນຜ່ານພາກກາງ ຫາ ພາກໃຕ້ ຂອງສປປ ລາວ ໃນວັນທີ 24-25 ກັນຍາ 2021 ຊື່ງສົ່ງຜົນກະທົບລາຍລະອຽດດັ່ງນີ້:

  • ໄລຍະວັນທີ 23-25 ກັນຍາ 2021 ຈະມີຝົນຕົກໜັກ ຫາ ໜັກຫຼາຍ ແລະ ລົມພັດແຮງໃນບາງທ້ອງຖີ່ນ ຢູ່ເຂດພາກໃຕ້ ແລະ ພາກກາງ ເຊັ່ນ: ແຂວງອັດຕະປື, ຈຳປາສັກ, ສາລະວັນ,​ ເຊກອງ ແລະ ສະຫັວນນະເຂດ ເຊີ່ງຈະເຮັດໃຫ້ເກີດມີຕົ້ນໄມ້ຫັກລົ້ມ, ຫຼັງຄາເຮືອນເປ່ເພ, ນໍ້າຖ້ວມອັ່ງ ແລະ ນໍ້າຖ້ວມຍື່ງ ຢູ່ບາງທ້ອງຖີ່ນ.

ໄລຍະວັນທີ 24-25 ກັນຍາ 2021 ຈະມີຝົນຕົກໃນລະດັບປານກາງ ຫາ ໜັກ ແລະ ລົມພັດແຮງ ຢູ່ເຂດພາກກາງ ແລະ ພາກເໜືອດ້ານຕາເວັນຕົກ ເຊັ່ນ: ແຂວງສະຫັວນນະເຂດ, ຄຳມ່ວນ, ບໍລິຄຳໄຊ, ວຽງຈັນ, ໄຊສົມບູນ, ນະຄອນຫຼວງວຽງຈັນ,​ ຫຼວງພະບາງ, ໄຊຍະບູລີ ແລະ ບໍ່ແກ້ວ ເຊີ່ງຈະເຮັດໃຫ້ເກີດມີນໍ້າຖ້ວມກະທັນຫັນ, ນໍ້າຖ້ວມສຸ ແລະ ດິນເຈື່ອນ ຢູ່ບາງທ້ອງຖີ່ນ.

ພ້ອມທັງໃຫ້ຕິດຕາມສະພາບການປ່ຽນແປງດິນຟ້າອາກາດ ຈາກກົມອຸຕຸນິຍົມ ແລະ ອຸທົກກະສາດ ຜ່ານໂທລະພາບ, ວິທະຍຸ ແລະ ສື່ອອນລາຍທາງການອື່ນໆ ພ້ອມທັງແຈ້ງໃຫ້ອົງການປົກຄອງທ້ອງຖີ່ນຂອງຕົນ ກະກຽມຄວາມພ້ອມຮັບມື ແລະ ຕອບໂຕ້ສຸກເສີນກັບໄພພິບັດທີ່ອາດຈະເກີດຂື້ນໃນໄລຍະນີ້ ແລະ ແຈ້ງເຕືອນໃຫ້ພໍ່ແມ່ປະຊາຊົນ ໃຫ້ຮັບຊາບຂໍ້ມູນຂ່າວສານ ແລະ ມີສະຕິລະວັງຕົວ ກຽມພ້ອມຍົກຍ້າຍຜູ້ທີ່ມີຄວາມສ່ຽງ, ເກັບມ້ຽນສີ່ງຂອງທີ່ມີຄ່າ, ກຽມຍົກຍ້າຍສັດລ້ຽງ ເພື່ອປ້ອງກັນ ແລະ ຮັບມືກັບເຫດການໄພພິບັດທີ່ອາດຈະເກີດຂື້ນໃຫ້ທັນເວລາ.