ແຕ່ງຕັ້ງຜູ້ພິພາກສາຊັ້ນໝື່ງຂອງສານປະຊາຊົນແຂວງ ແລະ ສານປະຊາຊົນເຂດ 1 ແຂວງຜົ້ງສາລີ

0
197

ວັນທີ 30 ມີນາ 2021 ນີ້ ຢູ່ທີ່ຫ້ອງປະຊຸມພະແນກການເງິນແຂວງຜົ້ງສາລີ ໄດ້ຈັດພິທີປະກາດແຕ່ງຕັ້ງຜູ້ພິພາກສາຊັ້ນໜຶ່ງ ຂອງສານປະຊາຊົນແຂວງ ແລະ ສານປະຊາຊົນເຂດ I ແຂວງຜົ້ງສາລີຂື້ນຢ່າງເປັນທາງການ. ເປັນກຽດເຂົ້າຮ່ວມໂດຍ ທ່ານ ບຸນຂວາງ ທະວີສັກ ຄະນະພັກ, ຮອງປະທານສານປະຊາຊົນສູງສຸດ, ມີທ່ານ ບຸນທະວີ ສໍສຸກັນ ຄະນະປະຈໍາພັກແຂວງ, ປະທານກວດກາພັກ – ລັດ ແຂວງ, ມີທ່ານ ສົມຕຸ້ຍ ໄຊພະຈັນ ປະທານສານປະຊາຊົນແຂວງຜົ້ງສາລີ ພ້ອມດ້ວຍແຂກເຊີນຈາກອົງການປົກປ້ອງກົດໝາຍ ຕະຫຼອດຮອດພະນັກງານສານປະຊາຊົນເຂດ 01, ເຂດ 02 ເຂົ້າຮ່ວມເປັນສັກຄີພິຍານ.


ໃນພິທີ ທ່ານ ສົມຕຸ້ຍ ໄຊພະຈັນ ປະທານສານປະຊາຊົນແຂວງຜົ້ງສາລີ ໄດ້ຂຶ້ນຜ່ານບົດລາຍງານການຈັດຕັ້ງປະຕິບັດວຽກງານໃນໄລຍະຜ່ານມາ ເຊິ່ງທ່ານໃຫ້ຮູ້ວ່າ : ຄະນະພັກ, ຄະນະນໍາສານປະຊາຊົນແຂວງຜົ້ງສາລີ ໄດ້ຖືເອົາວຽກງານສຶກສາອົບຮົມທາງດ້ານການເມືອງ-ແນວຄິດໃຫ້ແກ່ພະນັກງານສານປະຊາຊົນແຂວງ ດ້ວຍຫຼາຍຮູບການ ແລະ ວິທີການຕ່າງໆໂດຍສະເພາະແມ່ນນໍາພາເຊື່ອມຊຶມບັນດາແນວທາງນະໂຍບາຍຂອງພັກ, ບັນດາມະຕິ, ຄໍາສັ່ງຂອງສູນກາງພັກ, ໄດ້ນໍາພາເຂົ້າຮ່ວມຮໍ່າຮຽນບັນດາເອກະສານຕ່າງໆ ມີຈໍານວນ 74 ຄັ້ງ, ມີ 357 ເທື່ອຄົນ. ນອກນີ້ກໍ່ໄດ້ເອົາໃຈໃສ່ເຄື່ອນໄຫວປະຕິບັດໜ້າທີ່ຕາມພາລະບົດບາດ ແລະ ຕາມກົດໝາຍວ່າດ້ວຍສານປະຊາຊົນ, ກົດໝາຍວ່າດ້ວຍການດໍາເນີນຄະດີອາຍາ, ກົດໝາຍດໍາເນີນຄະດີແພງ ແລະ ປະມວນອາຍາ, ໄລຍະຜ່ານມາຄະດີອາຍາຂັ້ນຕົ້ນ ເຂົ້າມາສານແຂວງ 34 ເລື່ອງ, ເຂົ້າໃໝ່ 64 ເລື່ອງ, ລວມທັງໝົດ 98 ເລື່ອງ, ຕັດສິນ-ແກ້ໄຂແລ້ວ 33 ເລື່ອງ, ສົ່ງໄປບ່ອນອື່ນ 19 ເລື່ອງ, ລວມແກ້ໄຂ 52 ເລື່ອງ, ຍັງຄ້າງ 46 ເລື່ອງ, ຄະດີແພ່ງ ຂັ້ນຕົ້ນ 01 ເລື່ອງ, ຄະດີແພ່ງຂັ້ນອຸທອນມີ 04 ເລື່ອງ, ຄະດີຄອບຄົວຂັ້ນອຸທອນມີ 02 ເລື່ອງ, ຄະດີການຄ້າຂັ້ນຕົ້ນມີ 03 ເລື່ອງ, ເຂົ້າໃໝ່ 01 ເລື່ອງ, ລວມເປັນ 04 ເລື່ອງ, ຕັດສິນ-ແກ້ໄຂແລ້ວ 01 ເລື່ອງ, ຍັງຄ້າງ 03 ເລື່ອງ, ຄະດີເດັກຂັ້ນຕົ້ນ 06 ເລື່ອງ, ເຂົ້າໃໝ່ 04 ເລື່ອງ, ລວມເປັນ 10 ເລື່ອງ, ຕັດສິນ-ແກ້ໄຂແລ້ວ 07 ເລື່ອງ, ຍັງຄ້າງ 03 ເລື່ອງ.

ໄປພ້ອມດຽວກັນນີ້ຕາງໜ້າຈາກຄະນະຈັດຕັ້ງສານປະຊາຊົນສູງສຸດ ຂຶ້ນຜ່ານມະຕິຂອງຄະນະປະຈໍາສະພາແຫ່ງຊາດ ສະບັບເລກທີ 238, 239, 340/ຄປຈ ລົງວັນທີ 10 ພະຈິກ 2020 ວ່າດ້ວຍການແຕ່ງຕັ້ງຜູ້ພິພາກສາ ຊັ້ນໜຶ່ງ ໃຫ້ກັບ 03 ທ່ານ ຄື : ທ່ານ ກອນແກ້ວ ພວງວິໄລ, ທ່ານ ສອນປະເສີດ ສີສູນທອນ ແລະ ທ່ານ ຈັນເພັດ ໄຊຍະສານ ຜູ້ຊ່ວຍຜູ້ພິພາກສາ ຂຶ້ນເປັນຜູ້ພິພາກສາສານປະຊາຊົນແຂວງຜົ້ງສາລີ.

ພາບ-ຂ່າວ: ນັກຂ່າວແຂວງຜົ້ງສາລີ