ມີເດຍລາວແຂວງສາລະວັນ
ໃນຕອນບ່າຍວັນທີ 16 ມິຖຸນາ 2021 ທີ່ສະໂມສອນເມືອງລະຄອນເພັງ ອົງການແນວລາວສ້າງຊາດແຂວງສາລະວັນ ໄດ້ຈັດພິທີເຜີຍແຜ່ມະຕິກອງປະຊຸມໃຫຍ່ຄັ້ງທີ VII ຂອງຜູ້ແທນແນວລາວສ້າງຊາດແຂວງສາລະວັນ ໂດຍເປັນກຽດເຂົ້າຮ່ວມ ຂອງ ທ່ານ ຄໍາຕາ ໂຮຊົງເຣືອງ ຄະນະປະຈໍາພັກແຂວງ ປະທານແນວລາວສ້າງຊາດແຂວງ, ທ່ານ ທອງທອງດີ ຈັນທະວົງ ກໍາມະການພັກແຂວງ ເລຂາພັກເມືອງ ເຈົ້າເມືອງລະຄອນເພັງ, ມີຄະນະບໍລິຫານງານພັກເມືອງ, ປະທານແນວລາວສ້າງຊາດເມືອງ, ແລະຫົວໜ້າຫ້ອງ-ຮອງຫ້ອງການອ້ອມຂ້າງເມືອງ ເຂົ້າຮ່ວມ.

ທ່ານ ບຸນທົງ ເມືອງຈັນ ຮອງປະທານແນວລາວສ້າງຊາດແຂວງສາລະວັນ ໄດ້ເຜີຍແຜ່ມະຕິກອງປະຊຸມໃຫຍ່ຄັ້ງທີ VII ຂອງຜູ້ແທນແນວລາວສ້າງຊາດແຂວງສາລະວັນວ່າ: ກອງປະຊຸມໃຫຍ່ຄັ້ງທີ VII ຂອງຜູ້ແທນແນວລາວສ້າງຊາດແຂວງສາລະວັນ ໄດ້ດໍາເນີນໃນວັນທີ 4 ກຸມພາ 2021 ໂດຍການເປັນປະທານ ຂອງທ່ານ ຄໍາຕາ ໂຮຊົງເຣືອງ ຄະນະປະຈໍາພັກແຂວງ ປະທານແນວລາວສ້າງຊາດແຂວງ ໂດຍມີການນໍາຂັ້ນສູງ ຂອງແຂວງ ແລະສູນກາງແນວລາວສ້າງໃຫ້ກຽດເຂົ້າຮ່ວມ, ມີຜູ້ເຂົ້າຮ່ວມທັງໝົດ 247 ທ່ານ, ຜູ້ແທນສົມບູນ 102 ທ່ານ, ພະສົງ 7 ອົງ. ເຊິ່ງກອງປະຊຸມໄດ້ເປັນເອກະພາບຮັບຮອງເອົາເນື້ອໃນສໍາຄັນຄື: ຮັບຮອງບົດລາຍງານການເມືອງ, ບົດສໍາຫຼວດການນໍາລວມ; ຮັບຮອງເອົາຄະນະກໍາມະການແນວລາວສ້າງຊາດແຂວງ ຊຸດທີ VII ຈໍານວນ 79 ທ່ານ, ພະສົງ 7 ອົງ, ເພດຍິງ 13 ທ່ານ ແລະກອງປະຊຸມຄັ້ງປະຖົມມະລຶກ ຂອງຄະນະກໍາມະການແນວລາວສ້າງຊາດແຂວງ ຊຸດທີ VII ໄດ້ເປັນເອກະສັນເລືອກເອົາ ທ່ານ ຄໍາຕາ ໂຮຊົງເຣືອງ ຄະນະປະຈໍາພັກແຂວງ ເປັນປະທານແນວລາວສ້າງຊາດແຂວງ, ທ່ານ ບຸທົງ ເມືອງຈັນ, ທ່ານ ໜູການ ຊາທິລາດ ແລະທ່ານ ວຽງໄຊ ແກ້ວມະນີວົງ ເປັນຮອງປະທານແນວລາວສ້າງຊາດແຂວງ,

ພ້ອມທັງຮັບຮອງ ຄະນະປະຈໍາແນວລາວສ້າງຊາດແຂວງ ຈໍານວນ 5 ທ່ານ, ຍິງ 1 ທ່ານ, ປະທານກວດກາ-ຮອງປະທານກວດກາ 3 ທ່ານ, ຍິງ 1 ທ່ານ ແລະຮັບເອົາ ການແຕ່ງຕັ້ງທີ່ປຶກສາ ຂອງຄະນະກໍາມະການແນວລາວສ້າງຊາດ ຈໍານວນ 5 ທ່ານ, ຍິງ 1 ທ່ານ.
ທັງນີກໍ່ເພື່ອໃຫ້ພະນັກງານການນຳຫຼັກແຫຼ່ງ ຂອງເມືອງລະຄອນເມືອງ ຮັບຮູ້ເນື້ອໃນ, ຈິດໃຈ, ໝາກຜົນ ແລະຜົນງານຜົນສໍາເລັດກອງປະຊຸມໃຫຍ່ຄັ້ງທີ VII ຂອງຜູ້ແທນແນວລາວສ້າງຊາດແຂວງສາລະວັນ ນຳໄປຈັດຕັ້ງປະຕິບັດເຂົ້ໃນການເຄື່ອນໄຫວເຮັດໜ້າທີ່ທາງດ້ານການເມືອງຂອງພັກມອບໝາຍຢ່າງໜັກແໜ້ນ.