ມີເດຍລາວແຂວງເຊກອງ ມີເດຍລາວແຂວງວັນທີ 23 ມິຖຸນາ 2021 ທີ່ຫ້ອງວ່າການແຂວງ ໄດ້ມີພິທີມອບ-ຮັບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນຄັ້ງທີ III ປະຈໍາປີ 2020 ໃຫ້ໜ່ວຍພັກຮາກຖານແນວລາວສ້າງຊາດແຂວງເຊກອງ, ໃຫ້ກຽດເຂົ້າຮ່ວມມີສະຫາຍ ນາງ ບຸນຮຽງ ບຸນຈິດ ກໍາມະການປະຈໍາພັກແຂວງ, ປະທານແນວລາວສ້າງຊາດແຂວງ; ມີເລຂາ-ຮອງເລຂາໜ່ວຍພັກ, ແຂກຖືກເຊີນ ແລະສະມາຊິກພັກໃນໜ່ວຍເຂົ້າຮ່ວມ.

ໃນພິທີ ສະຫາຍ ນາງ ລັດດາວຽງ ພັນທະນາໄລ ຮອງເລຂາໜ່ວຍພັກ, ຮອງປະທານແນວລາວສ້າງຊາດແຂວງໄດ້ລາຍງານວ່າ: ໜ່ວຍພັກແນວລາວສ້າງຊາດແຂວງ ເປັນໜ່ວຍພັກເອກະລາດຂຶ້ນກັບການນໍາພາ-ຊີ້ນໍາໂດຍກົງຮອບ ດ້ານຂອງຄະນະປະຈໍາພັກແຂວງ, ມີຄະນະໜ່ວຍພັກ 3 ສະຫາຍ, ຍິງ 3 ສະຫາຍ ແລະມີສະມາຊິກພັກທັງໝົດ 16 ສະ ຫາຍ, ຍິງ 8 ສະຫາຍ, ໃນນີ້ສໍາຮອງ 2 ສະຫາຍ, ຍິງ 1 ສະຫາຍ. ໃນປີ 2020 ຜ່ານມາ ຄະນະໜ່ວຍພັກໄດ້ນໍາພາ-ຊີ້ນໍາສະມາຊິກພັກ-ພະນັກງານປະຕິບັດແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນຢ່າງເປັນເຈົ້າການ ໂດຍຖືເອົາການສຶກສາອົບຮົມການເມືອງນໍາພາແນວຄິດໃຫ້ສະມາຊິກພັກ-ພະນັກງານ ຕິດພັນກັບການປັບປຸງກົງຈັກການຈັດຕັ້ງຂອງພັກ, ປັບປຸງແບບແຜນນໍາພາ ແລະວິທີເຮັດວຽກ ອັນເປັນພື້ນຖານເຮັດໃຫ້ການເຄື່ອນໄຫວຈັດຕັ້ງປະຕິບັດວຽກງານໃນແຕ່ລະດ້ານບັນລຸໄດ້ຕາມເປົ້າໝາຍຄື: ດ້ານການເມືອງປະຕິບັດໄດ້ 2 ຄະແນນ, ດ້ານແນວຄິດປະຕິບັດໄດ້ 1,5 ຄະແນນ, ດ້ານການຈັດຕັ້ງ 1,5 ຄະແນນ, ດ້ານແບບແຜນນໍາພາ 2 ຄະແນນ ແລະດ້ານນໍາພາປະຕິບັດໜ້າທີ່ການເມືອງປະຕິບັດໄດ້ 2 ຄະແນນ.

ສ່ວນແຜນການໃນປີ 2021 ຄະນະໜ່ວຍພັກຈະສູ້ຊົນສ້າງໜ່ວຍພັກ ແລະສະມາຊິກພັກໃນໜ່ວຍໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມຈົ່ງຮັກພັກດີຕໍ່ປະເທດຊາດ ແລະປະຊາຊົນ, ມີນໍ້າໃຈເສຍສະຫຼະ, ເປັນເຈົ້າການປະຕິບັດໜ້າທີ່ວຽກງານຕາມການມອບໝາຍຂອງຂັ້ນເທິງ ແລະນໍາພາປະຕິບັດແຜນກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນໃຫ້ໄດ້ຕາມແຜນການທີ່ວາງໄວ້.

ຈາກນັ້ນ ສະຫາຍ ນາງຂວັນໃຈ ສີສຸວົງ ຮອງຫົວໜ້າຂະແໜງກໍ່ສ້າງພັກ ຄະນະຈັດຕັ້ງແຂວງ ກໍໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 51/ຄຈພຂ, ລົງວັນທີ 17 ກຸມພາ 2021 ວ່າດ້ວຍຮັບຮອງໜ່ວຍພັກຮາກຖານແນວລາວສ້າງຊາດແຂວງເຊກອງ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2020 ແລະຮັບຮອງແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນປະຈໍາປີ 2021. ເຊິ່ງໃຫ້ກຽດຂຶ້ນມອບໃບຢັ້ງຢືນໂດຍສະຫາຍ ນາງ ບຸນຮຽງ ບຸນຈິດ ແລະກ່າວຮັບແມ່ນສະຫາຍ ນາງ ລັດດາວຽງ ພັນທະນາໄລ.