ມີເດຍລາວແຂວງສາລະວັນ ພາບ-ຂ່າວ: ນັກຂ່າວເມືອງລະຄອນເພັງ
ວັນທີ 18 ມິຖຸນາ 2021ນີ້ ທີ່ສະໂມສອນຂອງເມືອງ ຄະນະກໍາມະການແນວລາວສ້າງຊາດເມືອງລະຄອນເພັງໄດ້ດໍາເນີນກອງປະຊຸມຄົບຄະນະຄັ້ງທີ II ສະໃໝທີ V ຕິດພັນກັບການມອບໃບຢັ້ງຢືນຄອບຄົວ-ບ້ານສະມັກຄີປອງດອງ ແລະບ້ານໜັກແໜ້ນເຂັ້ມແຂງ ໂດຍການເປັນປະທານ ຂອງທ່ານ ນາງ ມະນີໄລ ຈໍາປາມະນີວົງ ຄະນະປະຈໍາພັກເມືອງ ປະທານແນວລາວສ້າງຊາດເມືອງ ເປັນກຽດເຂົ້າຮ່ວມ ຂອງທ່ານ ທອງດີ ຈັນທະວົງ ກໍາມະການພັກແຂວງ ເລຂາພັກເມືອງ ເຈົ້າເມືອງລະຄອນເພັງ, ທ່ານ ໜູການ ຊາທິລາດ ຮອງປະທານແນວລາວສ້າງແຂວງ, ມີຄະນະກໍາມະການແນວລາວສ້າງຊາດແຂວງ-ເມືອງ, ການຈັດຕັ້ງບ້ານກ່ຽວຂ້ອງ ແລະແຂກຖືກເຊີນເຂົ້າຮ່ວມ.

ທ່ານ ດາລາ ຄໍາຈັນ ຮອງປະທານແນວລາວສ້າງຊາດເມືອງ ໄດ້ຜ່ານບົດສະຫຼຸບການຈັດຕັ້ງເຄື່ອນໄຫວ ຂອງຄະນະກໍາມະການແນວລາວສ້າງຊາດເມືອງປະຈໍາປີ 2020 ແລະທິດທາງແຜນການ 2021 ເຊິ່ງໃນໄລຍະໜຶ່ງປີຜ່ານມາ ຄະນະກໍາມະການແນວລາວສ້າງຊາດເມືອງ ໄດ້ເອົາໃຈໃສ່ ເຕົ້າໂຮມຄວາມສາມັກຄີປອງດອງ ປະຊາຊົນບັນດາເຜົ່າ, ຊັ້ນຄົນ, ສາສະໜາ, ເພດ-ໄວ, ສ້າງພັນທະພາບລະຫວ່າງເຜົ່າ, ຊັ້ນຄົນຕ່າງໆຢ່າງຕັ້ງໜ້າ; ທົ່ວເມືອງມີຄະນະກໍາມການແນວລາວສ້າງຊາດເມືອງ 57 ທ່ານ, ຍິງ 3 ທ່ານ, ພະສົງ 4 ອົງ, ມີຄະນະກໍາມະການແນວລາວສ້າງຊາດບ້ານ 532 ທ່ານ, ຍິງ 68 ທ່ານ ແລະຄະນະກໍາມະການແນວລາວສ້າງຊາດແຂວງທີ່ປະຈໍາຢູ່ເມືອງ 7 ທ່ານ, ຍິງ 1 ທ່ານ, ພະສົງ 1 ອົງ; ໄດ້ເອົາໃຈໃສ່ເຄື່ອນໄຫວເຜີຍແຜ່ ມັດຕິ, ຄໍາສັ່ງ ແລະນິຕິກໍາຕ່າງໆ ຂອງພັກ-ລັດ, ແນວລາວສ້າງຊາດ ແລະອົງການຈັດຕັ້ງມະຫາຊົນໄດ້ເປັນຢ່າງດີ, ຊຸກຍູ້ການສ້າງຄອບຄົວ ແລະບ້ານສະມັກຄີປອງດອງ( ບາດກ້າວ 1 ແລະ2) ໄດ້ 29 ບ້ານ, ປັບປຸງຄະນະແນວຂັ້ນບ້ານໄດ້ 31 ບ້ານ, ເອົາໃຈໃສ່ວຽກງານຊົນເຜົ່າ, ສາສະໜາ, ຊັ້ນຄົນ, ເຈົ້າກົກເຈົ້າເຫຼົ່າ, ວຽກກອງທືນພັດທະນາບ້ານ. ທົ່ວເມືອງມີ 2 ເຜົ່າຄື: ເຜົ່າລາວກວມເອົາ 95% ແລະເຜົ່າກະຕາງ 5% ຂອງຈໍານວນພົນລະເມືອງ, ພົນລະເມືອງຫຼາຍກວ່າ 99% ຖືສະໜາພຸດ, ທົ່ວເມືອງມີວັດທັງໝົດ 68 ວັດ, ວັດຮ້າງ 4 ວັດ, ພະສົງ 104 ອົງ, ສາມະເນນ 4 ອົງ ແລະແມ່ຂາວ 3 ຕົນ, ມີກອງທຶນພັດທະນາບ້ານ 3 ບ້ານ, ມີເງິນກອງທຶນ 6ລ້ານກວ່າກີບຈາກນັ້ນ, ຜູ້ເຂົ້າຮ່ວມກອງປະຊຸມກໍ່ໄດ້ຜັດປ່ຽນກັນປະກອບຄໍາຄິດເຫັນ ເພື່ອເຮັດໃຫ້ບົດສະຫຼຸບ ແລະທິດທາງແຜນການ ມີເນື້ອໃນຄົບຖ້ວນສົມບູນ.

ຕອນທ້າຍກອງປະຊຸມໄດ້ມີພິທີມອບໃບຢັ້ງຢືນຄອບຄົວສາມັກຄີປອງດອງຈໍານວນ 5072 ຄອບຄົວ, ບ້ານສະມັກຄີປອງດອງ 31 ບ້ານ ແລະບ້ານໜັກແໜ້ນເຂັ້ມແຂງ 7 ບ້ານ ໃຫ້ກຽດຂຶ້ນມອບໂດຍທ່ານ ໜູການ ຊາທິລາດ ຮອງປະທານແນວລາວສ້າງແຂວງ ແລະທ່ານ ແກ້ວຜາ ສີລາດວງໃຈ ຮອງເລຂາພັກເມືອງ ຜູ້ຊີ້ນໍາວຽກງງານການເມືອງ-ແນວຄິດ ແລະວຽກພັກ-ພະນັກງານ.