ມີເດຍລາວແຂວງບໍລິຄຳໄຊ
ຕອນບ່າຍຂອງວັນທີ 10 ມິຖຸນາ 2021 ຢູ່ທີ່ໂຮງຮຽນ ມສ ນ້ຳອ້ອນ ເມືອງໄຊຈຳພອນ ແຂວງບໍລິຄຳໄຊ ໄດ້ຈັດພິທີມອບ-ຮັບເຄື່ອງຊ່ວຍເຫຼືອ ໃຫ້ຫໍພັກ ມສ ນ້ຳອ້ອນ ໂດຍໄດ້ຮັບການສະໜັບສະໜູນຈາກ ແຜນງານລາວ 030, ໃຫ້ກຽດເຂົ້າຮ່ວມຂອງ ທ່ານ ຄຳໄຊ ຕຸນາລົມ ຮອງເຈົ້າເມືອງໄຊຈຳພອນ. ເຄື່ອງທີ່ນໍາມາມອບໃນຄັ້ງນີ້ ປະກອບມີ: ຜ້າຫົ່ມ toto, ເສື່ອພັບ, ໝອນ, ມຸ້ງ, ສາດປູ ແລະ ເຄື່ອງໃຊ້ໃນຄົວເຮືອນ.

ເຄື່ອງຈໍານວນດັ່ງກ່າວ ເປັນການມອບໃຫ້ນັກຮຽນຜູ້ທີ່ພັກອາໃສ ນອນຢູ່ຫໍພັກ ໂຮງຮຽນ ມສ ນ້ຳອ້ອນ ລວມມູນຄ່າ 11.339.000 ກີບ, ມອບໂດຍ ທ່ານ ສົມປອງ ອິນທະວົງ ຫົວໜ້າຂະແໜງຮ່ວມມືສາກົນ ພະແນກ ແຜນການ ແລະ ການລົງທຶນ ຕາງໜ້າຜູ້ປະສານງານໂຄງການແຜນງານລາວ 030, ກ່າວຮັບໂດຍ ທ່ານ ອາຈານ ຄໍາອ່ອນ ໄຊສົມບັດ ອໍານວຍການໂຮງຮຽນ ມສ ນ້ຳອ້ອນ.

ການນຳເຄື່ອງມາມອບໃນຄັ້ງນີ້ ແມ່ນຍ້ອນເຫັນໄດ້ຄວາມຈຳເປັນ ແລະ ເປັນຫ່ວງເປັນໄຍນ້ອງໆນັກຮຽນ ທີ່ເຂົ້າມາຢູ່ຫໍພັກ ໂຄງການແຜນງານລາວ 030 ຈຶ່ງໄດ້ນຳເຄື່ອງດັ່ງກ່າວ ມາແບ່ງເບົາ ເພື່ອໃຫ້ນ້ອງໆນັກຮຽນ ໄດ້ຮັບຄວາມສະດວກ ໃນຊີວິດປະຈຳວັນ ແລະ ໃນການຮຽນ.
ເພື່ອຢັ້ງຢຶນເຖີງນ້ຳໃຈ ແລະ ຜົນງານດັ່ງກ່າວນັ້ນ ທ່ານ ຄຳໄຊ ຕຸນາລົມ ຮອງເຈົ້າເມືອງໄຊຈຳພອນ ຕາງໜ້າໃຫ້ການນຳເມືອງ ໄດ້ມອບໃບຍ້ອງຍໍສັນລະເສີນ ໃຫ້ກັບໂຄງການແຜນງານລາວ 030 ໃນການຊ່ວຍເຫຼືອຄັ້ງນີ້ອິກດ້ວຍ.