ກະຊວງໄປສະນີ ໂທລະຄົມມະນາຄົມ ແລະ ການສື່ສານ (ປທສ) ຮ່ວມກັບສະມາຄົມໄອຊີທີລາວ (LICA) ບໍລິສັດ ດາຕ້າຄອມ ຈໍາກັດ ແລະ ບໍລິສັດ Solutions for Asia ປະເທດສິງກະໂປ ຈັດສຳມະນາວຽກງານຄວາມປອດໄພທາງໄຊເບີ ຂຶ້ນວັນທີ 24 ກຸມພາ 2021 ຢູ່ນະຄອນຫຼວງວຽງຈັນ ໂດຍເປັນປະທານຂອງທ່ານ ຄຳຫຼ້າ ສູນນະລັດ ຫົວໜ້າສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພິວເຕີ ມີຜູ້ຕາງໜ້າຈາກບັນດາກະຊວງ ແລະ ບໍລິສັດໂທລະຄົມ ເຂົ້າຮ່ວມ.

    ຈຸດປະສົງການຈັດສໍາມະນາຄັ້ງນີ້ເພື່ອແລກປ່ຽນຄວາມຮູ້ ແລະ ປະສົບການໃນການບໍລິຫານ-ຈັດການກັບໄພຄຸກຄາມທາງໄຊເບີ ດ້ວຍການນໍາສະເໜີກ່ຽວກັບພາບລວມເຫດການຄວາມປອດໄພທາງໄຊເບີ ໃນໄລຍະຜ່ານມາ ແນວໂນ້ມໃນຕໍ່ໜ້າ ແລະ ວິທີທາງໃນການຮັບມືແກ້ໄຂ ເພື່ອໃຫ້ຜູ້ເຂົ້າຮ່ວມໄດ້ຮູ້ເຖິງຜົນກະ ທົບທີ່ອາດຈະເກີດຂຶ້ນ ເຊິ່ງຈະສ້າງຄວາມເສຍຫາຍຕໍ່ລະບົບພື້ນຖານໂຄງລ່າງເຕັກໂນໂລຊີສື່ສານຂໍ້ມູນຂ່າວສານໃນພາກພື້ນ ແລະ ສາກົນ ໂດຍສະເພາະ ສປປ ລາວ ຈະມີວິທີການໃນການຕ້ານ ສະກັດກັ້ນ ແລະ ປ້ອງກັນແນວໃດຕໍ່ກັບລະບົບເຕັກໂນໂລຊີສື່ສານຂໍ້ມູນຂ່າວສານ ເພາະໄລຍະຜ່ານມາກໍໄດ້ຮັບຜົນກະ ທົບຈາກການແຜ່ລະບາດຂອງໄວຣັດຄອມພິວເຕີ ເຊັ່ນ: ແຣນຊຳແວ ເມົາແວ ບ໋ອດເນັດ ການໂຈມຕີເວບໄຊ ການເຈາະລະບົບຖານຂໍ້ມູນ ແລະ ອື່ນໆ.  ­

    ໃນວາລະການສໍາມະນາຄັ້ງນີ້ ບັນດາຜູ້ເຂົ້າຮ່ວມຈະໄດ້ຮັບຟັງການບັນຍາຍຈາກວິທະຍາກອນທັງພາຍໃນ ແລະ ວິທະຍາກອນຈາກປະເທດສິງກະໂປ ພິເສດແມ່ນການນໍາສະເໜີແອັບພິເຄຊັນປ້ອງກັນໄພຄຸມຄາມໂທລະສັບມືຖື (Zimperium Mobile Threat Application) ເຊິ່ງແອັບພິເຄຊັນດັ່ງກ່າວ ສາມາດກວດຈັບ ແລະ ປ້ອງກັນການໂຈລະກຳຂໍ້ມູນຕ່າງໆທີ່ເກັບໄວ້ໃນໂທລະສັບມືຖື ພ້ອມທັງການທົດລອງນຳໃຊ້ຕົວຈິງຂອງແອັບດັ່ງກ່າວ ນອກນີ້ຍັງໄດ້ເປີດເວທີສົນທະນາແລກປ່ຽນຄວາມຄິດເຫັນເຊິ່ງກັນ ແລະ ກັນ ເພື່ອໃຫ້ການນຳໃຊ້ເຕັກໂນໂລຊີສື່ສານຂໍ້ມູນຂ່າວສານ ເປັນໄປໄດ້ຢ່າງສະດວກວ່ອງໄວ ແລະ ປອດໄພ.