ມີເດຍລາວແຂວງວຽງຈັນ ພາບ-ຂ່າວ: ເມືອງກາສີ. ນາງ ດາລັກ ເກດຕະວົງ ພິທີມອບ-ຮັບໂຮງຮຽນປະຖົມສົມບູນ ບ້ານ ທົ່ງເໝືອດ ເມືອງກາສີ ແຂວງວຽງຈັນ, ໄດ້ຈັດຂື້ນໃນວັນທີ 15 ມິຖຸນາ 2021 ຢູ່ທີ່ໂຮງຮຽນ ໂດຍການເປັນກຽດເຂົ້າຮ່ວມຂອງ ທ່ານ ສີທົນ ແສງພະຈັນ ເລຂາພັກເມືອງ ເຈົ້າເມືອງໆກາສີ, ທ່ານ ບຸນມາ ເພັງໄຊ ຮອງຫົວໜ້າຫ້ອງການ ສຶກສາທິການ ແລະ ກິລາ ເມືອງ, ມີບັນດາຫົວໜ້າ – ຮອງຫົວໜ້າຫ້ອງການ, ທີມງານສ້າງຝັນ, ຜູ້ອໍານວຍການໂຮງຮຽນ, ຄູ – ອາຈານ, ອໍານາດການປົກຄອງບ້ານເຂົ້າຮ່ວມຢ່າງພ້ອມພຽງ.

ສໍາລັບການກໍ່ສ້າງໂຮງໂຮງຮຽນປະຖົມສົມບູນ ບ້ານ ທົ່ງເໝືອດ ໄດ້ເລີ່ມລົງມືກໍ່ສ້າງມາແຕ່ວັນທີ 9 ກຸມພາ 2021 ແລະ ສໍາເລັດໃນວັນທີ 26 ພຶດສະພາ 2021. ເຊີ່ງແມ່ນແຮງງານທີ່ທາງທີມງານສ້າງຝັນນໍາມາລົງມືກໍ່ສ້າງ, ລວມມູນຄ່າການກໍ່ສ້າງທັງໝົດ 336.000.000 ກີບ ໂດຍແມ່ນທືນຊ່ວຍເຫຼືອຈາກໂຄງການທີມງານສ້າງຝັນລວມມີ 8 ທ່ານ. ໂຮງຮຽນດັ່ງກ່າວເປັນອາຄານຊັ້ນດຽວ ມີຂະໜາດ 9X34 ແມັດ, ມີ 5 ຫ້ອງຮຽນ.

ໃຫ້ກຽດຂຶ້ນມອບອາຄານຮຽນດັ່ງກ່າວໂດຍແມ່ນທີມງານສ້າງຝັນ ແລະ ຂື້ນຮັບໂດຍທ່ານ ບຸນມາ ເພັງໄຊ ຮອງຫົວໜ້າຫ້ອງການ ສຶກສາທິການ ແລະ ກິລາ ເມືອງ ຫຼັງຈາກນັ້ນ ກໍ່ໄດ້ກ່າວມອບຕໍ່ໃຫ້ແກ່ຜູ້ອໍານວຍການໂຮງຮຽນບ້ານທົ່ງເໝືອດ, ຈາກນັ້ນທ່ານ ສີທົນ ແສງພະຈັນ ເຈົ້າເມືອງໆກາສີກໍ່ໄດ້ໃຫ້ກຽດຂຶ້ນມອບໃບກຽດຕິຄຸນໃຫ້ແກ່ທາງທີມງານສ້າງຝັນ ແລະ ກໍ່ໄດ້ກ່າວໂອ້ລົມຕໍ່ພິທີ ເຊີ່ງທ່ານໄດ້ເໜັ້ນໜັກໃຫ້ອຳນາດການປົກຄອງບ້ານ ພ້ອມດ້ວຍຄູພາຍໃນໂຮງຮຽນ ຕ້ອງເພີ່ມທະວີຄວາມຮັບຜິດຊອບເປັນເຈົ້າການໃນການປົກປັກຮັກສາພັດທະນາໂຮງຮຽນດັ່ງກ່າວ ໃຫ້ໄດ້ນຳໃຊ້ຍາວນານຕະຫຼອດໄປ, ພ້ອມກັນເອົາໃຈໃສ່ລະດົມລູກຫຼານຂອງຕົນໃຫ້ໄດ້ເຂົ້າໂຮງຮຽນຢ່າງທົ່ວເຖີງ.

ໃນຕອນທ້າຍພິທີທ່ານຜູ້ອໍານວຍການໂຮງຮຽນກໍ່ໄດ້ກ່າວສະແດງຄວາມຂອບອົກຂອບໃຈ ຕໍ່ອຳນາດການປົກຄອງຂັ້ນເທິງ ໂດຍສະເພາະກໍ່ແມ່ນທີມງານສ້າງຝັນທີ່ມີນ້ຳຈິດນ້ຳໃຈໃຫ້ການສະໜັບສະໜູນຊ່ວຍເຫຼືອໂຮງຮຽນທົ່ງເໝືອດ ເຮັດໃຫ້ລູກຫຼານ-ນ້ອງນ້ອຍນັກຮຽນ ມີບ່ອນສຶກສາຮ່ຳຮຽນທີ່ຈົບງາມ ແລະ ສະດວກສະບາຍຂື້ນ.