ກ່ອນໜ້ານີ້ເຫັນສື່ອອນລາຍໂພສເລື່ອງແລ່ນໃບຢັ້ງຢືນການສັກຢາວັກຊິນຕ້ານໂຄວິດ-19 ຢູ່ເຂດເສດຖະກິດພິເສດທາງແຂວງບໍ່ແກ້ວ; ໃບຢັ້ງຢືນນັ້ນມີສອງຢ່າງ: ສຳລັບຜູ້ສັກຄົບ 2 ເຂັມ ແມ່ນມີລາຄາຢ່າງໜື່ງ; ຜູ້ບໍ່ສັກຈັກເຂັມກໍ່ສາມາດເຮັດໄດ້ໃນລາຄາສູງກ່ວາ; ຫຼັງຈາກມີໃບຢັ້ງຢືນນີ້ແລ້ວສາມາດອອກຈາກເຂດນີ້ໄດ້ ໂດຍມີຜູ້ໃຫ້ບໍລິການເຖີງຄິວລົດອອກຈາກເຂດເພື່ອໄປແຂວງອື່ນວ່າຊັ້ນ!.

ບາດນີ້ພັດມາເຫັນໃນມໍ່ໆ ມານີ້ແມ່ນຢູ່ນະຄອນຫຼວງວຽງຈັນ ອອກຈາກເຟສບຸກອີກວ່າຮັບແລ່ນໃບຢັ້ງຢືນສັກວັກຊິນໂຄວິດ-19 ສຳລັບຜູ້ສັກຄົບ 2 ເຂັມ ລົງເອກະສານພາສາອັງກິດ ມີລາຍເຊັນຈໍ້າກາແດງຄັກແນ່!.

ກ່ຽວກັບເລື່ອງນີ້ໃນການຖະແຫຼງຂ່າວ ຂອງຄະນະສະເພາະກິດ ໃນມື້ວັນທີ 18/06/2021 ເພີ່ນກໍ່ເວົ້າແຈ້ງວ່າ: “ຈາກການຕິດຕາມຂ່າວສັງຄົມອອນລາຍ ເຫັນວ່າມີກຸ່ມຄົນຈຳນວນໜື່ງວ່າສາມາດວີ້ງເຕັ້ນ ຫຼື ເປັນນາຍໜ້າໃນການເຮັດໃບຢັ້ງຢືນການສັກວັກຊິນ ນຳຂະແໜງສາທາລະນະສຸກ; ຂ້າພະເຈົ້າຂໍແຈ້ງໃຫ້ບັນດາທ່ານຊາບວ່າ ການກະທຳດັ່ງກ່າວແມ່ນຜິດລະບຽບຫຼັກການ ແລະ ໃຫ້ຢຸດການກະທຳດັ່ງກ່າວໂດຍໄວ; ລາຍລະອຽດແມ່ນທ່ານສາມາດສອບຖາມໄດ້ຈາກສູນແມ່ ແລະ ເດັກ ກ່ຽວກັບການອອກໃບຢັ້ງຢືນວັກຊິນ; ຖ້າຜູ້ໃດຫາກພົບເຫັນການກະທຳດັ່ງກ່າວໃຫ້ໂທແຈ້ງສາຍດ່ວນ ຫຼື ຄະນະສະເພາະກິດທ້ອງຖີ່ນ ເພື່ອຈະໄດ້ຕັກເຕືອນ ແລະ ດຳເນີນຄະດີ” ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ເພີ່ນວ່າແນວນັ້ນເນີ!.

ຂໍໃຫ້ເຈົ້າໜ້າທີ່ບ້ານ-ເມືອງທີ່ກ່ຽວຂ້ອງ ໃຊ້ມາດຕະການເດັດຂາດຕໍ່ພວກມືບອນ; ສະແຫວງຫາຜົນປະໂຫຍດຍາມປະເທດຊາດ-ບ້ານເມືອງ ແລະ ຜູ້ຄົນພົບວິກິດແດ່ທ້ອນ!.

ທິດດີ