ມີເດຍລາວແຂວງສາລະວັນ ໂດຍ: ກິນດາວັນ ອ້ວນນາຄູ ໃນວັນທີ 4 ພຶດສະພາ 2021ນີ້ ຢູ່ທີ່ຫ້ອງວ່າການແຂວງສາລະວັນ, ນໍາໂດຍທ່ານ ນາງ ຟາມຫງັອກມາຍ ເຈົ້າຂອງໂຮງງານປຸງແຕ່ໄມ້ ເຊັນເຈີລີພຣາຍ ສາລະວັນ ( Century ply salavan ) ໄດ້ນໍາເອົາ ຜ້າອັດປາກຈໍານວນ 5 ແກັດ, ລວມມູນຄ່າ 8,750,000 ກີບ ມາມອບໃຫ້ແຂວງສາລະວັນ, ໂດຍການຮັບຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ຫົວໜ້າຄະນະສະເພາະກິດ ໂຄວິດ-19 ຂັ້ນແຂວງ.

ໂອກາດດຽວກັນນີ້ທ່ານກໍ່ໄດ້ສະແດງຄວາມຂອບໃຈ, ຍ້ອງຍໍຊົມເຊີຍ ມາຍັງບໍລິສັດ ເຊັນເຈີລີພຣາຍ ສາລະວັນທີ່ໃຫ້ການຊ່ວຍເຫຼືອທາງດ້ານວັດຖຸ, ອຸປະກອນ ໃຫ້ກັບແຂວງສາລະວັນ ທີ່ກຳລັງພົບກັບບັນຫາວິກິດ ກໍ່ຄືພະຍາດໂຄວິດ-19, ເຄື່ອງຈຳນວນດັ່ງກ່າວແມ່ນຈະນຳໄປມອບໃຫ້ກັບ ໜ່ວຍງານແພດໝໍ, ທະຫານ, ຕໍາຫຼວດ, ໜ່ວຍງານອື່ນໆ ແລະ ບັນດາເມືອງ ທີ່ປະຕິບັດວຽກງານຕົວຈິງ ເພື່ອແນ່ໃສປະກອບສ່ວນໃນການຊ່ວຍເຫຼືອ ປ້ອງກັນ, ຕ້ານ ແລະ ສະກັດກັ້ນການແຜ່ລະບາດ ຂອງພະຍາດໂຄວິດ-19.