ມີເດຍລາວແຂວງອຸດົມໄຊ ແສງອາທິດ ກວດແກ້: ອ່ຽງຄຳ ວິລະສັກ
ພິທີເປີດຊຸດຮຽນທິດສະດີການເມືອງ ແລະ ການປົກຄອງ ລະບົບຊັ້ນຕົ້ນ ພາກພິເສດ ຮູ່ນທີ XII ໃຫ້ແກ່ຄະນະບໍລິຫານງານຊາວໜຸ່ມແຂວງ, ສະຫະພັນແມ່ນຍິງແຂວງ, ໜ່ວຍຮາກຖານແມ່ຍິງອ້ອມຂ້າງ ແລະ ຄະນະໜ່ວຍຊາວໜຸ່ມຮາກຖານເມືອງໄຊ ໄດ້ໄຂຂຶ້ນ ໃນວັນທີ 9 ກັນຍານີ້ ທີ່ສະໂມສອນຂອງໂຮງຮຽນດັ່ງກ່າວ ໂດຍການເຂົ້າຮ່ວມຂອງ ທ່ານ ຄຳຟອງ ພັດທະມາວົງ ອຳນວຍການໂຮງຮຽນການເມືອງ ແລະ ການປົກຄອງ ແຂວງອຸດົມໄຊ, ມີແຂກເຊີນຈາກພາກສ່ວນທີ່ກ່ຽວຂ້ອງ, ຄູອາຈານ ແລະ ນັກສຶກສາ ເຂົ້າຮ່ວມ.

ການເປີດຮຽນທິດສະດີການເມືອງ ແລະ ການປົກຄອງ ລະບົບຊັ້ນຕົ້ນ ພາກພິເສດ ຮູ່ນທີ XII ນີ້ ເພື່ອສິດສອນ, ສົ່ງຄວາມຮູ້, ຄວາມສາມາດ ດ້ານທິດສະດີມາກ-ເລນິນ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ການປົກຄອງ ແລະ ການບໍລິຫານ, ວຽກງານກໍ່ສ້າງພັກ-ພະນັກງານ ໃຫ້ພະນັກງານຫຼັກແຫຼ່ງ ຢູ່ບັນດາຂົງເຂດວຽກງານພາຍໃນແຂວງອຸດົມໄຊ ໃຫ້ມີຄວາມຮູ້, ຄວາມສາມາດ ທາງດ້ານທິດສະດີໃຫ້ຫລາຍຂຶ້ນ ເພື່ອນຳໄປໝູນໃຊ້ເຂົ້າໃນການນໍາພາ-ຄຸ້ມຄອງ, ບໍລິຫານວຽກງານ, ການປະຕິບັດໜ້າທີ່ການເມືອງຂອງພັກໃນໄລຍະໃໝ່ ໃຫ້ມີຄວາມໜັກແໜ້ນ, ເຂັ້ມແຂງ, ມີຄວາມຮັບຮູ້ອັນໃໝ່ທີ່ຖືກຕ້ອງ ແລະ ກຳແໜ້ນບັນດາຫຼັກມູນພື້ນຖານຂອງທິດສະດີມາກ-ເລນິນ, ລະບຽບການຄຸ້ມຄອງບໍລິຫານ, ຫຼັກການກໍ່ສ້າງພັກ-ພະນັກງານ ແລະ ຮູ້ນຳໃຊ້ທິດສະດີເຂົ້າໃນວຽກງານຕົວຈິງ.

ໂອກາດນີ້ ທ່ານ ຄຳຟອງ ພັດທະມາວົງ ອຳນວຍການໂຮງຮຽນການເມືອງ ແລະ ການປົກຄອງ ຍັງໄດ້ ຮຽກຮ້ອງໃຫ້ ຄູອາຈານ ແລະນັກສຶກສາ ຈົ່ງພ້ອມກັນຈັດຕັ້ງປະຕິບັດການຮຽນ-ການສອນ, ປະຕິບັດກົດລະບຽບຂອງໂຮງຮຽນ, ມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ, ເອົາໃຈໃສ່ຄົ້ນຄ້ວາ, ແລກປ່ຽນແນວຄວາມຄິດນຳ ຄູອາຈານ ແລະ ໝູ່ເພື່ອນ ເພື່ອຍາດແຍ່ງເອົາຄວາມຮູ້ໄປໝູນໃຊ້ເຂົ້າໃນໜ້າທີ່ວຽກງານໃຫ້ມີປະສິດທິພາບ.