ພິທີມອບ-ຮັບ ນໍ້າບາດານ ຈໍານວນ 1 ບໍ່ ໃຫ້ກັບໂຮງຮຽນມູນລະປະຖົມ ບ້ານນາໂພໃຫຍ່ (ຄຸ້ມໜອງສະໂນ) ເມືອງສາລະວັນ ຈັດຂື້ນໃນວັນທີ 2 ມີນາ 2021 ໂດຍການຂົ້າຮ່ວມ ຂອງທ່ານ ຈັນສີລອນ ສີສົມບູນ ເຈົ້າເມືອງສາລະວັນ, ທ່ານ ແບັກ ຊ໋ອງຍອງ ປະທານມູນນິທິ ໂກຼໂບຼໄລຼຟ ແຊ໌ຣິງ, ທ່ານ ໜູຄໍາ ສີສະຫວັດ ຮອງເຈົ້າເມືອງ ຜູ້ຊີ້ນໍາວຽກງານວັດທະນະທໍາ-ສັງຄົມ, ມີຫົວໜ້າຫ້ອງການສາທາລະນະສຸກເມືອງສາລະວັນ, ຫົວໜ້າຫ້ອງວ່າການເມືອງ, ປະທານສະພາການຄ້າ ແລະ ອຸດສະຫະກໍາແຂວງສາລະວັນ, ພ້ອມດ້ວຍນ້ອງນ້ອຍນັກຮຽນ ແລະ ພໍ່ແມ່ປະຊາຊົນ ເຂົ້າຮ່ວມ.

ໂຄງການເຈາະນໍ້າບາດານ ຈໍານວນ 1 ບໍ່ ໃຫ້ໂຮງຮຽນມູນລະປະຖົມບ້ານນາໂພໃຫຍ່ ແມ່ນໄດ້ຮັບທຶນຊ່ວຍເຫຼືອຈາກ ມູນນິທິ ໂກຼໂບຼໄລຼຟ ແຊ໌ຣິງ ກັບປະຊາຊົນປະເທດເກົາຫຼີ ເຊິ່ງໄດ້ເລີ່ມລົງມືຂຸດເຈາະແຕ່ຕົ້ນເດືອນກຸມພາ 2021 ແລະ ສໍາເລັດພາຍໃນ 1 ອາທິດ, ເປັນບໍ່ບາດານ ແບບປິດ, ມີຄວາມເລິກ 46 ແມັດ, ລວມມູນຄ່າທັງໝົດ 30 ລ້ານກວ່າກີບ, ມີລະບົບກັນເຈື່ອນ ແລະ ໄດ້ຜ່ານການກວດກາຄຸນນະພາບນໍ້າ ແລະ ຮັບຮອງຈາກສາທາລະນະສຸກ. ບໍ່ນໍ້າແຫ່ງນີ້ຈະຕອບສະໜອງໃນການຊົມໃຊ້ໃຫ້ແກ່ພໍ່-ແມ່ປະຊາຊົນບ້ານນາໂພໃຫຍ່ ນຳໃຊ້ເຂົ້າໃນຊີວິດປະຈຳວັນ ໂດຍສະເພາະຄຸ້ມໜອງສະໂນ ແລະ ນ້ອງນັກຮຽນ ໂຮງຮຽນມູນລະປະຖົມ, ຄຸ້ມໜອງສະໂນ ແມ່ນເປັນຄຸ້ມໜຶ່ງທີ່ຂຶ້ນກັບ ບ້ານນາໂພໃຫຍ່ ເມືອງສາລະວັນ ໄກຈາກເທດສະບານເມືອງປະມານ 45 ກິໂລແມັດ, ເປັນເສັ້ນທາງດິນແດງເຂົ້າເຖິງບ້ານ ສາມາດໄປມາໄດ້ສອງລະດູ, ມີປະຊາກອນທັງໝົດ 135 ຄົນ,ຍິງ 69 ຄົນ, ມີ 15 ຫຼັງຄາເຮືອນ,ມີ 24 ຄອບຄົວ, ອາຊີບຕົ້ນຕໍຂອງປະຊາຊົນແມ່ນມີອາຊີບເຮັດນາ, ປູກຝັງ, ລ້ຽງສັດ

ຈາກນັ້ນໃນພິທີກໍ່ໄດ້ມີການຕັດແຖບຜ້າມອບຮັບໂຄງການນໍ້າບາດານ ແລະ ມອບໃບຍ້ອງຍໍໃຫ້ກັບຜູ້ທີ່ນໍາທືນມາຊ່ວຍເຫຼືອຕື່ມອີກ.

ພາບ-ຂ່າວ: ທິດລານີ ໂຄດໂຍທາ