ວັນທີ 23 ກຸມພາ 2021 ຜ່ານມານີ້ ກອງບັນຊາການທະຫານເມຶອງຊຽງເງິນໄດ້ຈັດ ພິທີເປີດຝຶກອົບຮົມວຽກງານສຶກສາປ້ອງກັນຊາດ-ປ້ອງກັນຄວາມສະຫງົບໃຫ້ແກ່ ນັກຮຽນ ທີ່ໂຮງຮຽນ ມັດທະຍົມສົມບູນ ກິ່ວກະຈໍາ ເມືອງຊຽງເງີນ ແຂວງຫຼວງພະບາງ ໂດຍການເປັນປະທານຂອງ ສະຫາຍ ພັນໂທ ຄໍາແພງ ອານຸສຸກ ຄະນະປະຈໍາພັກເມືອງ ຫົວໜ້າການທະຫານ ກອງບັນຊາການທະຫານເມືອງຊຽງເງີນ ເປັນກຽດເຂົ້າຮ່ວມຂອງ ທ່ານ ສົມບັດ ຄອນຈະເລີນ ຮອງຫົວໜ້າຫ້ອງການສຶກສາທິການ ແລະ ກິລາເມືອງ, ມີຄະນະອໍານວຍການໂຮງຮຽນ, ຄູອາຈານ, ຄູຝຶກ ແລະ ນ້ອງນັກຮຽນເຂົ້າຮ່ວມ.

ໃນພິທີສະຫາຍ ພັນຕີ ທອງຈັນ ຍອດທະສອນ ໄດ້ຂື້ນຜ່ານຂໍ້ຕົກລົງຂອງທ່ານເຈົ້າເມືອງຊຽງເງີນ ສະບັບເລກທີ 026/ຈມ.ມຊງ. ວ່າດ້ວຍການອານຸມັດໃຫ້ກອງບັນຊາການທະຫານເມືອງຊຽງເງີນ ເປີດຊຸດອົບຮົມການຮຽນ-ການສອນ ວິຊາສຶກສາປ້ອງກັນຊາດ ໃຫ້ນັກຮຽນຊັ້ນມໍປາຍ, ມສ ກິ່ວກະຈໍາ, ປະຈໍາປີ 2021 ພ້ອມທັງຜ່ານແຜນອົບຮົມ ເຊິ່ງໃນນັ້ນແມ່ນຈະໄດ້ຮຽນກ່ຽວກັບມູນເຊື້ອຂອງກອງທັບ, ກົດໝາຍພັນທະປ້ອງກັນຊາດ, 7 ຈັງຫວະພື້ນຖານ, ບຸກຄົນເຄື່ອນຍ້າຍອາໄສພູມມີປະເທດ, ຮຽນມ້າງປະກອບປື່ນ AK, CKC, ຄວາມຮູ້ພື້ນຖານກ່ຽວກັບໝາກແຕກ F1,ຈັ່ງຫວະ ແລະຫຼັກການໃນການຍິງບົດເປີດສາກ, ນອກນັ້ນ, ຍັງໄດ້ຮຽນຄວາມຮູ້ພື້ນຖານກ່ຽວກັບການຄ້າມະນຸດ ແລະລະບຽບການສັນຈອນເພື່ອຄວາມປອດໄພ, ຊຸດອົບຮົມຄັ້ງນີ້ມີນ້ອງນັກຮຽນເຂົ້າອົບຮົມທັງໝົດ 235 ນ້ອງ, ຍິງ 76 ນ້ອງ, ໃນນັ້ນມີຊັ້ນ ມໍ5 ເຖິງຊັ້ນ ມໍ7 ການອົບຮົມຈະດໍາເນີນໄປເປັນເວລາ 9 ວັນຈິ່ງອັດລົງ.

ຕອນທ້າຍຂອງພິທີສະຫາຍ ພັນໂທ ຄໍາແພງ ອານຸສຸກ ຍັງໄດ້ຮຽກຮ້ອງໃຫ້ນັກຮຽນແຕ່ລະຄົນເພີ່ມທະວີນ້ຳໃຈມານະອົດທົນ ເອົາໃຈໃສ່ຕິດຕາມສຶກສາຮໍ່າຮຽນນໍາຄູ-ອາຈານ, ກໍາແໜ້ນບັນດາທ່າຈັ່ງຫວະເພື່ອນໍາໄປໝູນໃຊ້ເຂົ້າໃນພາກປະຕິບັດຕົວຈິງໃຫ້ໄດ້ຮັບຜົນລໍາເລັດສູງ,  ປະຕິບັດກົດລະບຽບການອົບຮົມໃຫ້ເຂັ້ມງວດ ສໍາລັບຄະນະຊີ້ນໍາ ແລະ ຄູ-ອາຈານ ໃຫ້ເອົາໃຈໃສ່ ຕິດຕາມຄຸ້ມຄອງດ້ານຈໍານວນພົນໃນການຂື້ນຫ້ອງ-ລົງຫ້ອງຢ່າງໃກ້ສິດ, ເຮັດໃຫ້ບັ້ນອົບຮົມໃນຄັ້ງນີ້ດໍາເນີນໄປດ້ວຍຜົນສໍາເລັດຕາມລະດັບຄາດໝາຍ ແລະ ມີຄວາມປອດໄພ 100%.

ຂໍ້ມູນ: ບຸນມາ ແກ້ວວິເສດ

ຮຽບຮຽງ: ສົມພອນ ສຸວັນທອນ