ມີເດຍລາວແຂວງບໍ່ແກ້ວ ວັນທີ 6 ຕຸລາ 2021 ນີ້ ທ່ານ ວັນນາ ຄໍາສີປະເສີດ, ຮອງເລຂາພັກເມືອງ, ຜູ້​ຊີ້​ນໍາ​ວຽກ​ງານ​ຂົງ​ເຂດ​ພັກ -ພະນັກງານ, ຫົວໜ້າຄະນະສະເພາະກິດເພື່ອປ້ອງກັນ, ຄວບ​ຄຸມ, ຕ້ານ ​ແລະ ສະກັດກັ້ນການ​ແຜ່​ລະບາດ ຂອງພະຍາດໂຄວິດ-19 ເມືອງ​ເມິງ ໄດ້ລົງມອບເຄື່ອງອຸປະກອນການຮຽນ ແລະ ອຸປະກອນການຕ້ານພະຍາດໂຄວິດ 19 ໃຫ້ແກ່ນ້ອງນັກຮຽນຜູ້ທີ່ທຸກຍາກຂາດເຂີນ ຮຮ ມໍຕົ້ນຫົວນໍ້າຄາ ແລະ ຮຮ ມສ ນໍ້າຍູ້ ເມືອງເມິງ, ແຂວງບໍ່ແກ້ວ ໂດຍມີຄະນະ​ອໍານວຍ​ການ, ຄູ-ອາຈານ ແລະ ນ້ອງນ້ອຍນັກຮຽນທັງສອງໂຮງຮຽນເຂົ້າຮ່ວມ.

ເຄື່ອງທີ່ທາງຄະນະສະເພາະກິດໄດ້ນໍາມາມາອບໃຫ້ໃນຄັ້ງນີ້ ແມ່ນໄດ້ມາຈາກການປະກອບສ່ວນ ຂອງຄະນະນໍາຈາກແຂວງ, ຈາກເມືອງ ແລະ ການລະດົມ​ການ​ຊ່ວຍ​ເຫຼືອຈາກສັງຄົມ ເຊິ່ງກໍ່ໄດ້ມີການທະຍອຍ​ແຈກ​ຢາຍໃຫ້ແຕ່ລະໂຮງຮຽນພາຍໃນເມືອງ, ສໍາລັບ​​ເຄື່ອງ​ທີ່​ນໍາ​ມາ​ມອບ​ ​ໃຫ້ໂຮງຮຽນມໍຕົ້ນຫົວນໍ້າຄາ ແລະ ມສ ນໍ້າຍູ້ຄັ້ງນີ້ປະກອບມີ: ຜ້າອັດປາກອັດດັງ 60 ກັບ, ປື້ມຂຽນ 300 ຫົວ, ບິກ 150 ກ້ານ ແລະ ສໍດໍາ 150 ກ້ານ ​ເຊິ່ງກ່າວ​ມອບ​ໂດຍ​ທ່ານ ວັນນາ ຄໍາສີປະເສີດ, ຮອງເລຂາພັກເມືອງ, ຜູ້​ຊີ້​ນໍາ​ວຽກ​ງານ​ ຂົງ​ເຂດ​ພັກ -ພະນັກງານ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບ​ຄຸມ, ຕ້ານ ​ແລະ ສະກັດກັ້ນການ​ແຜ່​ລະບາດ ຂອງພະຍາດໂຄວິດ-19 ເມືອງ​ເມິງ ​ແລະ ກ່າວ​ຮັບ​ໂດຍ​ອໍານວຍ​ການ​ທັງ​ສອງ​ໂຮງຮຽນ.

ພ້ອມ​ກັນ​ນີ້ ທ່ານ ວັນນາ ຄໍາສີປະເສີດ ກໍ່ໄດ້ມີຄໍາເຫັນຕໍ່ຄູອາຈານ ແລະ ນ້ອງນ້ອຍນັກຮຽນ ໂດຍໃຫ້ຮູ້ວ່າ ເຄື່ອງທີ່​ໄດ້​ນໍາ​ມາ​ມອບໃນຄັ້ງນີ້ ແມ່ນດ້ວຍ​ຄວາມເປັນຫ່ວງເປັນ​ໄຍຈາກ​ການ​ນໍາພັກ ແລະ ລັດຂັ້ນ​ເທິງ ໂດຍສະເພາະ ແມ່ນຄະນະນໍາຂອງເມືອງເມິງ ​ກໍ່​ຄື​ຄະນະ​ນໍາຂອງ​ແຂວງບໍ່​ແກ້ວ ​ເພື່ອຊຸກຍູ້ສົ່ງເສີມ​ໃຫ້ນ້ອງນ້ອຍນັກຮຽນ ຜູ້ທີ່ທຸກຍາກຂາດເຂີນ ໃຫ້ໄດ້ເຂົ້າເຖິງການສຶກສາ, ​ມີ​ອຸປະກອນ​​ນໍາ​ໃຊ້​ເຂົ້າໃນ​ການ​ຄົ້ນຄວ້າຮໍ່າຮຽນ, ທັງ​ເປັນ​ການປະກອບສ່ວນ​​ເຂົ້າ​ໃນ​ການສ້າງຊັບພະຍາກອນມະນຸດ ໃຫ້ມີຄຸນນະພາບ ເພື່ອ​ເປັນຜູ້ສືບທອດພາລະກິດ​ຂອງ​ຊາດ ໃນຕໍ່ຫນ້າ ຕິດ​ພັນ​ກັບ​ການ​ປະຕິບັດ​ບັນດາມາດ​ຕະການ​ຕ່າງໆ ໃນ​ການ​ປ້ອງ​ກັນ​ພະຍາດ​ໂຄ​ວິດ 19 ຢູ່​ໃນ​ບັນດາໂຮງຮຽນ​ຢ່າງ​ເຂັ້ມ​ງວດ ​​ເພື່ອ​ເຮັດ​ໃຫ້ການ​ຈັດ​ຕັ້ງ​ປະຕິບັດ​ແຜນການ​ຮຽນ – ການ​ສອນ ​ຂອງ​ແຕ່ລະ​ໂຮງຮຽນ ​ໃຫ້​ດໍາ​ເນີນ​ໄປ​ເປັນ​ປົກກະຕິ ໃນສົກຮຽນ 2021 – 2022 ໃຫ້ສໍາເລັດຕາມລະດັບຄາດຫມາຍ ແລະ ປອດໄພຈາກພະຍາດໂຄວິດ 19.

ພາຍຫລັງທີ່ໄດ້ມອບເຄື່ອງໃຫ້ທັງສອງໂຮງຮຽນແລ້ວ ທ່ານ ວັນນາ ຄໍາສີປະເສີດ ກໍ່ໄດ້ລົງຢ້ຽມຢາມພະນັກງານແພດໝໍ ແລະ ອ້າຍນ້ອງ ປກຊ-ປກສ ທີ່ປະຈໍາຢູ່ຈຸດກວດກາຄົນເຂົ້າ – ອອກ​ເມືອງ ລະຫວ່າງ ຊາຍແດນເມືອງເມິງຫາເມືອງຫ້ວຍຊາຍ ເພື່ອເປັນການຕິດຕາມສະພາບ ຂອງການຈັດຕັ້ງປະຕິບັດວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ 19 ຢູ່​ພາຍ​ໃນ​ເມືອງ​ໃຫ້​ເຂັ້ມ​ງວດ ພ້ອມທັງໄດ້ລົງກວດກາຈຸດເສັ້ນທາງຕັດໃຫມ່ອ້ອມ​ດອຍ​ບ້ານ​ຊັ້ງ ເພື່ອຈະໄດ້ຕັ້ງຈຸດສະກັ້ນກັ້ນການລັກລອບເຂົ້າ – ອອກເມືອງ ຂອງປະຊາຊົນໃນຊ່ວງທີ່ມີການລະບາດຂອງພະຍາດໂຄວິດ 19 ນີ້ຕື່ມອີກ.

ພາບ – ຂ່າວ: ຄໍາໃຫຍ່ ຜົນຈະເລີນ.