ມີເດຍລາວແຂວງບໍ່ແກ້ວ ຂ່າວ: ພູມມາ ມະນີສອນ
ວັນທີ່ 17 ກັນຍາ 2021 ນີ້ ໂຮງໝໍເມືອງເມິງ, ແຂວງບໍ່ແກ້ວ ໄດ້ພ້ອມກັນສ້າງຂະບວນການອອກແຮງງານລວມ ຕັດຫຍ້າ ແລະ ອະນາໄມ ບໍລິເວນຂອບເຂດໂຮງໝໍຢ່າງເປັນຂະບວນການຟົດຟື້ນ.

ການອອກແຮງງານລວມຄັ້ງນີ້ ແມ່ນປະຕິບັດຕາມແຜນກິດຈະກໍາປະຈໍາອາທິດ ຂອງໂຮງໝໍເມືອງກໍານົດໄວ້ ເຊິ່ງພະນັກງານເເພດໝໍ ໄດ້ພາກັນຕັດຫຍ້າ, ເກັບຂີ້ເຫຍື້ອ, ອະນາໄມຫ້ອງນອນຄົນເຈັບ, ຜັດຖູພາສະນະຮັບໃຊ້ຄົນເຈັບ, ຜັດຖູຕາມພື້ນ ແລະ ລະບຽງໂຮງໝໍ ເພື່ອເປັນການອະນາໄມເຮັດໃຫ້ສະຖານທີ່ໂຮງໝໍຊຸມຊົນເມືອງເມິງ ມີຄວາມສະອາດງາມຕາ ແລະ ເປັນລະບຽບຮຽບຮ້ອຍ, ທັງເປັນການປະຕິບັດກິດຈະກໍາທຳຄວາມສະອາດພາສະນະ ແລະ ອຸປະກອນການແພດ ໃຫ້ມີຄວາມສະອາດ, ປອດເຊື້ອພະຍາດ ຈັດສັນ ໃຫ້ເປັນລະບຽບຮຽບຮ້ອຍ ຕິດພັນກັບການປະຕິບັດມາດຕະການ ໃນການປ້ອງກັນ, ສະກັດກັ້ນພະຍາດໂຄວິດ-19; ທັງເປັນການຈັດຕັ້ງປະຕິບັດກິດຈະກໍາ 5 ປໍ ທີ່ກະຊວງສາທາລະນະສຸກວາງອອກເປັນປະຈໍາທຸກໆອາທິດ ໃຫ້ເປັນປົກກະຕິ; ໂດຍສະເພາະ ແມ່ນທໍາລາຍແຫຼ່ງເພາະພັນຂອງໜອນນໍ້າຍຸງລາຍ, ໂດຍການເກັບມ້ຽນກະໂປະກະປ່ອງ, ພາສະນະຕ່າງໆ ທີ່ບໍ່ນໍາໃຊ້ແລ້ວມ້ຽນໄວ້ບ່ອນຮົ່ມ ແລະ ນໍາໄປທໍາລາຍຖິ້ມ.

ທັ້ງນີ້ ກໍ່ເພື່ອເຮັດໃຫ້ພື້ນທີ່ບໍລິເວນເດີ່ນ, ຕຶກອາຄານ, ຫ້ອງນອນຄົນເຈັບ ແລະ ອຸປະກອນການແພດພາຍໃນໂຮງໝໍຊຸມຊົນເມືອງເມິງ ໃຫ້ມີຄວາມສະອາດ, ປອດຈາກເຊື້ອພະຍາດ ແລະ ມີຄວາມເປັນລະບຽບຮຽບຮ້ອຍ ດັ່ງຄໍາຂວັນທີ່ວ່າ ກິນສະອາດ, ດື່ມສະອາດ ແລະ ຢູ່ສະອາດ ເພື່ອປ້ອງກັນພະຍາດ ຕາມຫຼັກການອະນາໄມ 3 ສະອາດວາງອອກຢ່າງເຂັ້ມງວດ.