ມີເດຍລາວແຂວງບໍ່ແກ້ວ ຂ່າວ: ເງິນຫຼົງ ຈິດພູວົງ ພາບ:ຄຳພັນ ແກ້ວມະນີ ໂຮງໝໍແຂວງບໍ່ແກ້ວ ໄດ້ຮັບການຊ່ວຍເຫຼືອປະເພດ ຫ້ອງທົດລອງສໍາເລັດຮູບສໍາລັບການກວດພະຍາດໂຄວິດ -19. ແລະ ມີອຸປະກອນລວມມີເຄື່ອງປັບອາກາດ ໄຟຟ້າ ລະບົບກອງອາກາດ ແລະ ໝູນວຽນຕາມມາດຖານ ເພື່ອຮອງຮັບອຸປະກອນ ຈາກກະຊວງການການຕ່າງປະເທດໄທ ມູນຄ່າ160 ລ້ານ ກວ່າກີບ.ພິທີມອບຮັບ ໄດ້ຈັດຂຶ້ນໃນວັນທີ 28 ພຶດສະພານິ້, ທີ່ດ່ານຂົວມິດຕະພາບລາວ-ໄທ ແຫ່ງທີ 4(ຊຽງຂອງ-ຫ້ວຍຊາຍ) ຕ່າງໜ້າຝ່າຍໄທມອບເຄື່ອງດັ່ງກ່າວ ໂດຍແມ່ນ ນາຍແພດ ວັດຊະຣະພົງ ຄໍາຫຼ້າ ຫົວໜ້າ ພະແນກສາທາລະນະສຸກ ຈັງຫວັດຊຽງຣາຍ ຮາຊະອານາຈັກໄທ, ຮັບແມ່ນ ດຣ ບຸນຍະເວດ ວົງຄໍາຊ່າວ ຫົວໜ້າ ພະແນກສາທາລະນະສຸກແຂວງບໍ່ແກ້ວ ມີບັນດາຄະນະອໍານວຍການໂຮງໝໍ,ພະນັກງານວິຊາການ ພາກສ່ວນທີ່ກ່ຽວຂ້ອງ, ເຈົ້າໜ້າທີ່ດ່ານ ແລະ ສື່ມວນສົນ ສອງຝ່າຍລາວ-ໄທ ເຂົ້າຮ່ວມ.ນອກຈາກມອບຫ້ອງທົດລອງ ເພື່ອກວດຫາເຊື້ອພະຍາດ ໂຄວິດ 19 ແລ້ວ.ອາທິດໜ້າທາງພະແນກສາທາລະນະສຸກ ຈັງຫວັດຊຽງຣາຍ ຈະສືບຕໍ່ມອບອຸປະກອນການແພດ ໃຫ້ໂຮງໝໍແຂວງບໍ່ແກ້ວຕືມອືກ ລວມມີເຄື່ອງກວດຫາເຊື້ອພະຍາດ ໂຄວິດ 19 ຄົບຊຸດ ຈໍານວນ 10 ລາຍການ ເພື່ອປະກອບເຂົ້າໃນຫ້ອງກວດດັ່ງກ່າວ ລວມມູນຄ່າການຊ່ວຍເຫຼືອທັງໝົດ 1.234.282,000 ກີບ.

ດຣ ບຸນຍະເວດ ວົງຄໍາຊ່າວ ຫົວໜ້າ ພະແນກສາທາລະນະສຸກແຂວງບໍ່ແກ້ວ ໄດ້ສະແດງຄວາມຮູ້ບຸນຄຸນ ມາຍັງທາງກະຊວງການຕ່າງປະເທດຂອງໄທ. ພະແນກສາທາລະນະສຸກ ຈັງຫວັດຊຽງຣາຍ ແລະ ພາກສ່ວນທີ່ກ່ຽວຂ້ອງ ທີ່ເປັນຫວ່ງເປັນໃຍໃນການສະໜັບໜູນ ຊ່ວຍເຫຼື່ອເຄື່ອງອຸປະກອນທີ່ຈໍາເປັນໃຫ້ແກ່ໂຮງໝໍແຂວງບໍ່ແກ້ວ.ທາງໂຮງໝໍແຂວງຈະນໍາໃຊ້ເຄື່ອງໃຫ້ຖືກເປົ້າໝາຍ ແລະ ໄດ້ຮັບຜົນປະໂຫຍດສູງສຸດ. ຈາກນັ້ນໄດ້ມອບໃບຍ້ອງຂອງທ່ານເຈົ້າແຂວງບໍ່ແກ້ວ ໃຫ້ແກ່ພາກສ່ວນທີ່ກ່ຽວຂ້ອງຂອງໄທ ທີ່ມີຄຸນງາມຄວາມດີໃນການສະໜັບສະໜູນມອບເຄື່ອງໃນຄັ້ງນິ້.