ມີເດຍລາວແຂວງວຽງຈັນ ພາບ-ຂ່າວ : ບຸນມາ ແກ້ວບຸດາ. ພິທີດັ່ງກ່າວໄດ້ຈັດຂຶ້ນ ໃນວັນທີ 17 ມິຖຸນາ 2021 ຢູ່ທີ່ຫ້ອງການປະກັນສັງຄົມແຂວງ ໂດຍການເປັນກຽດເຂົ້າຮ່ວມຂອງ ທ່ານ ພູວົງ ບຸນຊູ ຮອງເຈົ້າແຂວງວຽງຈັນ, ມີພະແນກການອ້ອມຂ້າງ, ພາກສ່ວນກ່ຽວຂ້ອງ, ພ້ອມດ້ວຍພະນັກງານພະແນກດັ່ງກ່າວເຂົ້າຮ່ວມ.

ໂດຍປະຕິບັດຕາມຂໍ້ຕົກລົງຂອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ວ່າດ້ວຍການໂຮມຂະແໜງປະກັນສັງຄົມ ແລະ ສູນບໍລິການກອງທຶນປະກັນສັງຄົມຂອງພະເເນກແຮງງານ ແລະ ສະຫວັດດີການສັງຄົມແຂວງ, ນະຄອນຫຼວງ ເປັນ ຫ້ອງການປະກັນສັງຄົມແຂວງ, ນະຄອນຫຼວງ ມີຖານະເທົ່າຂະແໜງ ສັງກັດໃນໂຄງປະກອບກົງຈັກຂອງພະແນກແຮງງານ ແລະ ສະຫວັດດີການສັງຄົມ ແຂວງ, ນະຄອນຫຼວງ ແລະຂໍ້ຕົກລົງຂອງທ່ານເຈົ້າແຂວງວຽງຈັນ ວ່າດ້ວຍການສ້າງຕັ້ງຫ້ອງການປະກັນສັງຄົມແຂວງວຽງຈັນໂດຍເປັນຫ້ອງການໜຶ່ງທີ່ຂຶ້ກັບພະແນກແຮງງານ ແລະ ສະຫວັດດີການສັງຄົມແຂວງ ແລະ ເຈົ້າແຂວງ ໄດ້ຕົກລົງ ເຫັນດີຊັບຊ້ອນ ແລະ ແຕ່ງຕັ້ງ ຫົວໜ້າ ແລະ ຮອງຫົວໜ້າຫ້ອງການປະກັນສັງຄົມ ແລະ ຫົວໜ້າໜ່ວຍງານ ຂອງຫ້ອງການປະກັນສັງຄົມແຂວງວຽງຈັນ ໂດຍໄດ້ແຕ່ງຕັ້ງ ທ່ານ ບົວສີ ລີນວົງສັກ ເປັນຫົວໜ້າຫ້ອງການປະກັນສັງຄົມແຂວງ.

ທ່ານ ນາງ ສົມສີ ສອນທະວີ ແລະ ທ່ານ ນາງ ຄີ້ມວາລີນ ດວງພະຈັນ ເປັນຮອງຫົວໜ້າຫ້ອງການປະກັນສັງຄົມແຂວງ. ທ່ານ ນາງ ພຸດທະສີ ທຳມະວົງໄຊ ເປັນຫົວໜ້າໜ່ວຍງານບໍລິຫານ-ກວດກາ. ທ່ານ ລັດຕະນະວົງ ອຸດົມ ເປັນຫົວໜ້າໜ່ວຍງານບໍລິການ. ທ່ານ ນາງ ສຸນາ ແກ້ວມາລາ ເປັນຫົວໜ້າໜ່ວຍງານບັນຊີ-ການເງິນ. ທ່ານ ນາງ ເກດມະນີ ຈັນທະນາລີ ຮອງຫົວໜ້າຂະແໜງປະກັນສັງຄົມ ເປັນຮອງຫົວໜ້າຂະແໜງຈັດຕັ້ງ ແລະ ກວດກາ ພະແນກແຮງງານ ແລະ ສະຫວັດດີການສັງຄົມແຂວງວຽງຈັນ.ໃນພິທີຍັງໄດ້ມີການອະນຸມັດໃຫ້ ທ່ານ ທອງໃບ ຜົງລໍາໄຍ ຫົວໜ້າສູນບໍລິການກອງທຶນປະການສັງຄົມແຂວງວຽງຈັນ ອອກພັກການ-ຮັບອຸດໜູນບຳນານ, ນັບແຕ່ຕັ້ງວັນທີ 01 ມັງກອນ 2021 ເປັນຕົ້ນໄປ, ລວມອາຍຸກະສຽນໄດ້ 61 ປີ; ລວມອາຍຸການໄດ້ 37 ປີ.