ມີເດຍລາວແຂວງໄຊຍະບູລີ
ແຂວງໄຊຍະບູລີຈູດທໍາລາຍຢາເສບຕິດ ເນື່ອງໃນໂອກາດສະເຫຼີມສະຫຼອງ ວັນແຫ່ງຊາດຕ້ານຢາເສບຕິດ ຄົບຮອບ 20 ປີ ຊຶ່ງໄດ້ຈັດຂຶ້ນໃນວັນທີ 12 ຕຸລາ 2021 ນີ້ຢູ່ທີ່ເດີ່ນກິລາຂອງແຂວງ. ໂດຍໃຫ້ກຽດເຂົ້າຮ່ວມມີ ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ມີຄະນະປະຈໍາພັກແຂວງ, ກໍາມະການພັກແຂວງ, ຫົວໜ້າ, ຮອງຫົວໜ້າພະແນກການ, ກົມກອງ, ນັກທຸລະກິດ ຜູ້ປະກອບການ, ປກຊ, ປກສ, ອໍານາດການປົກຄອງບ້ານ, ນາຍບ້ານໃນເທດສະບານ, ນັກຮຽນ, ນັກສຶກສາພາຍໃນເທດສະບານແຂວງເຂົ້າຮ່ວມ.

ໃນພິທີ ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ໄດ້ຍົກໃຫ້ເຫັນວ່າ: ບັນຫາຢາເສບຕິດໄດ້ກາຍເປັນໜຶ່ງໃນປະກົດການຫຍໍ້ທໍ້ຂອງສັງຄົມ, ການລະບາດຂອງຢາເສບຕິດໄດ້ກາຍມາເປັນໜໍ່ແໜງ ແລະ ເປັນເຫດຕົ້ນຕໍຂອງການເກີດຄວາມຮຸນແຮງ ແລະ ສິ່ງຫຍໍ້ທໍ້ຕ່າງໆ ເປັນໄພອັນຕະລາຍ, ມີຄວາມສ່ຽງສູງຕໍ່ຄວາມໝັ້ນຄົງຂອງລະບອບປະຊາທິປະໄຕ ປະຊາຊົນ ແລະ ກໍາລົງສົ່ງຜົນກະທົບໂດຍກົງຕໍ່ການພັດທະນາເສດຖະກິດ-ສັງຄົມ, ຕໍ່ຊີວິດສຸຂະພາບ ຂອງປະຊາຊົນບັນດາເຜົ່າ ໂດຍສະເພາະໄດ້ເບື່ອເມົາເຍົາວະຊົນ, ຊາວໜຸ່ມທີ່ເປັນກໍາລັງແຮງສືບທອດພາລະກິດ ແລະ ອະນາຄົດ ຂອງປະເທດຊາດ ກໍ່ຄືແຂວງໄຊຍະບູລີ.

ໃນຊຸມປີຜ່ານມາ ພັກ-ລັດຖະບານ ແຂວງ ກໍ່ຄືກໍາລັງປ້ອງກັນຄວາມສະຫງົບແຂວງ, ເມືອງ ໄດ້ຖືເອົາການສະກັດກັ້ນ ແລະ ແກ້ໄຂບັນຫາຢາເສບຕິດເປັນວຽກງານບູລິມະສິດໜຶ່ງທີ່ສໍາຄັນ ໂດຍໄດ້ສົມທົບຫຼາຍມາດຕະການເພື່ອແກ້ໄຂບັນຫາ, ໄດ້ສຶກສາອົບຮົມໃຫ້ປະຊາຊົນບັນດາເຜົ່າຮັບຮູ້ເຖິງຜົນຮ້າຍຂອງຢາເສບຕິດ, ໄດ້ສ້າງເງື່ອນໄຂໃຫ້ປະຊາຊົນຫັນໄປປະກອບອາຊີບອື່ນທີ່ໝັ້ນຄົງແທນການປູກຝິ່ນ, ໄດ້ປິ່ນປົວ, ຟື້ນຟູສຸຂະພາບ ແລະ ຝຶກອາຊີບໃຫ້ຜູ້ຖືກເຄາະຮ້າຍຈາກຢາເສບຕິດປະເພດຕ່າງໆ.

ປະຈຸບັນທົ່ວແຂວງມີສູນປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດ ຈໍານວນ 2 ແຫ່ງ, ເຂົ້າບໍາບັດປິ່ນປົວ 486 ຄົນ, ຍິງ 15 ຄົນ, ປິ່ນປົວດີສົ່ງຄືນກັບຄອບຄົວ 231 ຄົນ, ຍິງ 5 ຄົນ, ພວມປິ່ນປົວ 255 ຄົນ, ຍິງ 10 ຄົນ, ມີໂຮງໝໍຊຸມຊົນໃຫ້ຄໍາປຶກສາ ແລະ ປິ່ນປົວຜູ້ທີ່ຕິດຢາເສບຕິດ 3 ແຫ່ງຄື: ເມືອງປາກລາຍ, ເມືອງຊຽງຮ່ອນ ແລະ ເມືອງໄຊຍະບູລີ, ມີຜູ້ຕິດຢາເສບຕິດເຂົ້າປິ່ນປົວ 58 ຄົນ, ມີໂຮງຮຽນປອດຢາເສບຕິດ 81 ແຫ່ງ, ທຽບໃສ່ປີ 2020 ຫຼຸດລົງ 3 ແຫ່ງ ແລະ ບ້ານປອດຢາເສບຕິດ 258 ບ້ານ ເພີ່ມຂຶ້ນ 10 ບ້ານ ພ້ອມນີ້ຍັງໄດ້ຕັ້ງໜ້າມາດຕະການດ້ານກົດໝາຍຕໍ່ຜູ້ກະທໍາຜິດໃນການຄ້າ-ຂາຍຢາເສບຕິດ.

ໃນ 9 ເດືອນ ປີ 2021 ຜ່ານມາ ແຂວງໄຊຍະບູລີ ສາມາດມ້າງທໍາລາຍຄະດີ ໄດ້ 257 ເລື່ອງ, ທຽບໃສ່ປີ 2020 ເພີ່ມຂຶ້ນ 51 ເລື່ອງ ເທົ່າກັບ 19,84%, ມີຜູ້ຖືກຫາ 298 ຄົນ, ຍິງ 43 ຄົນ, ຍຶດຢາເສບຕິດປະເພດຢາບ້າໄດ້ 364.859 ເມັດ. ໃນປີ 2021 ສານປະຊາຊົນແຂວງ ຕັດສິນຄະດີຢາເສບຕິດໃຊ້ໄດ້ຢ່າງເດັດຂາດນັບແຕ່ເດືອນມິຖຸນາ 2020 ຫາເດືອນຕຸລາ 2021 ມີ 340 ເລື່ອງ, ທຽບໃສ່ປີ 2020 ເພີ່ມຂຶ້ນ 86 ເລື່ອງ ເທົ່າກັບ 25,29%, ມີນັກໂທດ 419 ຄົນ, ຍິງ 39 ຄົນ, ຕ່າງປະເທດ 1 ຄົນ. ໃນພິທີຍັງໄດ້ມີການທໍາລາຍຢາເສບຕິດທີ່ສານຕັດສິນແລ້ວ ຊຶ່ງປະກອບມີ ຢາບ້າ 308.033 ເມັດ, ນໍ້າໜັກ 34,052kg, ຢາຝິ່ນ 718,8g, ເຮໂລອິນ 795g ແລະ ສານເສບຕິດອື່ນໆອີກຈໍານວນໜຶ່ງ.
……………
ພາບ+ຂ່າວ: ບຸນທີ