ມີເດຍລາວແຂວງໄຊຍະບູລີ ຂ່າວ: ມະໄລວັນ
ພິທີມອບ-ຮັບປະກາສະນີຍະບັດຊຸດຮຽນທິດສະດີການເມືອງ-ການປົກຄອງ ຊັ້ນກາງຮຸ່ນທີ XVI ສົກປີ 2019-2021 ໄດ້ຈັດຂຶ້ນໃນວັນທີ 12 ເມສາ 2021 ນີ້ຢູ່ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ. ເປັນກຽດເຂົ້າຮ່ວມມີ ທ່ານ ຮອງສາດສະດາຈານ ພູວົງ ອຸ່ນຄໍາແສນ ກໍາມະການສູນກາງພັກ ເລຂາຄະນະບໍລິຫານງານພັກ ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ທ່ານ ດວງຕາ ໄຊວຸດ ຮອງເລຂາຄະນະບໍລິຫານງານພັກແຂວງໄຊຍະບູລີ, ມີຄະນະອໍານວຍການໂຮງຮຽນການເມືອງ ແລະ ການປົກຄອງແຂວງ, ມີຫົວໜ້າ, ຮອງຫົວໜ້າພະແນກການ, ກົມກອງ, ລັດວິສາຫະກິດ ອ້ອມຂ້າງແຂວງ ພ້ອມດ້ວຍຄູ-ອາຈານ ແລະ ນັກສຶກສາຊັ້ນກາງຮຸ່ນທີ XVIແລະ XVII ເຂົ້າຮ່ວມ.

ໃນພິທີ ທ່ານ ປອ ສີສອນພັນ ບຸນສີ ກໍາມະການພັກແຂວງ ຜູ້ອໍານວຍການໂຮງຮຽນການເມືອງ ແລະ ການປົກຄອງແຂວງໄຊຍະບູລີ ໄດ້ໃຫ້ຮູ້ວ່າ: ຊຸດຮຽນທິດສະດີການເມືອງ-ການປົກຄອງ ຮຸ່ນທີ XVI ນີ້ມີຜູ້ເຂົ້າຮຽນທັງໝົດ ຈໍານວນ 49 ສະຫາຍ, ຍິງ 9 ສະຫາຍ; ໃນນັ້ນມາຈາກພະແນກການ, ກົມກອງອ້ອມຂ້າງແຂວງ 25 ສະຫາຍ, ຍິງ 5 ສະຫາຍ, ມາຈາກ 11 ເມືອງທົ່ວແຂວງ 24 ສະຫາຍ, ຍິງ 4 ສະຫາຍ. ຊຸດຮຽນນໍາໃຊ້ເວລາຮຽນ 15 ເດືອນ, ມີວິຊາຮຽນທັງໝົດ 28 ວິຊາ, ແບ່ງອອກເປັນ 3 ໝວດວິຊາຄື: ໝວດວິຊາຄວາມຮູ້ທົ່ວໄປ, ໝວດວິຊາເຕັກນິກທົ່ວໄປ ແລະ ໝວດວິຊາສະເພາະ, ໃຊ້ເວລາໃນຫ້ອງຮຽນ 1.489 ຊົ່ວໂມງ ເທົ່າກັບ 93.6 ໜ່ວຍກິດ, ແບ່ງອອກເປັນ 3 ພາກຮຽນ, ການປະເມີນຜົນການຮຽນແບ່ງອອກເປັນ 3 ຮູບການຄື: ສອບເສັງຂຽນແບບອັດຕະໄນ, ປາລະໄນ, ສອບເສັງດ້ວຍການສອບເສັງປາກເປົ່າ ແລະ ປ້ອງກັນບົດຈົບຊັ້ນ. ຜ່ານການຈັດຕັ້ງປະຕິບັດການຮຽນ-ການສອນສາມາດສະຫຼຸບຜົນຂອງການສອບເສັງທຸກວິຊາ ແລະ ປ້ອງກັນບົດຈົບຊັ້ນ ໄດ້ 100%, ເກດ A ຄະແນນສະເລ່ຍ 4,0 ມີ 2 ສະຫາຍ ເທົ່າກັບ 4,08%, ເກດ B+ ສະເລ່ຍ 3,5 ມີ 41 ສະຫາຍ ເທົ່າກັບ 83,67%, ເກດ B ສະເລ່ຍ 3,0 ມີ 5 ສະຫາຍ ເທົ່າກັບ 10,20%, ເກດ C+ ຄະແນນສະເລ່ຍ 2,5 ມີ 1 ສະຫາຍ ເທົ່າກັບ 2,04%. ຍ້ອນນັກສຶກສາໄດ້ເອົາໃຈໃສ່ຕໍ່ການສຶກສາຮໍ່າຮຽນ, ປະຕິບັດກົດລະບຽບຂອງໂຮງຮຽນໄດ້ດີ, ຕັ້ງໜ້າຝຶກຝົນຫຼໍ່ຫຼອມຕົນເອງ ຈຶ່ງເຮັດໃຫ້ມີນັກສຶກສາຈໍານວນໜຶ່ງໄດ້ກາຍເປັນແບບຢ່າງ ແລະ ເປັນບຸກຄົນດີເດັ່ນຂອງຊຸດຮຽນ ຊຶ່ງສາມາດເລືອກເປັນຕົວເດັ່ນ ໄດ້ຮັບຍ້ອງຍໍຂອງໂຮງຮຽນປະເພດ I ມີ 15 ສະຫາຍ, ຍິງ 4 ສະຫາຍ ແລະ ປະເພດ II ມີ 13 ສະຫາຍ, ຍິງ 1 ສະຫາຍ. ໃນໂອກາດດຽວກັນນີ້ ທ່ານ ຮສ ພູວົງ ອຸ່ນຄໍາແສນ ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ໄດ້ໃຫ້ກຽດມອບໃບປະກາສະນີຍະບັດ ໃຫ້ນັກສຶກສາທີ່ຮຽນຈົບໃນຊຸດທິດສະດີການເມືອງການປົກຄອງແຂວງຮຸ່ນທີ XVI ແລະ ທ່ານ ປອ ສີສອນພັນ ບຸນສີ ໄດ້ຂຶ້ນມອບໃບຍ້ອງຍໍໃຫ້ນັກສຶກສາຮໍ່າຮຽນດີ-ມີວິໄນ ຈໍານວນ 15 ທ່ານ, ຍິງ 3 ທ່ານ, ໃບຊົມເຊີຍ ຈໍານວນ 12 ທ່ານ, ຍິງ 2 ທ່ານ ແລະ ໃບສໍາມະນາບຸນຄຸນ ຈໍານວນ 6 ທ່ານ.