ມີເດຍລາວແຂວງສາລະວັນ ຂ່າວ-ພາບ: ໂສພາ ສໍພະໄຊ
ການແຂ່ງຂັນປະກວດນັກຮ້ອງສຽງດີ, ໝໍລຳສຽງມ່ວນທົ່ວແຂວງສາລະວັນ ໄດ້ຈັດຂື້ນໃນຄັ້ງວັນທີ 1-2 ເມສາ 2021, ເຊິ່ງມີຜູ້ສະໝັກເຂົ້າປະກວດ 70 ຄົນ, ມີລຸ້ນເຍົາວະຊົນ ແລະລຸ້ນຊາວໝຸ່ມ ໄດ້ແບ່ງການແຂ່ງຂັນອອກແນວເພງລູກທົ່ງ ແລະແນວເພງສະຕິງລາວ.


ສຳລັບແນວເພງລູກທົ່ງລຸ້ນເຍົາວະຊົນຊະນະເລີດປະເພດບົດເພງໄດ້ແກ່ ນາງຕຸກຕາ ຈາກ ໂຮງຮຽນ ມໍສໍ ອົງແກ້ວ, ຮອງຊະນະເລີດ ທ້າວ ສາຍພອນ ໂຮງຮຽນ ມັດທະຍົມ ເມືອງວາປີ, ອັນດັບ 3 ທ້າວ ວິໄລສັກ ໂຮງຮຽນມັດທະຍົມບ້ານເຕົ້າປູນ. ປະເພດໝໍລຳຊະນະເລີດໄດ້ແກ່ ນາງ ອາຫຼິງ ເມືອງເລົ່າງາມ, ຮອງຊະນະເລີດໄດ້ແກ່ ນາງ ພຸດສະດີ ເມືອງເລົ່າງາມ, ອັນດັບ 3 ນາງ ພູວັນ ມໍຕົ້ນ ບ້ານເຕົ້າປູນ. ປະເພດບົດເພງລຸ້ນຊາວໝຸ່ມຊະນະເລີດໄດ້ແກ່ ທ້າວບຸນເຫຼືອ ຈາກທະຫານແຂວງ, ຮອງຊະເລີດ ນາງ ເປີ້ນ ໂຮງຮຽນ ມໍສໍ ສາລະວັນ, ອັນດັບ 3 ນາງອິນ ທະຫວາ ມໍສໍ ເມືອງເລົ່າງາມ. ປະເພດລຳລຸ້ນຊາວໝຸ່ມຊະນະເລີດໄດ້ແກ່ ທ້າວ ສຸກອານັນ ໂຮງຣຽນມໍສໍ ສາລະວັນ, ຮອງຊະເລີດໄດ້ແກ່ທ້າວ ຄຳພຽນ ທະຫານແຂວງ, ອັນດັບ 3 ໄດ້ແກ່ ທ້າວ ຄຳຜຸຍ ບ້ານນາຕູເມືອງເລົ່າງາມ. ປະເພດເພງສະຕິງຊະນະເລີດໄດ້ແກ່ ນາງ ຈຸລີ ຈາກທະຫານແຂວງ, ຮອງຊະນະເລີດໄດ້ແກ່ ນາງ ວົງສະຫວັນ ແລະອັນດັບ 3 ໄດ້ແກ່ທ້າວ ສອນປະສິດ ຮ້ານຖ່າຍຮູບສອນມີເດຍ. ຜູ້ຊະນະເລີດແມ່ນໄດ້ຮັບລາງວັນເງິນສົດ 800.000 ກີບ, ພ້ອມຂອງທີ່ລະນຶກ, ຮອງຊະນະເລີດ 500.000 ກີບ, ພ້ອມຂອງທີ່ລະນຶກ, ທີ 3 ໄດ້ຮັບເງິນສົດ300.000ກີບ ພ້ອມຂອງທີ່ລະນຶກ ແລະຜູ້ລະ100.000ກີບ ເປັນລາງວັນຊົມເຊີຍໃຫ້ຜູ້ທີໄດ້ເຂົ້າຮອບ.


ຂື້ນມອບລາງວັນຂອງຂວັນລາງໂດຍ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງສາລະວັນ, ໂດຍມີພະນັກງານການນຳຈາກແຂວງ, ເມືອງ ແລະພໍແມ່ປະຊາຊົນເຂົ້າຮ່ວມຊົມເຊຍຢ່າງຫຼວງຫຼາຍ, ການແຂ່ງຂັນໄດ້ຈັດຂື້ນທີ່ສະໂມສອນຂອງແຂວງສາລະວັນ. ງານປະກວດນັກຮ້ອງສຽງດີຄັ້ງນີ້ ເປັນການຂະຂວນການຄຳນັບຮັບຕ້ອນວັນສ້າງຕັ້ງຊາວໜຸ່ມປະຊາຊົນປະຕິວັດລາວ ຄົບຮອບ 66 ປີ(14/4/1955-14/4/2021).