ມີເດຍລາວແຂວງບໍ່ແກ້ວ ຂ່າວ ທອງເພັດ ໃນວັນທີ 4 ມິຖຸນານີ້, ໜ່ວຍງານຊ່ວຍເຫຼືອສັງຄົມ ກາໂທລິກລາວ ໄດ້ເອົາເຄື່ອງຊ່ວຍເຫຼືອໄປມອບໃຫ້ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ເມືອງຫ້ວຍຊາຍ ຢູ່ຫ້ອງການສາທາລະນະສຸກເມືອງ ນຳໂດຍທ່ານ ຄຸນພໍ່ ສູນທອນ ລັດຕະນາ ພ້ອມດ້ວຍຄະນະ ເຂົ້າຮ່ວມມີທ່ານ ບຸນລໍ້ ສີຜາວັນ ຮອງເລຂາພັກເມືອງ, ຫົວໜ້າຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຂັ້ນເມືອງ ພ້ອມດ້ວຍຄະນະ.

ເຄື່ອງທີ່ນຳໄປມອບຄັ້ງນີ້ ແມ່ນໄດ້ມາຈາກບັນດາຜູ້ທີ່ມີໃຈສັດທາຕ້ອງການຊ່ວຍເຫຼືອ ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຢູ່ເມືອງຫ້ວຍຊາຍ ທັງເປັນການສ້າງກຳລັງໃຈ ໃຫ້ພະນັກງານແພດ, ໝໍ ແລະ ຄະນະທີມງານທີ່ເຮັດໜ້າທີ່ວຽກງານຕ້ານສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ໃຫ້ປະຕິບັດໜ້າທີ່ຕໍ່ສູ້ກັບການລະບາດຂອງພະຍາດຮ້າຍແຮງ ດ້ວຍຄວາມປອດໄພ ເຄື່ອງທີ່ນຳມາມອບ ປະກອບມີ ຊຸດປ້ອງກັນພະຍາດໂຄວິດ 19 ຈຳນວນ 35 ຊຸດ, ເຈວລ້າງມື 25 ຂວດ, ຜ້າອັດປາກ 80 ກັບ, ໝີ່ຍຳໆ 35 ແກັດ, ປ່ອງປາ 25 ແພັກ ແລະ ນ້ຳດື່ມ 30 ແກັດ ລວມມູນຄ່າທັງໝົດ 10 ລ້ານກວ່າກີບ

ກ່າວມອບ ໂດຍທ່ານ ຄຸນພໍ່ ສູນທອນ ລັດຕະນາ ແລະ ກ່າວຮັບໂດຍທ່ານ ບຸນລໍ້ ສີຜາວັນ ຮອງເລຂາພັກເມືອງ, ຫົວໜ້າຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຂັ້ນເມືອງ ໄດ້ສະແດງຄວາມຂອບໃຈ ເປັນຢ່າງສູງ ທີ່ໄດ້ຮັບເຄື່ອງຊ່ວຍເຫຼືອຈາກໜ່ວຍງານຊ່ວຍເຫຼືອສັງຄົມ ກາໂທລິກລາວຄັ້ງນີ້ ທາງຄະນະຮັບຜິດຊອບຈະໄດ້ນຳເອົາເຄື່ອງຈຳນວນດັ່ງກ່າວໄປມອບໃຫ້ພະນັກງານ, ແພດ, ໝໍ ແລະ ຄະນະທີມງານທີ່ປະຕິບັດໜ້າທີ່ຢູ່ແຕ່ລະຈຸດຂອງເມືອງ ໃຫ້ເກີດປະໂຫຍດສູງສຸດ ພ້ອມທັງ ອວຍພອນໃຫ້ທ່ານ ຄຸນພໍ່ ສູນທອນ ລັດຕະນາ ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ ມີຜົນສຳເລັດໃນໜ້າທີ່ການງານ, ມີຄວາມສຸກໃນຊີວິດສ່ວນຕົວຄອບຄົວຕະຫຼອດໄປ

ນີ້ກໍ່ເປັນອີກໜຶ່ງພາກສ່ວນ ທີ່ໃຫ້ການຊ່ວຍເຫຼືອຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ກໍ່ຄື ພະນັກງານແພດ, ໝໍ ທີ່ກຳລັງປະຕິບັດໜ້າທີ່ອັນໜັກໜ່ວງ ໃຫ້ສືບຕໍ່ປະຕິບັດໜ້າທີ່ວຽກງານຢ່າງຕໍ່ເນື່ອງ ເພື່ອພ້ອມກັນຕ້ານ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ 19 ຢູ່ເມືອງຫ້ວຍຊາຍ ແຂວງບໍ່ແກ້ວ ໃຫ້ໝົດໄປເປັນກ້າວໆ.