ມີເດຍາວແຂວງໄຊສົມບູນ ຂ່າວ: ພາພອນ ນະວົງໄຊ
ພິທີຮັບເອົາມະຫາຊົນກ້າວໜ້າ ເຂົ້າເປັນສະມາຊິກພັກສໍາຮອງ ຂອງໜ່ວຍພັກພະແນກພະລັງງານ ແລະ ບໍ່ແຮ່ ແຂວງໄຊສົມບູນ ໄດ້ຈັດຂື້ນໃນຕອນເຊົ້າຂອງວັນທີ 20 ພຶດສະພາ ນີ້ ທີ່ຫ້ອງປະຊຸມລັດວິສາຫະກິດໄຟຟ້າລາວ ສາຂາ ແຂວງໄຊສົມບູນ. ໂດຍການເປັນປະທານຂອງ ສະຫາຍ ບຸນທຽມ ໄຊສົງຄາມ ເລຂາໜ່ວຍພັກພະແນກພະລັງງານ ແລະ ບໍ່ແຮ່ ແຂວງ, ມີຮອງເລຂາໜ່ວຍພັກ ພ້ອມດ້ວຍສະມາຊິກພັກພາຍໃນໜ່ວຍ ເຂົ້າຮ່ວມ.

ໃນພິທີ ສະຫາຍ ວິໄຊ ໄຍຍານສານ ຮອງເລຂາໜ່ວຍພັກພະແນກພະລັງງານ ແລະ ບໍ່ແຮ່ ແຂວງ, ໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການອະນຸມັດຮັບເອົາມະຫາຊົນກ້າວໜ້າ ເຂົ້າເປັນສະມາຊິກພັກສໍາຮອງ ຂອງໜ່ວຍພັກພະແນກພະລັງງານ ແລະ ບໍ່ແຮ່ ແຂວງ ຈໍານວນ 1 ສະຫາຍ ຄື ສະຫາຍ ບຸນເພັງ ໄຊຍະບຸນເພັງ. ຈາກນັ້ນ, ສະຫາຍເລຂາໜ່ວຍພັກ ໄດ້ຂຶ້ນຈັບມື ແລະ ມອບມະຕິຕົກລົງໃຫ້ມະຫາຊົນກ້າວໜ້າ ເພື່ອເປັນການຢັ້ງຢືນເຂົ້າເປັນສະມາຊິກພັກສໍາຮອງຢ່າງເປັນທາງການ.

ໂອກາດດັ່ງກ່າວ ສະຫາຍ ບຸນທຽມ ໄຊສົງຄາມ ເລຂາໜ່ວຍພັກພະແນກພະລັງງານ ແລະ ບໍ່ແຮ່ ແຂວງ ໄດ້ມີຄໍາເຫັນໂອ້ລົມຕໍ່ສະມາຊິກພັກສໍາຮອງ ຈົ່ງເອົາໃຈໃສ່ຝົກຝົນຫຼໍ່ຫຼອມຕົນເອງໃຫ້ມີຄວາມຫ້າວ ຫັນຕໍ່ໜ້າທີ່ວຽກງານໃນທຸກດ້ານ ໂດຍສະເພາະແມ່ນດ້ານວຽກງານວິຊາສະເພາະ ແລະ ວຽກງານຂະບວນການຕ່າງໆ ເພື່ອໃຫ້ຕົນເອງກາຍເປັນສະມາຊິກສົມບູນໃນຕໍ່ໜ້າ. ນອກນັ້ນ, ທ່ານຍັງໄດ້ເໜັ້ນໜັກໃຫ້ຄະນະພັກຕະຫຼອດຮອດສະມາຊິກພັກທຸກສະຫາຍ ຈົ່ງເອົາໃຈໃສ່ສຶກສາອົບຮົມການເມືອງແນວຄິດ ໃຫ້ເປັນປົກກະຕິ, ມີຄວາມສາມັກຄີເປັນປຶກແຜ່ນ ແລະ ມີຄວາມຫ້າວຫັນຕໍ່ໜ້າທີ່ວຽກງານທີ່ພັກ-ລັດມອບໝາຍ ພ້ອມທັງເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະຂອງຕົນ ໃຫ້ສາມາດໄດ້ຮັບຜົນສໍາເລັດຕາມແຜນການທີ່ວາງໄວ້.