ມີເດຍລາວແຂວງໄຊສົມບູນ ບັນນາທິການ ຂ່າວ: ນາງ ຕູດຄໍາພໍໃຈ ໜ່ວຍພັກພະແນກແຮງງານ ແລະ ສະຫວັດດີການສັງຄົມ ແຂວງໄຊສົມບູນ ຈັດກອງປະຊຸມ ເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ I ຂອງອົງຄະນະພັກແຂວງໄຊສົມບູນ ພ້ອມທັງສະຫລຸບວຽກງານ 6 ເດືອນຕົ້ນປີ ແລະ ວາງ ທິດທາງແຜນການ 6 ເດືອນທ້າຍປີ 2021 ໄດ້ຈັດຂຶ້ນໃນວັນທີ 21 ມິຖຸນາ 2021 ນີ້ ທີ່ຫ້ອງປະຊຸມຂອງຕົນ ໂດຍການ ເປັນປະ ທານ ຂອງສະຫາຍ ວັນຄໍາເກັ່ງ ຢ່າຊົ່ງກົວ, ກໍາມະການພັກແຂວງ ຫົວຫນ້າພະແນກແຮງງານ ແລະ ສະຫວັດດີການສັງຄົມ ແຂວງ, ມີຮອງເລຂາໜ່ວຍພັກ, ມີຕ່າງຫນ້າຄະນະໂຄສະນາອົບຮົມແຂວງ, ມີຫົວໜ້າຂະແໜງ-ຮອງຂະແໜງ ຕະຫລອດຮອດພະນັກງານ ພາຍໃນພະແນກ ເຂົ້າຮ່ວມ.

ກ່ອນຈະໄປເຊື່ອມຊຶມບັນດາເອກະສານຕ່າງໆ ສະຫາຍ ວັນຄໍາເກັ່ງ ຢ່າຊົ່ງກົວ ໄດ້ຍົກໃຫ້ເຫັນເຖິງຄວາມໝາຍ-ຄວາມສຳຄັນ ໃນການເຊື່ອມຊຶມມະຕິກອງ ປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ I ຂອງອົງຄະນະພັກ ແຂວງໄຊສົມບູນ ໃນຄັ້ງນີ້ແມ່ນເພື່ອເຮັດໃຫ້ບັນດາສະຫາຍສະມາຊິກພັກ-ພະນັກງານຫຼັກແຫຼ່ງກໍາໄດ້ ເນື້ອໃນຄາດໝາຍ ຂອງ ພັກຢ່າງຈະແຈ້ງ ສະນັ້ນ ສະຫາຍຈຶ່ງໄດ້ຮຽກຮ້ອງ ໃຫ້ພະນັກງານຫຼັກແຫຼ່ງພາຍໃນພະແນກຂອງຕົນ ຈົ່ງ ກຳແໜ້ນເນື້ອໃນ ກອງ ປະຊຸມຂອງພັກ ດ້ວຍຄວາມເອົາໃຈໃສ່ ເພື່ອນຳໄປຈັດຕັ້ງປະຕິບັດ ຢູ່ວຽກງານຂອງຕົນ ໃຫ້ມີປະສິດທິພາບ ແລະ ປະສິດທິພົນ ດີຂຶ້ນເລື້ອຍໆ.

ຈາກນັ້ນ ສະຫາຍໄດ້ເຜີຍແຜ່ມະຕິກອງປະຊຸມໃຫຍ່ ຄັ້ງທີ XI ຂອງພັກ. ພ້ອມນັ້ນ ສະຫາຍ ສົມເພັດ ວົງພະຈິດ, ຮອງເລຂາໜ່ວຍ ພັກພະແນກແຮງ ການ ແລະ ຫວັດດີການສັງຄົມ ແຂວງ ໄດ້ຂຶ້ນຜ່ານມະຕິກອງປະຊຸມໃຫຍ່ ຄັ້ງທີ 1 ຂອງອົງຄະນະພັກ ແຂວງໄຊສົມບູນ. ການເຊື່ອມຊຶມມະຕິໃນຄັ້ງນີ້ ກໍເພື່ອເຮັດໃຫ້ພະນັກງານຫຼັກແຫຼ່ງຂອງພະແນກ ໄດ້ຮັບຮູ້ ແລະ ເຂົ້າໃຈ ຢ່າງເລິກເຊິ່ງ ແລະ ສາມາດນຳໄປຈັດຕັ້ງປະຕິບັດໃນຂົງເຂດວຽກງານ ທີ່ຕົນຮັບຜິດຊອບ ໃຫ້ມີປະສິດທິພາບ ພ້ອມທັງ ກຳແໜ້ນເນື້ອໃນ ຂອງມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມ ຄັ້ງທີ 1 ຂອງອົງຄະນະພັກ ແຂວງໄຊສົມບູນ ໂດຍສະເພາະແມ່ນເນື້ອໃນທີ່ສຳຄັນຕົ້ນຕໍ່ ແລະ ວຽກງານຈຸດສຸມ ທີ່ຕ້ອງເອົາໃຈໃສ່ນຳພາ-ຊີ້ນຳ ໃນແຕ່ລະຂົງ ເຂດວຽກງານ ຕາມຄວາມຮັບຜິດຊອບ ຂອງຕົນ ໃນການຫັນມະຕິກອງປະຊຸມໃຫຍ່ ຄັ້ງທີ 1 ຂອງອົງຄະນະພັກ ແຂວງໄຊສົມບູນ ໃຫ້ເປັນແຜນງານ, ໂຄງການ ແລະ ກິດຈະການລະອຽດຂອງຕົນ ເພື່ອຈັດຕັ້ງປະຕິບັດໃຫ້ເກີດໝາກຜົນຕົວຈິງ.

ພ້ອມດຽວກັນນີ້ ໃນກອງປະຊຸມຍັງໄດ້ຮັບຟັ້ງການຜ່ານບົດສະຫລຸບຂອງໜ່ວຍພັກພະແນກແຮງງານ ແລະ ສະຫວັດດີການສັງຄົມ ແຂວງ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2021 ຊຶ່ງໃນໄລຍະ ຜ່ານມາຄະນະໜ່ວຍພັກໄດ້ ເອົາໃຈໃສ່ສຶກສາອົບຮົມ ການເມືອງ-ແນວຄິດ ໃຫ້ສະມາຊິກພັກພະນັກງານ-ລັດຖະກອນ ເປັນວຽກກົກ ຊຶ່ງໄດ້ເອົາບັນດາເອກະສານຕ່າງໆຂອງພັກມາ ເຊື່ອມຊຶມໃຫ້ສະມາຊິກພັກເປັນປົກກະຕິ ໂດຍຕິດພັນກັບການຈັດຕັ້ງ, ກໍ່ສ້າງ ແລະ ຂະຫຍາຍພັກ ໃນນີ້ໄດ້ນໍາສົ່ງພະນັກງານ ຫຼັກແຫຼ່ງ 2 ສະຫາຍ ລົງຫາກຖານຢູ່ ຫ້ອງການສາຍຕັ້ງ ແລະ ບ້ານ, ຕິດຕາມກໍ່ສ້າງມະຫາຊົົນ ກ້າວໜ້າ, ສະເໜີຮຽນກົດລະບຽບ ຂອງພັກຈໍານວນ 4 ສະຫາຍ, ຍິງ 1 ສະຫາຍ, ໄດ້ເລື່ອນສະມາຊິກ ພັກສໍາຮອງເຂົ້າເປັນສະ ມາຊິກພັກສົມບູນ 1 ສະຫາຍ, ເກັບເງິນສະຖິຕິເປັນປົກກະຕິ ໄດ້ທັງໝົດ 738,000 ກີບ, ມອບເຂົ້າໃຫ້ຄະນະພັກຂັ້ນເທິງຈໍານວນ 150,000 ກີບ ແລະ ມີ ເງິນກອງທຶນພັກຈໍານວນ 3,630,000 ກີບ.

ພ້ອມນີ້ວຽກງານວິຊາ ສະເພາະ ກໍ່ໄດ້ຈັດຕັ້ງປະຕິບັດມີຜົນສາໍເລັດຫລາຍດ້ານ ເປັນ ຕົ້ນແມ່ນ ວຽກງານຄຸ້ມຄອງແຮງງານ ໄດ້ລົງກວດກາແຮງງານລາວ-ແຮງງານ ຕ່າງປະເທດ ໄດ້ຈໍານວນ 45 ຫົວໜ່ວຍ ເທົ່າກັບ 118,4% ຂອງແຜນການປີ, ມີແຮງງານທັງໝົດ 1,572 ຄົນ, ຍິງ 175 ຄົນ ໃນນັ້ນ ແຮງງານຕ່າງປະເທດຈໍານວນ 231 ຄົນ ຍິງ 17 ຄົນ, ນອກນີ້ ວຽກງານພັດທະນາສີມືແຮງງານ, ວຽກງານນະໂນບາຍ, ວຽກ ງານສັງຄົມສົງເຄາະ, ວຽກງານປະກັນສັງ ຄົມ ແລະ ວຽກງານກວດກູ້ລະເບີດ ກໍໄດ້ຈັດຕັ້ງປະຕິບັດສໍາເລັດ ຕາມຄາດໝາຍ ທີ່ໄດ້ກໍານົດໄວ້.