ພິທີມອບ – ຮັບ ໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ຂອງໜ່ວຍພັກຮາກຖານຄະນະຈັດຕັ້ງແຂວງ ຈຳປາສັກ ປະຈຳປີ 2020 ໄດ້ມີຂື້ນ ໃນວັນທີ 6 ເມສາ 2021 ທີ່ຫ້ອງການຄະນະຈັດຕັ້ງແຂວງ ຈຳປາສັກ ໂດຍການເປັນກຽດ ເຂົ້າຮ່ວມຂອງ ສະຫາຍ ສະນັ່ນ ສີພາພົມມະຈັນ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງຈໍາປາສັກ, ສະຫາຍ ພອນໄຊ ເກດມາລາ ເລຂາໜ່ວຍພັກຮາກຖານ ຄະນະຈັດຕັ້ງແຂວງ, ຮອງຫົວໜ້າຄະນະຈັດຕັ້ງແຂວງຈໍາປາສັກ, ສະຫາຍ ຕິ່ງແກ້ວ ບຸບຜາລາວັນ ຮອງປະທານຄະນະກວດກາພັກ ແຂວງຈຳປາສັກ, ມີ ສະຫາຍຮອງເລຂາໜ່ວຍພັກ, ຄະນະກຳມະການ ກວດກາປະເມີນຜົນ ຂັ້ນແຂວງ, ບັນດາ ສະຫາຍ ສະມາຊິກພັກສົມບູນ, ສໍາຮອງ ພາຍໃນ ໜ່ວຍພັກຮາກຖານ ຄະນະຈັດຕັ້ງ ແຂວງຈໍາປາສັກ ເຂົ້າຮ່ວມ.


ສະຫາຍ ພອນໄຊ ເກດມາລາ ເລຂາໜ່ວຍພັກຮາກຖານ ຄະນະຈັດຕັ້ງແຂວງ ໄດ້ຂື້ນຜ່ານບົດສະຫຼຸບ ປະຈຳ ປີ 2020 ແລະ ທິດທາງແຜນການ ຂອງການກໍ່ສ້າງ ໜ່ວຍພັກປອດໃສ ເຂັ້ມແຂງ ໜັກແໜ້ນ ປີ 2021. ໜ່ວຍພັກຮາກຖານຄະນະຈັດຕັ້ງແຂວງ ຈຳປາສັກ ມີຄະນະໜ່ວຍພັກ 3 ສະຫາຍ, ມີສະມາຊິກພັກທັງໝົດ 26 ສະຫາຍ, ຍິງ 7 ສະຫາຍ. ມີໜ້າຕົວຈິງ 22 ສະຫາຍ, ຍິງ 7 ສະຫາຍ, ສຳຮອງ 3 ສະຫາຍ.

ຜ່ານການ ຕີລາຄາການເຄື່ອນໄຫວ, ດ້ານດີ, ດ້ານອ່ອນ ແມ່ນໄດ້ສຳເລັດການດຳເນີນກອງປະຊຸມໃຫຍ່ 3 ຂັ້ນ ໄດ້ 100%, ກໍ່ສ້າງປະເມີນໜ່ວຍພັກປອດໃສ ເຂັ້ມແຂງ ໜັກແໜ້ນ ແລະ ໄດ້ຮັບຮອງເປັນ ໜ່ວຍພັກ ປອດໃສ ເຂັ້ມແຂງ ໜັກແໜ້ນ ປີ 2020 = 90,16%, ອອກບັດສະມາຊິກພັກໄດ້ 19,305 = 74,61% ໂຄງການປະກອບຄະນະພັກແຕ່ລະຂັ້ນຮັບປະກັນ, ເງື່ອນໄຂ, ຖືກທິດຫັນເປັນໜຸ່ມ.

ພ້ອມກັນນັ້ນ ກໍ່ມີທິດທາງແຜນການປີ 2021 ແມ່ນຈະສືບຕໍ່ວຽກງານສຶກສາອົບຮົມການເມືອງ-ແນວຄິດ ໃຫ້ພະນັກງານ-ລັດຖະກອນພາຍໃນ ຫ້ອງການຄະນະຈັດຕັ້ງແຂວງ, ເດັດດ່ຽວສືບຕໍ່ກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ເພີ່ມທະວີຄວາມເປັນເຈົ້າການ ໃນການຈັດຕັ້ງປະຕິບັດວຽກງານດ້ວຍຄວາມຮັບຜິດຊອບສູງ. ດັ່ງນັ້ນ ຄະນະປະຈຳພັກແຂວງຈຳປາສັກ ຈິ່ງໄດ້ມອບ ໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2020 ໃຫ້ໜ່ວຍພັກຮາກຖານຄະນະຈັດຕັ້ງແຂວງ ຈຳປາສັກ ເພື່ອຢັ້ງຢືນເຖິງຜົນງານ.

ຂ່າວ: ທັດຊະນະ