ມີເດຍລາວແຂວງເຊກອງ ພາບ-ຂ່າວ: ພຸດທະສອນ ໃນວັນທີ 11 ມິຖຸນາ 2021 ນີ້ ໄດ້ມີພິທີມອບ-ຮັບ ໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2020 ຂອງໜ່ວຍພັກຮາກຖານຄະນະບໍລິຫານງານຊາວໜຸ່ມປະຊາຊົນປະຕິວັດລາວ (ຄຊປປລ) ແຂວງເຊກອງ ໂດຍການເປັນກຽດເຂົ້າຮ່ວມຂອງ ສະຫາຍ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ, ມີສະຫາຍ ປອ ຕຸລາວັນ ວົງໄຊ ກໍາມະການພັກແຂວງ, ເລຂາໜ່ວຍພັກ, ເລຂາ ຄຊປປລ ແຂວງ, ພ້ອມດ້ວຍຄະນະໜ່ວຍພັກ, ສະມາຊິກພັກພາຍໃນໜ່ວຍ ແລະແຂກຖືກເຊີນເຂົ້າຮ່ວມ.

ໃນພິທີ ສະຫາຍ ປອ ຕຸລາວັນ ວົງໄຊ ເລຂາໜ່ວຍພັກ ໄດ້ສະຫລຸບລາຍງານການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020 ວ່າ: ໃນໄລຍະ 1 ປີຜ່ານມາ ຄະນະໜ່ວຍພັກໄດ້ເອົາໃຈໃສ່ສຶກສາອົບຮົມການເມືອງ-ນຳພາແນວຄິດ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມຈົ່ງຮັກພັກດີຕໍ່ອຸດົມການຂອງພັກ, ມີນໍ້າໃຈເສຍສະຫຼະ ດ້ວຍການນໍາພາດໍາເນີນຊີວິດການເມືອງເປັນປົກກະຕິ, ເອົາໃຈໃສ່ນຳເອົາແນວທາງນະໂຍບາຍຂອງພັກ, ມະຕິຄຳສັ່ງ, ລະບຽບກົດໝາຍຂອງລັດ ມາເຜີຍແຜ່ໃຫ້ແກ່ສະມາຊິກພັກ-ພະນັກງານ ຮັບຮູ້-ເຂົ້າໃຈຕໍ່ແນວທາງປ່ຽນແປງໃໝ່ຂອງພັກ ຕ້ານປະກົດການຫຍໍ້ທໍ້ຕ່າງໆ ທີ່ເກີດຂຶ້ນພາຍໜ່ວຍພັກ; ນອກນີ້ ຍັງໄດ້ໂຄສະນາເຜີຍແຜ່ກົດລະບຽບຊາວໜຸ່ມຕະລຸມບອນ ໄດ້ 1 ຄັ້ງ ປະກອບ 10 ຮາກຖານ 32 ໜ່ວຍ ແລະ 4 ເມືອງ ມີ 1.593 ສະຫາຍ, ຍິງ 579 ສະຫາຍ, ປະຈຸບັນມີສະມາຊິກຊາວໜຸ່ມຕະລຸມບອນທັງໝົດ 431 ສະຫາຍ, ຍິງ 93 ສະຫາຍ, ຊຸກຍູ້ການສ້າງຂະບວນການຂໍ້ແຂ່ງຂັນ 4 ບຸກໄດ້ 23 ຄັ້ງ ມີ 42 ໜ່ວຍ, ປະກາດຮັບຮອງຂໍ້ແຂ່ງຂັນ 4 ບຸກ ປີ 2020 ມີ 9 ຮາກຖານ, 1 ພະແນກການ, 32 ໜ່ວຍ, ຂັ້ນເມືອງແມ່ນສໍາເລັດ 3 ເມືອງ, ພ້ອມນີ້ ກໍໄດ້ຜ່ານແຜນການກໍ່ສ້າງໜ່ວຍພັກປອດໃສ,ເຂັ້ມແຂງ,ໜັກແໜ້ນ ປະຈຳປີ 2021 ຕື່ມອີກ.


ໂອກາດນີ້ ສະຫາຍ ເຫຼັກໄຫຼ ສີວິໄລ ກໍໄດ້ໃຫ້ກຽດມອບໃບຢັ້ງຢືນ ແລະໂອ້ລົມໃຫ້ທິດຊີ້ນໍາຫຼາຍບັນຫາ ແລະຮໜກຮ້ອງໃຫ້ຄະນະໜ່ວຍພັກ ຕ້ອງຖືສໍາຄັນວຽກງານສຶກສາອົບຮົມການເມືອງ-ນໍາພາແນວຄິດໃຫ້ແກ່ສະມາຊິກພັກ-ພະນັກງານ ກໍຄືສະມາຊິກຊາວໜຸ່ມ,ໄວໜຸ່ມ, ເຍົາວະຊົນ ໃຫ້ເຂົ້່ໃນຢ່າງເລິກເຊິ່ງ ແລະກໍາແໜ້ນແນວທາງການປ່ຽນແປງໃໝ່ຂອງພັກ; ສຸມໃສ່ການປັບປຸງການຈັດຕັ້ງຂອງໜ່ວຍພັກໃຫ້ມີຄວາມໜັກແໜ້ນເຂັ້ມແຂງ, ປັບປຸງແບບແຜນການນໍາພາໃຫ້ມີຄວາມເຂັ້ມແຂງຂຶ້ນກວ່າເກົ່າ, ເປັນເຈົ້າການເຂົ້າຮ່ວມຂະບວນການແຂ່ງຂັນໃນຂະບວນການຕ້ານ ແລະສະກັດກັ້ນປະກົດການຫຍໍ້ທໍ້ໃນສັງຄົມ ຄຽງຄູ່ກັບການປະຕິບັດວຽກງານວິຊາສະເພາະຂອງຕົນ ຕາມແຜນການທີ່ວາງໄວ້ໃຫ້ມີຜົນສໍາເລັດ ແລະມີປະສິດທິຜົນດີລື່ນເກົ່າ