ມີເດຍລາວແຂວງສາລະວັນ ໂດຍ: ກິນດາວັນ ອ້ວນນາຄູ ໃນວັນທີ 18 ມິຖຸນາ 2021 ຢູ່ທີ່ຫ້ອງປະຊຸມສະພາປະຊາຊົນແຂວງສາລະວັນ ໄດ້ຈັດພິທີຮັບເອົາມະຫາຊົນທີ່ມີຄວາມກ້າວໜ້າ ເຂົ້າເປັນສະມາຊິກພັກສໍາຮອງ ໃຫ້ກຽດເປັນປະທານໂດຍ ສະຫາຍ ສາຍສະໝອນ ອິນທິເສນ ເລຂາໜ່ວຍພັກສະພາປະຊາຊົນແຂວງສາລະວັນ, ສະຫາຍ ນາງ ສູນໄຖ ໄຊຍະແສງ ກໍາມະການພັກແຂວງ, ຮອງປະທານສະພາປະຊາຊົນແຂວງ, ມີບັນດາສະຫາຍຕາງໜ້າຈາກຄະນະໜ່ວຍພັກອ້ອມຂ້າງທີ່ກ່ຽວຂ້ອງ ແລະ ສະມາຊິກພັກພາຍໃນໜ່ວຍເຂົ້າຮ່ວມ.

ພິທີດັ່ງກ່າວໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍ: ການຕົກລົງເຫັນດີຮັບເອົາມະຫາຊົນທີ່ມີຄວາມກ້າວໜ້າ ເຂົ້າເປັນສະມາຊິກພັກສໍາຮອງ ຈໍານວນ 4 ສະຫາຍ ຄື: ສະຫາຍ ຄໍາຜ່ອນ ຍີ່ວົງສາ, ສະຫາຍ ນາງ ວິນິດໃສ ຊະນະສິດ, ສະຫາຍ ນາງ ຍົມມະລີ ບົວໄລ, ສະຫາຍ ນາງ ຄັດສອນ ຮຸ່ງສະຫວັນ, ເຊິ່ງພວກຜູ້ກ່ຽວໄດ້ຜ່ານຂະບວນການຕິດຕາມກວດກາຢ່າງໄກ້ຊິດຈາກຄະນະໜ່ວຍພັກຂອງຕົນ, ທີ່ເຫັນວ່າມີຄວາມຈູບຈ້າວຫ້າວຫັນໃນໜ້າທີ່ວຽກງານວິຊາສະເພາະ, ມີຈິດໃຈຂາວສະອາດ, ບໍລິສຸດສັດຊື່, ຮັກຊາດ ແລະມີຄວາມສະມະຄີພາຍໃນ-ພາຍນອກຢ່າງກ້ວາງຂວາງ

ດັ່ງນັ້ນໜ່ວຍພັກ ສະພາປະຊາຊົນແຂວງສາລະວັນ ຈິ່ງຈັດພິທີຮັບເອົາເຂົ້າເປັນສຳມະຊິກພັກປະຊາຊົນປະຕິວັດລາວຢ່າງເປັນທາງການ.ເພື່ອເຮັດໃຫ້ສະມາຊິກພັກສໍາຮອງໃໝ່ ໄດ້ຮັບຮູ້ ແລະ ເຂົ້າໃຈຕໍ່ພາລະບົດບາດ, ສິດ ແລະ ໜ້າທີ່ຂອງສະມາຊິກພັກ, ຕອນທ້າຍສະຫາຍ ນາງ ສູນໄຖ ໄຊຍະແສງ ກໍໄດ້ໃຫ້ກຽດໂອ້ລົມຕໍ່ມະຫາຊົນກ້າວໜ້າໂດຍ ສະຫາຍໄດ້ເນັ້ນໃຫ້ສະມາຊິກພັກສໍາຮອງໃໝ່ ຈົ່ງບຸກບືນຫ້າວຫັນ, ຝຶກຝົນຫຼໍ່ຫຼອມຕົນເອງເຮັດໃຫ້ໄດ້ຄວາມເຊື່ອໝັ້ນຈາກສະມາຊິກພັກ, ຄະນະໜ່ວຍພັກ ແລະ ຈາກຄະນະພັກຂັ້ນເທິງໃຫ້ກາຍເປັນສະມາຊິກພັກທີ່ດີຂອງຊາດໃນອະນາຄົດ.