ໜ່ວຍພັກ ສະຫະພັນແມ່ຍິງແຂວງສາລະວັນ ສະຫຼຸບການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2020, ເຊິ່ງໄດ້ຈັດຂຶ້ນໃນວັນທີ 5 ເມສາ 2021 ນີ້, ທີ່ຫ້ອງປະຊຸມຂອງຕົນໂດຍການເປັນປະທານຂອງ ສະຫາຍ ນາງ ວາດສະໜາ ໂພໄຊຍະວົງ ກໍາມະການພັກແຂວງ ເລຂາໜ່ວຍພັກ ປະທານສະຫະພັນແມ່ຍິງແຂວງ, ເຂົ້າຮ່ວມຂອງສະຫາຍ ຄໍາຕາ ໂຮຊົງເຣືອງ ຄະນະປະຈໍາພັກແຂວງ ປະທານແນວລາວສ້າງຊາດແຂວງສາລະວັນ ຜູ້ຊີ້ນຳວຽກງານອົງການຈັດຕັ້ງມະຫາຊົນ, ມີບັນດາທ່ານ ສະມາຊິກພັກ ແລະ ແຂກທີ່ຖືກເຊີນຈາກພາກສ່ວນທີ່ກ່ຽວຂ້ອງເຂົ້າຮ່ວມ.


ສະຫາຍ ນາງ ຈັນທະຈອນ ຫວາດທະລາວົງ ຄະນະໜ່ວຍພັກ ຮອງປະທານສະຫະພັນແມ່ຍິງແມ່ແຂວງ ກໍ່ຂື້ນຜ່ານບົດສະຫລຸບຕີລາຄາການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ໃນໄລຍະ 1 ປີຜ່ານມາຄະນະໜ່ວຍພັກແມ່ນໄດ້ເອົາໃຈໃສ່ໃນການສຶກສາອົບຮົມການເມືອງແນວຄິດໃຫ້ພະນັກງານລັດຖະກອນສະມາຊິກພັກ, ສະມາຊິກສະຫະພັນແມ່ຍິງ, ເອື້ອຍນ້ອງແມ່ຍິງໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີນ້ຳໃຈຮັກຊາດ, ຮັກກຽດສັກສີຂອງແມ່ຍິງ, ເສີມຂະຫຍາຍມູນເຊື້ອວັດທະນະທຳອັນດີງາມຂອງຊາດ,ໄດ້ເຊື່ອມຊຶມມູນເຊື້ອວັນສຳຄັນຂອງພັກ-ຂອງຊາດ, ມະຕິ, ຄຳສັ່ງຕ່າງໆ ໄດ້ທັງໝົດ 29 ຄັ້ງ, ມີຜູ້ເຂົ້າຮ່ວມ 5 ພັນກວ່າຄົນ, ວຽກງານປົກປ້ອງສິດຜົນປະໂຫຍດຂອງແມ່ຍິງ-ເດັກນ້ອຍ, ໄດ້ໃຫ້ຄຳປຶກສາ ແລະແກ້ໄຂບັນຫາໃນການຊ່ວຍເຫຼືອເພື່ອປົກປ້ອງສິດ ແລະ ຜົນປະໂຫຍດອັນຊອບທຳຂອງແມ່ຍິງ ແລະ ເດັກນ້ອຍ, ໂຄສະນາປູກຈິດສຳນຶກກ່ຽວກັບການຕ້ານການໃຊ້ຄວາມຮຸນແຮງຕໍ່ແມ່ຍິງ, ວຽກງານສົ່ງເສີມບົດບາດຍິງ-ຊາຍ ໄດ້ປະເມີນຄອບຄົວສະເໜີພາບຍິງ-ຊາຍໄດ້ 19 ບ້ານຂອງ 3 ເມືອງຄື: ຕຸ້ມລານ, ຕະໂອ້ຍ ແລະເມືອງວາປີ, ໄດ້ປຸກລະດົມເອື້ອຍນ້ອງແມ່ຍິງສ້າງຕັ້ງກຸ່ມທ້ອນເງິນພັດທະນາຊ່ວຍເຫຼືອເຊິ່ງກັນ ແລະວຽກງານອື່ນໆກໍ່ມີຜົນສຳເລັດ, ໃນນັ້ນໄດ້ຂຽນຂ່າວສົ່ງໃຫ້ສູນກາງແມ່ຍິງລາວໄດ້ 86 ຂ່າວ, ສົ່ງຂ່າວໃຫ້ໜັງສືພິມແຂວງ 46 ຂ່າວ, ຈຳໜ່າຍໜັງສືພິມແມ່ຍິງລາວໄດ້ 1 ພັນກວ່າສະບັບ, ວາລະສານສາວລາວໄດ້ 250 ຫົວ, ຂະຫຍາຍສະມາຊິກສະຫະພັນແມ່ຍິງ ໃນທົ່ວແຂວງມີແມ່ຍິງທັງໝົດ 2 ແສນກວ່າຄົນ, ສະມາຊິກສະຫະພັນແມ່ຍິງທັງໝົດ 57 ພັນກວ່າຄົນ, ກວມ 73 %, ໜ່ວຍສະຫະພັນແມ່ຍິງມີທັງໜົດ 140 ໜ່ວຍ,ໃນນັ້ນອ້ອມຂ້າງແຂວງມີ 22 ໜ່ວຍ, ອ້ອມຂ້າງເມືອງ 118 ໜ່ວຍ, ມີ 712 ຮາກຖານ, ອ້ອມຂ້າງແຂວງ 107 ຮາກຖານ, ຮາກຖານບ້ານ 570 ກວ່າຮາກຖານ, ທົ່ວແຂວງມີພະນັກງານ-ລັດຖະກອນທັງໝົດ 7.891 ຄົນ, ລັດຖະກອນທີ່ເປັນເພດຍິງ 3 ພັນ ກວ່າຄົນ, ສະມາຊິກພັກທັງໜົດ 12 ພັນກວ່າສະຫາຍ, ສະມາຊິກພັກທີ່ເປັນເພດຍິງ 3 ພັນກວ່າສະຫາຍ. ຈາກນັ້ນໃນພິທີຍັງໄດ້ວາງທິດທາງສູ້ຊົນສ້າງໃຫ້ໜ່ວຍພັກປອດໃສເຂັ້ມແຂງໜັກແໜ້ນ ປີ 2021 ຕື່ມອີກ.

ໂອກາດດຽວກັນນັ້ນສະຫາຍ ຄໍາຕາ ໂຮຊົງເຣືອງ ຄະນະປະຈໍາພັກແຂວງ ປະທານແນວລາວສ້າງຊາດແຂວງສາລະວັນ ຜູ້ຊີ້ນຳວຽກງານອົງການຈັດຕັ້ງມະຫາຊົນກໍ່ໄດ້ໃຫ້ກຽດຂື້ນມອບໃບຢັ້ງຢືນໜ່ວຍພັກປອດໃສເຂັ້ມແຂງ ໜັກແໜ້ນ, ເປັນກຽດຮັບໂດຍສະຫາຍ ນາງ ວາດສະໜາ ໂພໄຊຍະວົງ ກໍາມະການພັກແຂວງ ເລຂາໜ່ວຍພັກ ປະທານສະຫະພັນແມ່ຍິງແຂວງ.
ພາບ-ຂ່າວ: ສິຕາ ເພັດວົງສາ