ມີເດຍລາວແຂວງຈຳປາສັກ ຂ່າວ-​ພາບ ຖວ​ທ ເມືອງ.
ເພື່ອ​ເຮັດ​ໃຫ້​ພົນ​ລະ​ເມືອງ​ລ​າວ, ຊາວ​ຕ່າງ​ດ້າວ, ຜູ້ບໍ່​ມີ​ສັນ​ຊາດ ແລະ ຊາວ​ຕ່າງ​ປະ​ເທດ​ທີ່​ອາ​ໃສ ແລະ ດຳ​ລົງ​ຊິ​ວິດ​ຢູ່​ເມືອງ​ປະ​ທຸມ​ພອນ ເຫັນ​ໄດ້​​​ຜົນ​ຮ້າຍ ແລະ ໄພອັນ​ຕະ​ລາຍຂອງ​ພະ​ຍາດ​ໂ​ຄວິດ-19 ທີ່​ມີ​ການ​ກາຍ​ພັນ ແລະ ມີ​ຄວາມ​ຮຸນ​ແຮງ​ເພີ່ມ​ຂື້ນ ພ້ອມ​ທັງ​ເຫັນ​ໄດ້​ຄວາມ​ຈຳ​ເປັນ​ຂອງ​​ຄະ​ນະ​ພັກ, ອຳ​ນາດ​ການ​ປົກ​ຄອງ​ເມືອງ ໃນ​ການ​ນຳ​​ໃຊ້​ມາດ​ຕະ​ການ​ຕ່າງໆ​ຂອງ​ລັດ​ຖະ​ບານ ແລະ ຂອງ​ແຂວງ ເພື່ອ​ສະ​ກັດ​ກັ້ນ, ຄອບ​ຄຸມ ແລະ ການ​ແກ້​ໄຂ​ການ​ລະ​ບາດ​ຂອງ​ພະ​ຍາດ​ດັ່ງ​ກ່າວ ເພື່ອ​ປົກ​ປ້ອງ​ສຸ​ຂະ​ພາບ, ຊິ​ວິດ​ຂອງ​ປະ​ຊາ​ຊົນ​ລາວ ແລະ ຄົນ​ຕ່າງ​ປະ​ເທດ​ຢຸ່​ເມືອງ​ປະ​ທຸມ​ພອນ.

ໃນ​ວັນ​ທີ 7 ພືດ​ສະ​ພາ 2021 ຢູ່ທີ່ຫ້ອງປະຊຸມຫ້ອງວ່າການເມືອງ ​ໄດ້ຈັດກອງປະຊຸມຄົ້ນຄວ້າປືກສາຫາລື ແລະ ວາງມາດຕະການເຂັ້ມງວດ ຕໍ່ການປະຕິບັດຄຳສັ່ງເລກທີ05/ຈຂ,ຈສ, ລົງວັນທີ 6 ພືດສະພາ 2021 ຂອງທ່ານເຈົ້າແຂວງໆຈຳປາສັກ ວ່າດ້ວຍການເພີ່ມທະວີມາດຕະການສະກັດກັ້ນ, ຄອບຄຸມ ແລະ ແກ້ໄຂການລະບາດຂອງພະຍາດໂຄວິິດ-19 ໄລຍະແຕ່ວັນທີ 7-20 ພືດສະພາ 2021 ໂດຍການໃຫ້ກຽດເຂົ້າຮ່ວມເປັນປະທານຂອງທ່ານສະນັ່ນ ສີພາພົມມະຈັນ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ ຜູ້ຊີ້ນຳວຽກງານຮອບດ້ານເມືອງປະທຸມພອນ; ທ່ານວຽງສະໃໝ ສີລິພອນພັນ ກຳມະການພັກແຂວງ ເຈົ້າເມືອງໆປະທຸມພອນ, ບັນດາທ່ານໃນຄະນະກໍາມະການສະເພາະກິດຂັ້ນເມືອງເຂົ້າຮ່ວມ.

ໃນກອງປະຊຸມໄດ້ຮັບຟັງການລາຍງານສະພາບການເຝົ້າລະວັງ ແລະ ການແຜ່ລະບາດຂອງພະຍາດໂຄວິດ-19 ເຊີ່ງມາຮອດປະຈຸບັນ ເມືອງປະທຸມພອນໄດ້ມີສູນກັ່ນກອງ ເພື່ອກັກບໍລິເວນຕິດຕາມອາການ ແລະ ກວດຫາເຊື້ອມີຈຳ ນວນ 2 ສູນຄື: ສູນກັກກັນຫຼັກ36 ທີ່ຮັບແຮງງານມາແຕ່ປະເທດໄທຕໍ່ຈາກ​ສູນຫຼັກ21 ຂອງ​ແຂວງ​ຈຳ​ປາ​ສັກ ແລະ ສູນ​ກັ່ນ​ກອ​ງ ມ ​ສ ​ປະ​ທຸມ​ພອນ ​ກໍ​ລະ​ນີ​ກຸ່ມ​ສ່ຽງ​ສຳ​ຜັດ​ໄກ້​ຊິດກັບ​ຜູ້​ຕິດ​ເຊື້ອຈາກ​ຊຸມ​ຊົມ​ທົ່ວ​ໄປ​ພາຍ​ໃນ​ເມືອງ ແລະ ໄດ້​ເກັບ​ຕົວ​ຢ່າງ​ສະ​ສົມ​ທັງ​ໝົດ 358 ຄົນ, ຍີງ 136 ຄົນ ໃນ​ນັ້ນ; ເປັນ​ຄົນ​ພາຍ​ໃນ​ເມືອງ 58 ຄົນ, ພົບ​ເຊື້ອ 1 ຄົນ(​ສັນ​ຊາດ​ໄທ​ລັກ​ລອບ​ເຂົ້າ​ມາຜິດ​ກົດ​ໝາຍ) ສຳ​ລັບ​ການ​ສັກ​ຢາ​ວັກ​ຊີນ​ໃຫ້​ກໍ​ລະ​ນີ​ກຸ່ມ​ສ່ຽງ ແລະ ບຸກ​ຄົນ​ປະ​ຊາ​ຊົນ​ທົ່ວ​ໄປ​ເຂັມ​ທີ1 -2 ແມ່ນ​ສຳ​ເລັດ100% ​ຕາມ​​ຕົວເລກ​​ທີ່​ໄດ້​ຮັບ​ການ​ແບ່ງ​ປັນ 1.600ຄົນ,

ນອກນັ້ນ; ຍັງ​ໄດ້​ຕັ້ງ​ຈຸດກວດ​ວັດ​ອຸ​ນ​ະ​ພູມ​ຄົນ​ເຂົ້າ-​ອອກ​ເມືອງ​ຈຳ​ນວນ 2 ຈຸດ​ຕາມຊາຍ​ແດນລະ​ຫວ່າງ​ເມືອງ​ຕໍ່​ເມືອງ​ຄື: ຈຸດກວດ​ກາຫຼັກ16ຊາຍ​ແດນ​ຕິດ​ກັບ​ເມືອງ​ບາ​ຈຽງ​ຈະ​ເລີນ​ສຸກ ແລະ ຈຸດກວດ​ກາ​ບ້ານ​ບຸ່ນ​​ເຊື່ອມ​ຕໍ່​ກັບ​ເມືອງ​ໂຂງ ແລະ ເມືອງ​ສຸ​ຂຸ​ມາ ຜ່ານ​ການກວດ​ກາມີ​ຄົນ​ຜ່ານ​ຈຸດ​ເຂົ້າ-​ອອກ​ເມືອງສະ​ສົມ​ທັງ​ໝົດ​ຕົວ​ເລກ​ນັບ​ແຕ່​ວັນ​ທີ 25 ເມ​ສາ-ວັນ​ທີ 6 ພືດ​ສະ​ພາ 2021 ​ມີ​ 4.887ຄົນ, ຍີງ 1.996 ຄົນ ໃນ​ນັ້ນ; ​ແມ່ນກວດບໍ່​ພົບ​ກໍ​ລະ​ນີ​ສົງ​ໃສ​ກຸ່ມ​ສ່ຽງ​ແຕ່​ຢ່າງ​ໄດ, ໄປ​ຄຽງ​ຄູ່​ກັນ​ນັ້ນ, ​ບັນ​ດາ​ທ່ານ​ຜູ້​ແທນ​ກອງ​ປະ​ຊຸມ, ຄະ​ນະ​​ກຳ​ມະ​ການສະ​ເພາະ​ກິດ​ຂັ້ນ​ເມືອງ- ຮາກ​ຖານ​ກຸ່ມ​ບ້ານ ໄດ້​ຜັດ​ປ່ຽນ​ກັນ​ມີ​ຄຳ​ເຫັນ​ແລກ​ປ່ຽນ​ບົດ​ຮຽນ​, ຈຸດ​ດີ-ຈຸດ​ອ່ອນ, ຂໍ້​ຄົງ​ຄ້າງ ແລະ ບາງ​ບົດ​ຮຽນ​ທີ່​ຖອດ​ຖອນ​ໄດ້ ຈາກ​ການ​ປະ​ຕິ​ບັດ​ວຽກ​ງານ​ຕົວ​ຈິງ​ກ່ຽວ​ກັບ​ມາດ​ຕະ​ການ​ສະ​ກັດ​ກັ້ນ, ຄອບ​ຄຸມ ແກ້​ໄຂ​ການ​ລະ​ບາດ​ຂອງ​ພະ​ຍາດ​ໂຄວິດ-19 ໃນ​ໄລ​ຍະ​ຜ່ານ​ມາ ເຊີ່ງ​ມີ​ທັງ​ຂໍ້​ສະ​ດວກ, ຂໍ້​ຫຍຸ້ງ​ຍາກ, ບົດ​ຮຽນ​ອັນໃໝ່ ພ້ອມ​ກັນ​ຈັດ​ຕັ້ງ​ປະ​ຕິ​ບັດ​ຢ່າງ​ເຂັ້ມ​ງວດ ​ເຮັດ​ໃຫ້​ການ​ແຜ່​ລະ​ບາດ​ຂອງ​ພະ​ຍາດ​ດັ່ງ​ກ່າວ ບໍ່​ມີ​ການ​ເພີ່ມ​ຂື້ນ​ພາຍ​ໃນ​ເມືອງ​ຈາກ 1 ກໍ​ລະ​ນີ.

ໂອ​ກາດ​ດັ່ງ​ກ່າວ ທ່ານ​ສະ​ນັ່ນ ສີ​ພາ​ພົມ​ມະ​ຈັນ ຄະ​ນະ​ປະ​ຈຳ​ພັກ​ແຂວງ ຫົວ​ໜ້າ​ຄະ​ນະ​ຈັດ​ຕັ້ງ​ແຂວງ ຜູ້​ຊີ້​ນຳ​ວຽກ​ງານ​ຮອບ​ດ້ານ​ເມືອງ​ປະ​ທຸມ​ພອນ ໄດ້​ມີ​ຄຳ​ເຫັນ​ໃຫ້​ທິດ​ຊີ້​ນຳ​ແກ່​ຄະ​ນະ​ພັກ, ​ອຳ​ນາດ​ການ​ປົກ​ຄອງ ​ກໍ່​ຄື ​ຄະ​ນະ​ສະ​ເພາະ​ກິດ​ຂັ້ນ​ເມືອງ ບົນ​ພື້ນ​ຖານ ​ເພື່ອ​ເຮັດ​ໃຫ້​ການ​ສືບ​ຕໍ່​ຈັດ​ຕັ້ງ​ປະ​ຕິ​ບັດ​ຄຳ​ສັ່ງ​ເລກ​ທີ05/ຈ​ຂ, ຈ​ສ, ລົງ​ວັນ​ທີ 6 ພືດ​ສະ​ພາ 2021 ໃຫ້​ມີ​ຄວາມ​ສັກ​ສິດ ແລະ ທົ່ວ​ເຖີງ​ຢູ່​ໃນ​ສັງ​ຄົມ​ພາຍ​ໃນ​ເມືອງ​ປະ​ທຸມ​ພອນ ຂໍ​ຮຽກ​ຮ້ອງ​ມາ​ຍັງ​ບັນ​ດາ​ທ່ານ​ຕ້ອງ​ໄດ້​ສືບ​ຕໍ່​ເພີ່ມ​ທະ​ວີ​ຄວາມ​ຮັບ​ຜິດ​ຊອບ​ຂອງ​ຕົນ ເຂົ້າ​ໃນ​ການ​ນຳ​ພາ-ຄຸ້ມ​ຄອງ​ສັງ​ຄົມ​ ຢູ່​ໃນ​ແຕ່​ລະ​ບ່ອນ​ທີ່​ເປັນ​ພົນ​ລະ​ເມືອງ​ສັງ​ຄົມ ທີ່ຂື້ນ​ຢູ່​ພາຍ​ໄຕ້​ການ​ນຳ​ພາ-ການ​ຄຸ້ມ​ຄອງ​ຢ່າງ​ເດັ​ດຂາດ ຕໍ່​ການ​​ປະ​ຕິ​ບັດ​ຂໍ້​ຫ້າມ​ຕ່າງໆ​ ດ້ວຍ​ການ​ເຮັດ​ໜ້າ​ທີ່​ປຸກ​ລະ​ດົມ, ໂຄ​ສະ​ນາ ເຜີຍ​ແຜ່​ຂໍ້​ມູນ​ຂ່າວ​ສານ​ຜ່ານ​ສື່​ໂທ​ລະ​ໂຄ່ງ​ຂອງ​ແຕ່​ລະ​ບ້ານ ແລະ ສື່​ອອນ​ລາຍ​ຕ່າງໆ ​, ການ​ເປິດ​ຮັບ​ຟັງ​ການ​ຖ່າຍ​ທອດ​ຂ່າວ​ຕ່າງໆ​ຈາກ​ສະ​ຖາ​ນີ​ວິ​ທະ​ຍຸ​ກະ​ຈາຍ​ສຽງ​ແຫ່ງ​ຊາດ ແລະ ຂອງ​ແຂວງ, ຮັບ​ຟັງ​ການ​ຖະ​ແຫຼງ​ຂ່າວຄະ​ນະ​ສະ​ເພາະ​ກິດ​ຂັ້ນ​ສູນ​ກາງ ແລະ ​ທ້ອງ​ຖີ່ນ ກໍ່​ຄື​ໂຄ​ສະ​ນາ ຄຳ​ເຫັນ​ຂອງ​ທ່ານ​ປະ​ທານ​ປະ​ເທດ​ແຫ່ງ​ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ຮຽກ​ຮ້ອງ​ໃຫ້​ທຸ​ຄົນ​ເອົາ​ໃຈ​ໃສ່​ປະ​ຕິ​ບັດ 4 ຢ່າງ ແລະ 2 ຢູ່ “ ຢ່າ​ສວຍ​ໂອ​ການ​ຍາມ​ເມື່ອ​ຊາດ​ພົບ​ວິ​ກິດ; ຢ່າ​ເສຍ​ຈິດ​ຍ້ອນ​ຂ່າວ​ອະ​ກຸ​ສົນ; ຢ່າ​ເຮັດ​ໃຫ້​ຄົນ​ແຕກ​ຄວາມ​ສາ​ມັກ​ຄີ; ຢູ່​ເຮືອນ​ເຮັດ​ວຽກ​ພັດ​ທະ​ນາໝັ່ນ​ຮັກ​ສາ​ອະ​ນາ​ໄມ​ໃຫ້​​ໄດ້ດີ; ຢູ່​ຮ່ວມ​ກັນ​ດ້ວຍ​ຄວາມ​ມີ​ສະ​ຕິ 4 ຢ່າງ 2 ຢູ່​ນີ້​ຕ້ອງ​ໃສ​ໃຈ ” ເພື່ອ​ເຮັດ​ໃຫ້​ພໍ່​ແມ່​ປະ​ຊາ​ຊົນ​ໄດ້​ຮັບ​ການ​ສະ​ໜອງ​ຂໍ້​ມູນ​ຂ່າວ​ສານຢ່າງ​ທົ່ວ​ເຖີງ ແລະ ກ້​ວາງ​ຂວາງ ຮູ້​ວີ​ທີ​ປ້ອງ​ກັນ, ຮັກ​ສາ​ອະ​ນາ​ໄມ ແລະ ປະ​ຕິ​ບັດ​ມາດ​ຕະ​ການ​ທີ່​ຄະ​ນະ​ສະ​ເພາະ​ກິດ​ສາ​ທາ​ລະ​ນະ​ສຸກວາງ​ອອກ​ຢ່າງ​ເຂັ້ມ​ງວດ.
.