ຫາກເພື່ອນຜູ້ອ່ານສັງເກດຈະເຫັນວ່າປະລິມານຂ່າວການຈັດຕັ້ງເຊື່ອມຊືມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກເຮົາ ແມ່ນເປັນຂະບວນຟົດຟື້ນທີ່ສຸດ.

ການຈັດຕັ້ງເຊື່ອມຊືມ ແລະ ຜັນຂະຫຍາຍໃນຄັ້ງນີ້ແມ່ນມອບໃຫ້ຄະນະພັກກະຊວງ, ອົງການ ແລະ ທ້ອງຖີ່ນ ເປັນເຈົ້າການຮັບຜິດຊອບນຳພາສ້າງແຜນການຈັດຕັ້ງເຊື່ອມຊືມຮໍ່າຮຽນ ແລະ ຜັນຂະຫຍາຍ ຕິດແທດກັບຂະແໜງການ ແລະ ທ້ອງຖີ່ນຂອງຕົນ; ຫັນມະຕິເຂົ້າສູ່ວຽກງານຕົວຈີງໃນວຽກງານ ແລະ ທ້ອງຖີ່ນຕົນ ຫຼີກເວັ້ນການເຮັດແບບຮູບການ; ເປັນພຽງຄຳຂັວນ ແລະ ຄຳຮຽກຮ້ອງແບບລວມໆ.

ສະນັ້ນ ໃນການຈັດຕັ້ງເຊື່ອມຊືມຜັນຂະຫຍາຍນັ້ນ ຄະນະພັກຂັ້ນຕ່າງໆ ຕ້ອງກຳແໜ້ນໃຫ້ໄດ້ເອກະສານ ໂດຍສະເພາະແມ່ນເອກະສານເຊື່ອມຊືມ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ທີ່ຄະນະໂຄສະນາອົບຮົມສູນກາງພັກ ເປັນຜູ້ກະກຽມເຊີ່ງລວມມີຈຸດສຳຄັນໃຫຍ່ໆ ດັ່ງນີ້:

I ຈິດໃຈຊີ້ນຳລວມ ໃນການເຊື່ອມຊືມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ.

II ເນື້ອໃນ ທີ່ຕ້ອງກຳແໜ້ນ

III ມາດຕະການ ແລະ ວິທີການ ໃນການສືບຕໍ່ນຳພາຈັດຕັ້ງເຊື່ອມຊືມ ແລະ ຜັນຂະຫຍາຍມະຕິ XI ຂອງພັກ.

ແລະ ທ້າຍເອກະສານຍັງມີການອະທິບາຍ ກ່ຽວກັບຄຳຂັວນກອງປະຊຸມໃຫຍ່ ຄັ້ງທີ XI ຂອງພັກຕື່ມອີກ.

ນອກຈາກເອກະສານນີ້ແລ້ວ ຍັງຕ້ອງກຳແໜ້ນຄຳສັ່ງ ເລກທີ 38/ຄລສພ ລົງວັນທີ 09 ມິຖຸນາ 2021 ວ່າດ້ວຍການຈັດຕັ້ງເຊື່ອມຊືມ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ໂດຍແມ່ນຄະນະເລຂາທິການສູນກາງພັກ ສົ່ງເຖີງຄະນະພັກບັນດາກະຊວງ; ອົງການ; ຄະນະພັກນະຄອນຫຼວງວຽງຈັນ ແລະ ບັນດາແຂວງໃນທົ່ວປະເທດ; ອ່ານໃຫ້ເຂົ້າໃຈຄຳແນະນຳ ເລກທີ 08/ຄອສພ ລົງວັນທີ 19 ເມສາ 2021 ກ່ຽວກັບການຈັດຕັ້ງເຊື່ອມຊືມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ ເຊີ່ງແມ່ນຄະນະໂຄສະນາອົບຮົມສູນກາງພັກ ສ້າງຂື້ນສົ່ງເຖີງຄະນະພັກບັນດາກະຊວງ; ອົງການ; ແຂວງ ແລະ ນະຄອນຫຼວງວຽງຈັນ ໃນເວລາທີ່ປະເທດພວກເຮົາພວມພົບກັບຄວາມຫຍຸ້ງຍາກຈາກການລະບາດ ຂອງພະຍາດໂຄວິດ-19; ຄະນະໂຄສະນາອົບຮົມສູນກາງພັກ ກໍ່ມີແຈ້ງການ ເລກທີ 15/ຄອສພ ລົງວັນທີ 10 ພຶດສະພາ 2021 ກ່ຽວກັບການຈັດຕັ້ງເຊື່ອມຊືມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວຕື່ມອີກ.

ມີແຕ່ກຳແໜ້ນເອກະສານ; ຄຳສັ່ງ; ແຈ້ງການ ທີ່ກ່າວມາຂ້າງເທີງນັ້ນໃຫ້ເລີກເຊີ່ງ ຈື່ງຈະເຮັດໃຫ້ການຈັດຕັ້ງເຊື່ອມຊືມ ແລະ ຜັນຂະຫຍາຍມະຕິ XI ຂອງພັກເຮົາບັນລຸຜົນສຳເລັດສູງສຸດ.

ທິດດີ