ໃນ 1 ປີຜ່ານມາ ສະພາບແວດລ້ອມໄດ້ມີການຜັນປວນສະຫຼັບຊັບຊ້ອນມີທັງຂໍ້ຫຍຸ້ງຍາກ, ຂໍ້ສະດວກ ແລະ ສິ່ງທ້າທາຍຫຼາຍປະການ ໂດຍສະເພາະບັນຫາການແຜ່ລະບາດຂອງພະຍາດໂຄວິດ-19 ບັນຫາໄພພິບັດທາງທຳມະຊາດ ແລະ ບັນຫາອື່ນໆ ເຊິ່ງໄດ້ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມ ແລະ ການດຳລົງຊີວິດຂອງປະຊາຊົນຈຳນວນບໍ່ໜ້ອຍ ແຕ່ຍ້ອນມີແນວທາງອັນຖືກຕ້ອງຂອງພັກ ບວກກັບຄວາມເປັນເຈົ້າການຂອງຄະນະພັກ, ສະມາຊິກພັກ, ພະນັກງານ, ທະຫານ,ຕຳຫຼວດ ແລະ ພໍ່ແມ່ປະຊາຊົນພາຍໃນເມືອງໄດ້ພ້ອມກັນຈັດຕັ້ງປະຕິບັດ ແລະ ຕັ້ງໜ້າປະກອບສ່ວນເຂົ້າໃນວຽກງານຂອງພັກ ຂອງລັດສຳເລັດໃນຫຼາຍດ້ານ.


ທ່ານ ໄຊຍະຫວັດ ກ້ອນຄຳໝັ້ນ ຮອງເລຂາພັກເມືອງ ຜູ້ຊີ້ນຳວຽກງານພັກ-ພະນັກງານ ໄດ້ລາຍງານຕໍ່ກອງປະຊຸມເປີດກວ້າງຄົບຄະນະບໍລິຫານງານພັກເມືອງ ຄັ້ງທີ 3 ສະໄໝທີ IX ເມືອວັນທີ 17 ມີນາ 2021 ຜ່ານມາວ່າ: ໃນ 1 ປີຜ່ານມາຄະນະບໍລິຫານງານພັກເມືອງໄດ້ເອົາໃຈໃສ່ຊີ້ນຳໆພາວຽກງານເຮັດສຳເລັດໜ້າທີ່ຫຼາຍດ້ານ ໂດຍສະເພາະວຽກງານປ້ອງກັນຊາດ- ປ້ອງກັນຄວາມສະຫງົບ ໄດ້ສຸມໃສ່ແກ້ໄຂປະກົດການຫຍໍ້ທໍ້ເຮັດໃຫ້ສະພາບການດັ່ງກ່າວຼຸດໜ້ອຍຖອຍລົງ ເຊິ່ງໃນປີ 2020 ມີຄະດີເກີດຂຶ້ນ 127 ລາຍ, ແກ້ໄຂແລ້ວ 123 ລາຍ, ພວມດຳເນີນ 4 ລາຍ ອັນພົ້ນເດັ່ນແມ່ນໄດ້ປ້ອງກັນເວນຍາມໃນວັນສຳຄັນຂອງພັກ ຂອງຊາດສາມາດຮັບປະກັນຄວາມສະຫງົບປອດໄພ 100%; ວຽກງາເສດຖະກິດ ແລະແກ້ໄຂຄວາມທຸກຍາກຂອງປະຊາຊົນ ເຫັນວ່າເສດຖະກິດຂອງເມືອງຂະຫຍາຍຕົວ 3,21% ທຽບໃສ່ແຜນການປີ ປະຕິບັດໄດ້ 42,80%, ການແກ້ໄຂຄວາມທຸກຍາກຂອງປະຊາຊົນ ຕິດພັນກັບການສ້າງບ້ານ, ກຸ່ມບ້ານພັດທະນາໃຫ້ໄດ້ຮັບຜົນດີຫຼາຍດ້ານ; ວຽກງານວັດທະນະທຳ-ສັງຄົມ ສາມາດປະຕິບັດບັນດາຄາດໝາຍຂອງກະຊວງສຶກສາທິການ ແລະກິລາວາງອອກ ລວມມີ 15 ຄາດໝາຍ ສຳລັບເມືອງມີ 13 ຄາດໝາຍ, ສາມາດເຮັດບັນລຸໄດ້ 8 ຄາດໝາຍ ຍັງອີກ 5 ຄາດໝາຍທີ່ຈະຕ້ອງສຸມໃສ່, ສຳລັບວຽກງານສາທາລະນະສຸກໄດ້ເອົາໃຈໃສ່ໂຄສະນາສຸຂະສຶກສາອະນາໄມ 3 ສະອາດມາຮອດປະຈຸບັນພວກເຮົາສາມາດສ້າງບ້ານສາທາລະນະສຸກແບບຢ່າງ ແລະຊຸມຊົນເປັນເຈົ້າການດ້ານສຸຂະອະນາໄມໄດ້ 31 ບ້ານ ເທົ່າກັບ 72 ກວ່າສ່ວນຮ້ອຍ; ຂົງເຂດການເມືອງ ໄດ້ເອົາໃຈໃສ່ປັບປຸງກໍ່ສ້າງພັກຕາມ 5 ຫຼັກການ 3 ທິດນຳຂອງພັກວາງອອກເຊິ່ງສະແດງອອກໃນການຈັດປະເພດຕ່າງໆ ໂດຍທົ່ວເມືອງມີຈັດຕັ້ງຮາກຖານ 79 ໜ່ວຍພັກ ມີ 6 ຄະນະພັກຮາກຖານມີສະມາຊິກພັກທັງໝົດ 1.738 ສະຫາຍ, ຍິງ 548 ສະຫາຍ ໃນນັ້ນສະມາຊິກພັກແຂງ1.433 ສະຫາຍ,ຍິງ 460 ສະຫາຍ,ກາງ 296 ສະຫາຍ, ຍິງ 87 ສະຫາຍ,ອ່ອນ 8 ສະຫາຍ, ຍິງ 1 ສະຫາຍ.ທ່ານຮອງເລຂາພັກເມືອງລະມາມ ກ່າວຕື່ມວ່າ: ສ່ວນທິດທາງແຜນການຂອງຄະນະບໍລິຫານງານພັກເມືອງ ປະຈຳປີ 2021 ຄະນະພັກທຸກຂັ້ນສືບຕໍ່ປັບປຸງແບບແຜນວິທີນຳພາ, ແບບແຜນວິທີເຮັດວຽກແບບມີວິທະຍາສາດ ຢ່າງແທດເຖິງຕົວຈິງ, ເພີ້ມທະວີບົດບາດການນຳພັກໃຫ້ສູງ, ສະກັດກັ້ນ ແລະ ແກ້ໄຂບັນຫາປະກົອການຫຍໍ້ທໍ້ໃນຖັນແຖວສະມາຊິກພັກ,ພະນັກງານ ແລະການໂຄສະນາໃສ່ຮ້າຍປ້າຍສີຂອງອິດທິກຳລັງປໍລະປັກ,ກຸ່ມຄົນບໍດີທີ່ຫວັງທຳລາຍມ້າງເພການນຳພາຂອງພັກ, ສືບຕໍ່ຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບຂອງພັກ,ກໍ່ ແລະ ປັບປຸງກຳລັງໃຫ້ມີຄວາມໜັກແໜ້ນເຂັ້ມແຂງ ຮັບປະກັນໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ.


ໂອກາດນີ້ເຂົ້າຮ່ວມກອງປະຊຸມຄັ້ງນີ້ ທ່ານ ນ. ຈັນຫອມ ມະຫາໄຊ ຮອງເລຂາພັກແຂວງ ຜູ້ຊີ້ນຳວຽກງານພັກ-ພະນັກງານ ຂັ້ນແຂວງກໍ່ໄດ້ມີຄຳເຫັນຊີ້ທິດເຍືອງທາງໃຫ້ຄະນະບໍລິຫານງານພັກເມືອງເອົາໃຈໃສ່ສືບຕໍ່ຊີ້ນຳໆພາເຮັດໜ້າທີ່ການເມືອງແນວຄິດໃຫ້ພະນັກງານ, ສະມາຊິກພັກໃນທຸກຂົງເຂດວຽກງານໃຫ້ມີຄວາມໜັກແໜ້ນທົ່ວເຖິງເລິກເຊິ່ງ,ນຳພາເຊືອມຊຶມກຳແໜ້ນຈັດຕັ້ງກົດລະບຽບຂອງພັກໃຫ້ໜັກແໜ້ນເຂັ້ມງວດ,ນຳພາດຳເນີນຊີວິດການເມືອງເປັນປົກກະຕິໃນແຕ່ລະເດືອນ ພ້ອມນີ້ກໍ່ຕ້ອງປັບປຸງແບບແຜນວິທີນຳພາເຮັດວຽກຂອງຄະນະໜ່ວຍພັກໃຫ້ມີແບບແຜນທີ່ຖືກຕ້ອງ ແລະສອດຄອງຕາມກົດລະບຽບຂອງພັກ ແລະກົດໝາຍຂອງລັດວາງອອກ.

ພາບ-ຂ່າວ: ດາວສະຫວັນ ໄຊລາສອນ