ຄະນະ​ກຳມະການ​ແມ່ນ້ຳ​ຂອງ​ແຫ່ງ​ຊາດ ໄດ້​ຈັດ​ກອງ​ປະຊຸມ​ສະໄໝ​ສາມັນ​ຂອງ​ຕົນ​ຂຶ້ນເມື່ອບໍ່​ດົນ​ຜ່ານ​ມາ​ນີ້ ທີ່​ຫ້ອງ​ປະຊຸມ​ກະຊວງ​ພະລັງງານ ແລະ ບໍ່​ແຮ່ ໂດຍ​ພາຍ​ໃຕ້​ການ​ເປັນ​ປະທານ ຂອງ ທ່ານ ສົມ​ມາດ ພົນ​ເສນາ ປະທານ​ຄະ​ນະ​ກໍາ​ມະ​ການ​ແມ່​ນໍ້າ​ຂອງ​ແຫ່ງ​ຊາດ ແລະ ເຂົ້າ​ຮ່ວມມີ ທ່ານ  ຄໍາ​ມະນີ ອິນ​ທິ​ລາດ ລັດ​ຖະ​ມົນຕີ ​ ກະຊວງ​ພະລັງງານ ແລະ ບໍ່​ແຮ່.

ມີ​ບັນດາ​ຮອງ​ປະທານ ແລະ ກຳມະການ​ຂອງ​ຄະນະ​ກຳມະການ​ແມ່ນ້ຳ​ຂອງ​ແຫ່ງ​ຊາດ ເຂົ້າ​ຮ່ວມ​ທັງ​ໝົດ 50 ກວ່າ​ທ່ານ ທີ່​ມາ​ຈາກ​ກະຊວງ​ພະລັງງານ ແລະ ບໍ່​ແຮ່, ກະຊວງ​ໂຍທາ​ທິ​ການ ແລະ ຂົນສົ່ງ, ກະຊວງ​ກະ​ສິ​ກໍາ-​ປ່າໄມ້, ກະ ຊວງ​ການ​ຕ່າງປະເທດ, ກະຊວງ​ແຜນການ ແລະ ການ​ລົງທຶນ, ຫ້ອງ​ວ່າ​ການ​ສໍາ​ນັກ​ງານ​ນາຍົກລັດຖະມົນຕີ, ກອງ​ເລຂາ​ຄະ​ນະ​ກໍາ​ມະ​ການ​ແມ່​ນໍ້າ​ຂອງ​ແຫ່ງ​ຊາດ ແລະ ບັນດາ​ກົມ​ກອງ​ອ້ອມ​ຂ້າງ​ກະຊວງ​ຊັບ​ພະຍາ​ກອນ​ທໍາ​ມະ​ຊາດ ແລະ ສິ່ງ​ແວດ ລ້ອມ.

ກອງ​ປະຊຸມ​ຄັ້ງ​ນີ້ ຄະນະ​ກຳມະການ​ແມ່ນ້ຳ​ຂອງ​ແຫ່ງ​ຊາດ​ໄດ້​ປຶກສາ​ຫາລື​ກ່ຽວ​ກັບ​ຮ່າງ​ຍຸດທະສາດ​ພັດທະນາ​ອ່າງ​ແມ່​ນໍ້າ​ຂອງ (Basin Development Strategy for the Mekong River Basin-BDS) 2021-2030 ລວມ​ທັງ​ຮ່າງ​ແຜນ​ຍຸດທະສາດ​ຂອງ​ຄະ​ນະ​ກໍາ​ມາ​ທິ​ການ​ແມ່​ນໍ້າ​ຂອງ​ສາກົນ (MRC Strategic Plan-SP) 2021-2025, ຍຸດທະສາດ​ການ​ພັດທະນາ​ພະລັງງານ​ໄຟຟ້າ​ແບບ​ຍືນ​ຍົງ (Updated Sustainable Hydropower Development Strategy for the Lower Mekong Basin-SHDS ສະບັບ​ປັບປຸງ ປີ 2019); ບົດ​ແນະ​ນໍາ​ການ​ອອກ​ແບບ​ເບື້ອງ​ຕົ້ນ ສຳລັບ​ການ​ສ້າງ​ເຂື່ອນ​ຢູ່​ຕາມ​ລໍາ​ແມ່​ນໍ້າ​ຂອງ (Updated Preliminary Design Guidance for the Mainstream Dam of the Lower Mekong Basin-PDG 2018); ແລະ ບົດ​ແນະ​ນໍາ​ການ​ປະ​ເມີນ​ຜົນ​ກະທົບ​ດ້ານ​ສິ່ງແວດລ້ອມ ຂ້າມ​ຜ່ານ​ຊາຍ​ແດນ (Guideline for transboundaly Environmental Impact Assessment in the Lower Mekong Basin-TbEIA).

ນອກຈາກ​ນັ້ນ, ກອງ​ປະຊຸມ ຍັງ​ໄດ້​ປຶກສາ​ຫາລື ກ່ຽວ​ກັບ ການ​ບໍລິຫານ​ນໍ້າ​ຮ່ວມ​ກັບ​ບັນດາ​ເຂື່ອນ ແລະ ພາກ​ສ່ວນ​ນໍາ​ໃຊ້​ນໍ້າ​ອື່ນໆ, ສືບຕໍ່​ວາງ​ແຜນ​ຄຸ້ມ​ຄອງ​ອ່າງ​ຮັບ​ນໍ້າ, ການ​ເຜີຍແຜ່​ຂໍ້​ມູນ​-​ຂ່າວສານ ໃຫ້​ຊຸມ​ຊົນ ແລະ ສັງຄົມ ໃຫ້ ທົ່ວ​ເຖິງ ແລະ ທັນ​ການ, ກອງ​ປະຊຸມ​ໄດ້​ສະໜັບສະໜູນ​ໃຫ້​ມີ​ການ​ສືບຕໍ່​ປະກອບສ່ວນ​ຈາກ​ທຸກ​ພາກສ່ວນ ເຂົ້າ​ໃນ​ການ​ຄຸ້ມ​ຄອງ​ຊັບ​ພະຍາ​ກອນ​ນໍ້າ​ໃຫ້​ມີ​ຄວາມ​ຍືນ​ຍົງ ແລະ ໄດ້​ປິດ​ລົງ​ດ້ວຍ​ຜົນ​ສໍາ​ເລັດ​ຢ່າງ​ຈົບ​ງາມ. 

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)