ໃນວັນທີ 1 ກັນຍາ 2020 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດ ຖະມົນຕີ ກະຊວງແຜນການ ແລະ ການລົງທຶນ, ປະທານຄະນະກໍາມະການຮ່ວມມື ລາວ-ຫວຽດນາມ ໄດ້ເຂົ້າອວຍພອນວັນຊາດ ສສ. ຫວຽດນາມ ຄົບຮອບ 75 ປີ ຢູ່ສະຖານທູດຫວຽດນາມ ປະຈຳລາວ ໂດຍໄດ້ຮັບການຕ້ອນຮັບ ຈາກ ທ່ານ ຫງວຽນ ບ່າ ຮຸງ ເອກອັກຄະລັດຖະທູດ ສສ.ຫວຽດນາມ ປະຈໍາ ສປປ ລາວ.

ທ່ານ ສອນໄຊ ສີພັນດອນ ​ໄດ້ສະແດງຄວາມຂອບໃຈ ຕໍ່ສະຫາຍ ຫງວຽນ ບ່າ ຮຸງ ທີ່ໄດ້ໃຫ້ກຽດຕ້ອນຮັບໃນ​ຄັ້ງ​ນີ້, ພ້ອມ​ທັງສະແດງຄວາມຊົມເຊີຍ ຕໍ່ບັນດາຜົນສໍາເລັດ ທີ່ ສສ.ຫວຽດນາມ ຍາດມາໄດ້ໃນການພັດທະນາ ເສດຖະກິດ ກໍຄື ການເຊີດຊູຖານະບົດບາດ, ອິດທິພົນ ແລະ ກຽດຊື່ສຽງຂອງ ສສ.ຫວຽດນາມ ໃຫ້ສູງເດັ່ນຂຶ້ນໃນເວທີພາກພື້ນ ແລະ ສາກົນ ຢ່າງບໍ່ຢຸດຢັ້ງ ໂດຍສະເພາະ ໃນປີ 2020 ນີ້, ຫວຽດນາມ ໄດ້ຮັບຫລາຍໜ້າທີ່ສໍາຄັນ ທັງເປັນປະທານອາຊຽນ, ປະທານໄອປາ ແລະ ສະມາຊິກບໍ່ຖາວອນ ຂອງສະພາຄວາມໝັ້ນຄົງ ສປຊ. ພ້ອມ​ນັ້ນ, ທ່ານ​ຮອງ​ນາຍົກລັດຖະມົນຕີ ຍັງ​ໄດ້ ສະ​ແດງຄວາມພາກພູມໃຈ ທີ່ເຫັນສາຍພົວພັນຮ່ວມມືຮອບດ້ານ ລະຫວ່າງ ສອງປະເທດລາວ ແລະ ຫວຽດນາມ ທີ່ນັບມື້ນັບໜັກ​ແໜ້ນ ແລະ ເລິກເຊິ່ງຂອງພັກ ແລະ ລັດຖະບານ, ພ້ອມຢືນຢັນຈະສືບຕໍ່ ຮັດ​ແໜ້ນສາຍພົວພັນ ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບ ດ້ານ ລະຫວ່າງສອງປະເທດ ພວກເຮົາໃຫ້ຈະເລີນງອກງາມ ແລະ ແຕກດອກອອກຜົນຍິ່ງໆຂຶ້ນ, ເພື່ອຜົນປະໂຫຍດລວມ ຂອງປະຊາຊົນສອງຊາດ ລາວ-ຫວຽດນາມ ກໍຄື ​ເພື່ອ​ສັນຕິພາບ, ສະຖຽນ​ລະ​ພາບ, ຄວາມໜັ້ນຄົງ ແລະ ການພັດທະນາ ໃນຄອບຄົວອາຊຽນ ກໍຄື ໃນ​ເວທີ​ພາກ​ພື້ນ ​ແລະ ​ໃນ​ໂລກ.

ພ້ອມດຽວກັນນັ້ນ, ທ່ານ ສອນໄຊ ສີພັນດອນ ຍັງໄດ້ສະແດງຄວາມຂອບໃຈຢ່າງຈິງໃຈ ແລະ ຮູ້ບຸນຄຸນຢ່າງເລິກເຊິ່ງຕໍ່ພັກ, ລັດ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການຊ່ວຍເຫລືອ ສປປ ລາວ ເປັນຢ່າງດີຕະຫລອດມາ ທັງໃນໄລຍະຕໍ່ສູ້ກູ້ຊາດ ກໍຄື ໄລຍະການປົກປັກຮັກສາ ແລະ ພັດທະນາປະເທດຊາດໃນປັດຈຸບັນ. ພ້ອມອວຍພອນ ໂດຍຜ່ານ ທ່ານເອກອັກຄະລັດຖະທູດ ຫງວຽນ ບ່າ ຮຸງ ໄປຍັງບັນດາການນໍາພັກ-ລັດ ຫວຽດນາມ ກໍຄື ສະຫາຍລັດຖະມົນຕີ ຫງວຽນ ຈິ້ ຢຸງ ປະ ທານຄະນະກໍາມະການຮ່ວມມື ຫວຽດນາມ-ລາວ ພ້ອມດ້ວຍອ້າຍນ້ອງພະນັກງານ ຂະແໜງແຜນການ ແລະ ການລົງທຶນຫວຽດນາມ ຈົ່ງຍາດໄດ້ໄຊຊະນະຍິ່ງໃຫຍ່ກວ່າເກົ່າ. ພ້ອມອວຍພອນໃຫ້ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຈົ່ງໝັ້ນຄົງທະນົງແກ່ນ ຕະຫລອດກາລະນານ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)