ໃນວັນທີ 15 ຕຸລາ 2020 ທ່ານ ນາງ ດຣ. ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານໃຫ້ຮູ້ວ່າ: ປັດຈຸບັນ ສະພາບການລະບາດ ຂອງ ພະຍາດໄຂ້ຍຸງລາຍ ໃນຂອບເຂດທົ່ວປະເທດ ຍັງມີການເພີ່ມຂຶ້ນນັບແຕ່ ຕົ້ນເດືອນມັງກອນ ຫາ ວັນທີ 14 ຕຸລາ 2020, ມີຜູ້ຕິດເຊື້ອ 7.235 ຄົນ, ເສຍຊີວິດ 12 ຄົນ. ໃນນັ້ນ, ແຂວງທີ່ຕິດເຊື້ອຫລາຍກວ່າໝູ່ ແມ່ນ ນະຄອນຫລວງວຽງຈັນ 1.668 ຄົນ, ແຂວງ ບໍລິຄຳໄຊ 833 ຄົນ, ແຂວງ ບໍ່ແກ້ວ 700 ຄົນ ແລະ ແຂວງວຽງຈັນ 687 ຄົນ.
ສະເພາະໃນວັນທີ 14 ຕຸລາ 2020 ກະຊວງສາທາລະນະສຸກ ຢືນຢັນແລ້ວ ມີຜູ້ຕິດເຊື້ອໄຂ້ຍຸງລາຍແລ້ວ 37 ກໍລະນີ, ເພື່ອຕອບໂຕ້ກັບ ການລະບາດຂອງພະຍາດ ໄຂ້ຍຸງລາຍ ກະຊວງສາທາລະນະສຸກ ໄດ້ຮຽກຮ້ອງໃຫ້ປະຊາຊົນລາວ ພ້ອມກັນກຳຈັດ ແລະ ທຳລາຍແຫລ່ງເພາະພັນ ໜອງນ້ຳຍຸງລາຍ ທີ່ເປັນພາຫະນຳເຊື້ອ, ເຊິ່ງໄຂ້ຍຸງລາຍເປັນວຽກງານ ໜຶ່ງທີ່ສຳຄັນ ທີ່ຈະຕ້ອງໄດ້ ຈັດຕັ້ງປະຕິບັດໃຫ້ເປັນ ປະຈຳທຸກອາທິດ ແນໃສ່ເຮັດໃຫ້ການລະບາດ ຂອງ ໄຂ້ຍຸງລາຍຫລຸດລົງເທື່ອລະກ້າວ.
Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
