ໃນວັນທີ 20 ຕຸລາ 2020 ທີ່ນະຄອນຫລວງວຽງຈັນ, ອົງການຢູ່ນິເຊັບ ປະຈຳ ສປປ ລາວ ໄດ້ນຳເອົາອຸປະກອນໄອທີ ມອບໃຫ້ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ເພື່ອສືບຕໍ່ເພີ່ມທະວີການຮ່ວມມື ລະຫວ່າງ ອົງການການຢູນິເຊັບ ແລະ ລັດຖະບານ ສປປ ລາວ ໃນການສົ່ງເສີມສິດທິຄວາມເປັນຢູ່ທີ່ດີຂອງເດັກ ແລະ ແມ່ຍິງ ໃນໄລຍະການຄວບຄຸມການລະ ບາດຂອງພະຍາດໂຄວິດ-19.

ຕາງໜ້າມອບໂດຍ ທ່ານ ເດວິດ ດັງເຄີນ ວ່າການຮອງຜູ້ຕາງໜ້າອົງການຢູນິເຊັບ ປະຈຳ ສປປ ລາວ ແລະ ຮັບໂດຍ ທ່ານ ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງ (ຖວທ) ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ. ອຸປະກອນທີ່ມອບໃຫ້ໃນຄັ້ງນີ້, ປະກອບມີອຸປະກອນສໍາລັບນໍາໃຊ້ໃນການຈັດກອງປະຊຸມ ທາງ ໄກດ້ວຍໂທລະສັບ ແລະ ວີດີໂອ (Teleconference equipment) ຈໍານວນ 5 ຊຸດ ໃຫ້ແກ່ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ເຊິ່ງຈະມອບໃຫ້ ກົມສື່ມວນຊົນ, ໂທລະພາບແຫ່ງຊາດລາວ, ໜັງສືພິມພາສາຕ່າງປະເທດ, ສຳນັກຂ່າວສານປະເທດລາວ ແລະ ໜັງສືພິມປະຊາຊົນ. ພ້ອມນີ້, ອົງການຢູນິເຊັບ ຍັງໄດ້ຈັດຫາລະບົບ Software Zoom ໃຫ້ແກ່ກະຊວງການຕ່າງປະເທດ, ກະຊວງຖະແຫລ່ງຂ່າວ, ວັດທະນະທໍາ ແລະ ທ່ອງທ່ຽວ ແລະ ສະຫະພັນແມ່ຍິງ ເພື່ອນໍາໃຊ້ອຸປະກອນ ກອງປະຊຸມຜ່ານທາງວິດີໂອອອນລາຍ ເພື່ອຮັກສາໄລຍະຫ່າງທາງສັງຄົມ ແນໃສ່ປ້ອງກັນພະຍາດໂຄວິດ-19.

ໂອກາດດັ່ງກ່າວ, ທ່ານ ເດວິດ ດັງເຄີນ ໄດ້ກ່າວວ່າ: ອົງການຢູນິເຊັບ ໃຫ້ຄຳໝັ້ນສັນຍາຢ່າງໜັກແໜ້ນ ໃນການສະໜັບສະໜູນລັດຖະບານ ສປປ ລາວ ໃນການຮັບມືກັບການລະບາດຂອງພະ ຍາດໂຄວິດ-19 ພ້ອມສະໜັບສະໜູນລັດຖະບານ ດ້ານອຸປະກອນດ້ານການແພດ, ອຸປະກອນສົ່ງເສີມດ້ານສຸຂະອານາໄມ ແລະ ເຄື່ອງໃຊ້-ອຸປະກອນທີ່ຈໍາເປັນ. ອົງການຢູນິເຊັບ ຫວັງວ່າອຸປະກອນ ການຈັດກອງປະຊຸມທາງໄກ ຈະປະກອບສ່ວນເຂົ້າໃນການເພີ່ມທະວີ ການຮ່ວມມືຢ່າງຕໍ່ເນື່ອງຂອງອົງການ ຢູນິເຊັບ ແລະ ກະຊວງຖະແຫລ່ງຂ່າວ, ວັດທະນະທໍາ ເພື່ອຮັບປະກັນສິດທິ ແລະ ຊີວິດການເປັນຢູ່ ທີ່ດີຂອງເດັກ ແລະ ແມ່ຍິງ ໃຫ້ໄດ້ຮັບການປົກປ້ອງ ໃນໄລຍະການລະບາດຂອງພະຍາດໂຄວິດ-19.

ພ້ອມນີ້, ທ່ານ ສະຫວັນຄອນ ລາຊະມຸນຕີ ໄດ້ສະແດງຄວາມຂອບໃຈ ທີ່ຍາມໃດອົງການຢູນິເຊັບກໍໄດ້ໃຫ້ຄວາມສຳຄັນ ແລະ ຊ່ວຍເຫລືອສະໜັບສະໜູນ ແກ່ສື່ມວນຊົນລາວຕະຫລອດມາ, ເຊິ່ງອຸປະກອນດັ່ງກ່າວນີ້ ແມ່ນມີຄຸນປະໂຫຍດຢ່າງຫລວງຫລາຍ ໃນການເຮັດວຽກຂອງສື່ມວນຊົນໃນຮູບແບບຊີວິດປົກກະຕິແບບໃໝ່ (New normal) ໃຫ້ມີຄວາມວ່ອງໄວ, ມີປະສິດທິຜົນໃນການເຮັດວຽກ ແລະ ການລາຍງານຂ່າວ.