ທະນາຄານຮ່ວມທຸລະກິດລາວ-ຫວຽດ (ທລວ) ສະໜັບສະໜູນສິນເຊື່ອ ມູນຄ່າ 30 ລ້ານໂດລາສະຫະລັດໃຫ້ບໍລິສັດໂອເຊຍໂນຈຳກັດ ເພື່ອປະກອບສ່ວນພັດທະນາໂຄງການສວນວັດທະນະທຳລ້ານຊ້າງ(ຫຼັກ16) ໂດຍພິທີລົງນາມການສະໜອງທຶນດັ່ງກ່າວ ຈັດຂຶ້ນວັນທີ 20 ຕຸລາ 2020 ຢູ່ ທລວ ລະຫວ່າງທ່ານ ຫງວຽນດຶກວູ້ ຮອງຜູ້ອຳນວຍການໃຫຍ່ ທລວ ແລະ ທ່ານ ຄອນຄຳ ອິນທະວົງ ປະທານບໍລິສັດໂອເຊຍໂນຈຳກັດ ມີທ່ານຫງວຽນວັນບິງ ຜູ້ອຳນວຍການໃຫຍ່ທລວ ພ້ອມດ້ວຍຄະນະບໍລິຫານ ແລະ ພະນັກງານກ່ຽວຂ້ອງທັງສອງຝ່າຍເຂົ້າຮ່ວມ.

ທ່ານ ຄອນຄຳ ອິນທະວົງ ກ່າວວ່າ: ບໍລິສັດ ໂອເຊຍໂນ ຈຳກັດ ສ້າງຕັ້ງ ແລະ ດຳເນີນທຸລະກິດແຕ່ປີ 2012 ເປັນຕົ້ນມາ ໂດຍເບື້ອງຕົ້ນໄດ້ດຳເນີນທຸລະກິດຂົງເຂດກໍ່ສ້າງ ຜ່ານການເຕີບໃຫຍ່ຂະຫຍາຍຕົວ ແລະ ອີງໃສ່ຄວາມຕ້ອງການຂອງສັງຄົມ ກໍຄືການປະກອບສ່ວນສ້າງສາພັດທະນາປະເທດຊາດ ປັດຈຸບັນໄດ້ລົງທຶນຫຼາຍຂົງເຂດທຸລະກິດເປັນຕົ້ນທຸລະກິດປະກັນໄພທຸລະກິດອະສັງຫາທຸລະກິດຮັກສາຄວາມປອດໄພສະຖາບັນການເງິນຈຸລະພາກທີ່ບໍ່ຮັບເງິນຝາກໂຄງການກະສິກຳລ້ຽງສັດພັດທະນາບັນດາໂຄງການຍຸດທະສາດຂອງລັດຖະບານ ເຊັ່ນ: ໂຄງການໂຮງໝໍ 300 ຕຽງໂຄງການພັດທະນາສວນວັດທະນະທຳລ້ານຊ້າງ (ຫຼັກ 16) ເຊິ່ງເປັນໂຄງບຸລິມະສິດທີ່ລັດຖະບານໃຫ້ຄວາມສຳຄັນ ຄາດວ່າມູນຄ່າການລົງທຶນ 80 ລ້ານໂດລາສະຫະລັດ ມາຮອດວັນທີ 9 ຕຸລາ 2020 ທລວ ໄດ້ເຊັນໜັງສືສະໜັບສະໜູນສິນເຊື່ອໃນວົງເງິນ 30 ລ້ານໂດລາສະຫະລັດ ໃຫ້ບໍລິສັດ ໂອເຊຍໂນ ຈຳກັດໃນການປະກອບທຶນເພື່ອພັດທະນາໂຄງການສວນວັດທະນະທຳລ້ານຊ້າງ (ຫຼັກ16) ເຊິ່ງເປັນນິມິດໝາຍທີ່ດີໃນການຮ່ວມມືຂອງສອງຫົວໜ່ວຍທຸລະກິດໃນການຮ່ວມມືພັດທະນາໂຄງການ ກໍຄືການຮ່ວມມືພັດທະນາປະເທດລາວ ຕາມແນວທາງ ແລະ ແຜນພັດທະນາເສດຖະກິດຂອງລັດຖະບານ.
ການສະໜອງຜະລິດຕະພັນຂອງທລວ ຢ່າງຮອບດ້ານໃຫ້ບໍລິສັດໂອເຊຍໂນຈຳກັດຄັ້ງນີ້ ມີຄວາມໝາຍສໍາຄັນ ເຮັດໃຫ້ສາຍພົວພັນຂອງສອງຫົວໜ່ວຍທຸລະກິດນັບມື້ໄດ້ຮັບການພັດທະນາຮ່ວມມືບົນພື້ນຖານຕ່າງຝ່າຍຕ່າງໄດ້ຮັບຜົນປະໂຫຍດແລະເປັນຄູ່ຮ່ວມມືດ້ານທຸລະກິດຍຸດທະສາດທີ່ພັກແລະລັດຖະບານໄວ້ວາງໃຈໃນການພັດທະນາໂຄງການບຸລິມະສິດໃນອະນາຄົດ.

ສະບາໄພ 20/10/2020