ໃນວັນທີ 26 ຕຸລາ 2020 ເຄື່ອງອຸປະໂພກ-ບໍລິໂພກ ປະກອບມີ ເຂົ້າສານຈໍານວນ 3 ໂຕນ, ນໍ້າດື່ມ 492 ແພັກ, ໝີ່ສໍາເລັດຮູບ 306 ແກັດ, ປາກະປ໋ອງ 247 ແພັກ ແລະ ເຄື່ອງນຸ່ງຫົ່ມ, ຢາປົວພະຍາດ ແລະ ເຄື່ອງໃຊ້ ສອຍທີ່ຈໍາເປັນຕ່າງໆ ລວມມູນຄ່າຫລາຍກວ່າ 100 ລ້ານກີບ ໄດ້ຖືກນໍາສົ່ງໄປຊ່ວຍເຫລືອປະຊາຊົນ ທີ່ໄດ້ຮັບຜົນກະທົບ ຈາກໄພນໍ້າຖ້ວມ ຢູ່ເມືອງເຊໂປນ ແຂວງສະຫວັນນະເຂດ.

ທ່ານ ບົວໄລ ພານຸນົງ ຫົວໜ້າຫ້ອງການ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຈ້ງໃຫ້ຮູ້ວ່າ: ເຄື່ອງທີ່ນໍາໄປຊ່ວຍເຫລືອທັງໝົດນີ້, ແມ່ນໄດ້ຈາກການປຸກລະດົມ ບໍລິຈາກຂອງພະນັກງານ,​ ລັດຖະກອນ ພາຍໃນກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ນັກທຸລະກິດ, ຊາວຄ້າຂາຍ ຕະຫລອດຮອດມວນຊົນ ຊາວນະຄອນຫລວງວຽງຈັນ ໃນວັນທີ 23-24 ຕຸລາ 2020 ຜ່ານມາ ຢູ່ຫໍວັດທະນະທໍາແຫ່ງຊາດ ນະຄອນຫລວງວຽງຈັນ, ໂດຍແມ່ນ 3 ອົງການຈັດຕັ້ງມະຫາຊົນ ຂອງກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ຮ່ວມກັບ ອົງການກາແດງລາວ ໄດ້ຈັດກິດຈະກໍາຮັບບໍລິຈາກວັດຖຸປັດໄຈ ແລະ ເຄື່ອງບໍລິໂພກ-ອຸປະໂພກ ເພື່ອໄປຊ່ວຍເຫລືອປະຊາຊົນ ທີ່ປະສົບໄພນໍ້າຖ້ວມຢູ່ ບັນດາແຂວງພາກກາງ ແລະ ພາກໃຕ້.

ເຄື່ອງຊ່ວຍເຫລືອດັ່ງກ່າວ, ຈະນໍາໄປແຈກຢາຍໃຫ້ປະຊາຊົນ ທີ່ໄດ້ຮັບຜົນກະທົບ ຈາກໄພນໍ້າຖ້ວມຢູ່ບ້ານດົງໃຫຍ່, ແກ້ງກົກ, ສະກີພີນ, ກະດັບ ແລະ ບ້ານດົງນ້ອຍ ເມືອງເຊໂປນ ລວມມີ 500 ກວ່າຄອບຄົວ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)