ໃນວັນທີ 29 ກັນຍາ 2020, ທີ່ຫ້ອງປະຊຸມຊັ້ນ 2 ຂອງກະຊວງວິທະຍາສາດ ແລະ ເຕັກໂນໂລຊີ (ກວຕ), ກົມແຜນການ ແລະ ຮ່ວມມື ໄດ້ເຂົ້າຮ່ວມ ກອງປະຊຸມ ສໍາມະນາທາງໄກ ຄັ້ງທີ 10 ໃນຫົວຂໍ້ “ປະສົບການຂອງ ສປປ ລາວ ໃນການຄວບຄຸມ ແລະ ຕອບໂຕ້ພະຍາດ ອັກເສບປອດ ຈາກເຊື້ອຈຸລະໂຣກ ສາຍພັນໃໝ່” (Lao PDR’s Experiences in COVID-19 Control & Response), ຊຶ່ງຈັດຂຶ້ນ ໂດຍ ສູນດີເລີດດ້ານເຄມີ, ຊີວະ, ລັງສີ ແລະ ນິວເຄຼຍ ປະຈຳພາກພື້ນອາຊີ ຕາເວັນອອກສ່ຽງໃຕ້.

ຕາງໜ້າໃຫ້ ສປປ ລາວ ຂຶ້ນນຳສະເໜີຫົວຂໍ້ດັ່ງກ່າວ ໂດຍ ທ່ານ ສຸພັດສອນ ຫວດທອງຄຳ, ຫົວໜ້າພະແນກ ລະບາດວິທະຍາ, ຜູ້ຕາງໜ້າ ຈາກສູນວິເຄາະ ແລະ ລະບາດວິທະຍາແຫ່ງຊາດ, ໃນນັ້ນຕາງໜ້າເຂົ້າຮ່ວມ ໃນນາມຈຸດປະສານງານແຫ່ງຊາດ EUCBRN CoE ຂອງ ສປປ ລາວ ໂດຍ ທ່ານ ຈິດຕະພົງ ອັກຄະວົງ, ຮອງຫົວໜ້າກົມແຜນການ ແລະ ຮ່ວມມື, ທ່ານ ນາງ ວຽງສະຫວັນ ບຸດຕະນະວົງ, ຜູ້ປະສານງານແຫ່ງຊາດ ຜູ້ທີ 2, ພ້ອມດ້ວຍ ຮອງຫົວໜ້າພະແນກອາຊຽນ ແລະ ວິຊາການພະແນກ ອົງການຈັດຕັ້ງສາກົນ.

ກອງປະຊຸມດັ່ງກ່າວ, ຈັດຂຶ້ນເພື່ອເປັນການແລກປ່ຽນບົດຮຽນ ແລະ ແບ່ງປັນປະສົບການ ໃນການຮັບມື ແລະ ຕອບໂຕ້ພະຍາດ COVID-19 ຂອງແຕ່ລະປະເທດ ໃນພາກພື້ນອາຊີິຕາເວັນອອກ ສ່ຽງໃຕ້ ເພື່ອຮ່ວມກັນຫາວິທີ ການປະຕິບັດທີ່ດີ ແລະ ເສີມສ້າງຄວາມເຂັ້ມແຂງ ໃຫ້ບັນດາປະເທດ ພ້ອມທັງກຽມ ຄວາມພ້ອມ ໃນການປ້ອງກັນເຫດການສຸກເສີນ ແລະ ການລະບາດຂອງພະຍາດ ໃນອະນາຄົດ. ໃນກອງປະຊຸມຄັ້ງນີ້, ໄດ້ຮັບຟັງການນໍາສະເໜີ ກ່ຽວກັບ ສະພາບລວມ ສະຖານະການ ການລະບາດຂອງພະຍາດ COVID-19 ຢູ່ ສປປ ລາວ, ການຮ່ວມມື ຂອງຂະແໜງການຕ່າງໆ ໃນການຄຸ້ມຄອງແຮງງານ ທີ່ກັບຄືນ ປະເທດ, ສິ່ງທ້າທາຍ, ຜົນສໍາເລັດຂອງມາດຕະການ ຄວບຄຸມທີ່ຜ່ານມາ ແລະ ຄຳແນະນຳຕ່າງໆ ໃນການຮັບມືກັບ ການລະບາດຂອງພະ ຍາດດັ່ງກ່າວ.

ໃນຕອນທ້າຍ ຂອງກອງປະຊຸມ, ທ່ານ ຈິດຕະພົງ ອັກຄະວົງ ໄດ້ກ່າວສະແດງຄວາມຂອບໃຈ ສູນດີເລີດດ້ານເຄມີ, ຊີວະ, ລັງສີ ແລະ ນິວເຄຼຍ, ປະຈຳພາກພື້ນ ອາຊີຕາເວັນອອກສ່ຽງໃຕ້ ທີ່ໄດ້ເປັນເຈົ້າ ພາບຈັດສໍາມະນາຄັ້ງນີ້ ໂດຍເຫັນໄດ້ເຖິງຄວາມສໍາຄັນ ຂອງການຮ່ວມມື ຂອງພາກສ່ວນຕ່າງໆ ໃນການ ແລກປ່ຽນ ບົດຮຽນເຊິ່ງກັນ ແລະ ກັນ. ພ້ອມນັ້ນ, ກໍຫວັງວ່າປະສົບ ການໃນການປ້ອງກັນ ແລະ ຕອບໂຕ້ກັບພະຍາດ COVID-19 ຂອງ ສປປ ລາວ ຈະເປັນໜຶ່ງ ໃນບົດຮຽນອັນດີ ໃຫ້ແກ່ປະເທດອື່ນໆ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)