ການທ່ອງທ່ຽວຢູ່ຕາດກວາງຊີກັບມາຄຶກຄື້ນດ້ວຍນັກທ່ອງທ່ຽວພາຍໃນປະເທດ ຫລັງຈາກລັດຖະບານໄດ້ມີມາດຕະການຜ່ອນຜັນໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂະນະທີ່ຜູ້ຮັບຜິດຊອບສະຖານທີ່ທ່ອງທ່ຽວແຫ່ງນີ້ ໄດ້ຮຽກຮ້ອງໃຫ້ຄົນລາວຫັນມາທ່ອງທ່ຽວລາວ ລາວທ່ຽວລາຍໃຫ້ເປັນຂະນວນຄຶກຄື້ນ.

ທ່ານ ບຸນມີ ອຸ່ນນະທີ ຜູ້ຮັບຜິດຊອບຕາດກວາງຊີໄດ້ໃຫ້ສໍາພາດກັບທີມຂ່າວມີເດຍລາວວ່າ: “ກ່ອນໜ້າເກີດການລະບາດຂອງພະຍາດ ໂຄວິດ-19 ຕາດກວາງຊີ ສາມາດສ້າງລາຍຮັບຈາກການບໍລິການຕ່າງໆ ໄດ້ບໍ່ຫລຸດ 10 ລ້ານກີບຕໍ່ວັນ, ໃນນີ້ ຖ້າແມ່ນວັນພັກລັດຖະການ ຫຼື ໂອກາດສໍາຄັນຕ່າງໆສາມາດສ້າງລາຍຮັບໄດ້ບໍ່ຕໍ່າກວ່າ 15 ລ້ານກີບຕໍ່ວັນ ນັກທ່ອງທ່ຽວສ່ວນຫລາຍແມ່ນນັກທ່ອງທ່ຽວຈີນ. ແຕ່ຍ້ອນການລະບາດຂອງພະຍາດໂຄວິດ-19 ຕາດກວາງຊີ ໄດ້ປິດບໍລິການໄລຍະໜຶ່ງຕາມຄໍາສັ່ງຂອງລັດຖະບານເພື່ອປ້ອງກັນການລະບາດຂອງພະຍາດດັ່ງກ່າວ ເຊິ່ງຫລັງຈາກລັດຖະບານມີມາດຕະການຜ່ອນຜັນໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ເຫັນວ່ານັກທ່ອງທ່ຽວເລີ່ມເຂົ້າມາທ່ອງທ່ຽວຕາດກວາງຊີນັບມື້ເພີ່ມຂຶ້ນ ແຕ່ສ່ວນໃຫຍ່ແມ່ນນັກທ່ອງທ່ຽວພາຍໃນປະເທດ”.

ສ່ວນທາງດ້ານນັກທ່ອງພາຍໃນແຂວງຫຼວງພະບາງ ທ່ານ ແສງ ເພັດວັນໄຊ ບອກກັບທີມຂ່າວມີເດຍລາວວ່າ: “ຕົນເອງກໍ່ເປັນຜູ້ນຳທ່ຽວຢູ່ແຂວງຫຼວງພະບາງ ແຕ່ຍ້ອນການແຜ່ລະບາດຂອງພະຍາດໂຄວິດ 19 ຈຶ່ງໄດ້ຢຸດເຊົາຊົ່ວຄາວຫັນມາເປັນນັກທ່ອງທ່ຽວພາຍໃນເອງເພື່ອກະຕຸ້ນການທ່ອງທ່ຽວນຳກັນ ແຕ່ສິ່ງທີ່ພວກເຮົາຄວນຊ່ວຍກັນກໍ່ຄືການສົ່ງເສີມທຸລະກິດຂອງຄົນລາວດ້ວຍກັນ ຈຶ່ງເຮັດໃຫ້ເງິນຕາບໍ່ຮົ່ວໄຫຼ”.

ໃນສະພາບປັດຈຸບັນທີ່ຫຼາຍຄົນບໍ່ສາມາດຈະເດີນທາງໄປທ່ອງທ່ຽວຕ່າງປະເທດໄດ້ ແລະ ເພື່ອເປັນການກະຕຸກຊຸກຍູ້ການທ່ອງທ່ຽວລາວທ່ຽວລາວໃຫ້ມີບັນຍາກາດຄືກຄື້ນ ແຫຼ່ງທ່ອງທ່ຽວຕາດກວາງຊີ ກໍເປັນອີກແຫ່ງໜຶ່ງພາຍໃນແຂວງຫລວງພະບາງ ທີ່ເປັນແຫຼ່ງທ່ອງທ່ຽວທໍາມະຊາດ ເຊິ່ງຕາດກວາງຊີ ຢູ່ຫ່າງຈາກເທດສະບານນະຄອນຫລວງພະບາງ ໄປທາງທິດຕະເວັນຕົກສ່ຽງໃຕ້ປະມານ 30 ກິໂລແມັດ, ຕາດແຫ່ງນີ້ເປັນນ້ຳຕົກຫີນປູນຂະໜາດໃຫຍ່ ທີ່ສູງປະມານ 81 ແມັດ, ກ້ວາງສຸດ 35 ແມັດ, ປະກອບດ້ວຍ 6 ຊັ້ນ, ມີສາຍນ້ຳໄຫລອາບມາຕາມໜ້າຜາຜ່ານຫີນນ້ອຍໃຫຍ່ ຮູບຊົງແປກຕາລົງສູ່ແອ່ງນ້ຳເບື້ອງລຸ່ມຕະຫລອດປີ. ສໍາລັບຄ່າເຂົ້າຊົມຄົນລາວ 10.000 ກີບ ແລະ ຕ່າງປະເທດ 20.000 ກີບ, ສ່ວນເດັກນ້ອຍອາຍຸຕໍ່າກ່ວາ 8 ປີ ບໍ່ໄດ້ເສຍຄ່າ

Medialaos MMD